ހޯމަ ދުވަހު ބާއްވާނެ ކަމަށް އިއުލާނުކުރި ރައްޔިތުންގެ މަޖިލީހުގެ މި ދައުރުގެ ދެވަނަ ޖަލްސާ އަންގާރަ ދުވަހަށް ފަސްކުރުމަށްފަހު، ހޯމަ ދުވަހު ފަސް މިނެޓުން ގާނޫނު އަސާސީ އަށް ބަދަލު ގެންނަން ކޮމިޓީން ފާސް ކޮށް، ދެ އިންތިހާބު އެއްކޮށްލާ ބިލުގެ ކޮމިޓީ ރިޕޯޓު އަންގާރަ ދުވަހުގެ ޖަލްސާގެ އެޖެންޑާގައި ހިމަނައިފި އެވެ.
އަންގާރަ ދުވަހުގެ ޖަލްސާގެ އެޖެންޑާގައިވާ ކަންތައްތަކަށް ބަލާއިރު، އިލެކްޝަންސް ކޮމިޝަންގެ ގާނޫނުގެ 4 ވަނަ މާއްދާގެ (ށ) ގައިވާ ގޮތުގެ މަތިން، އިލެކްޝަންސް ކޮމިޝަނަށް މެންބަރަކު އައްޔަން ކުރެއްވުމަށްޓަކައި ރައީސް ފޮނުވައްވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލައާއި ގުޅޭ ދާއިމީ ކޮމިޓީއަށް ފޮނުވުން ހިމެނެ އެވެ.
މީގެ އިތުރުން ފޮރިން ސަރވިސްގެ ގާނޫނޫގައިވާ ގޮތުގެ މަތިން ރިޕަބްލިކް އޮފް ސަރބިއާ އަށާއި ރިޕަބްލިކް އޮފް މޯލްޓާ އަށް ދިވެހިރާއްޖެއިން ކަނޑައަޅުއްވާ ނޮން-ރެސިޑެންޓް ސަފީރު ހަމަޖެއްސެވުމަށްޓަކައި ރައީސް ފޮނުއްވާފައިވާ މައްސަލަ، ދިރާސާކޮށް ގޮތެއް ނިންމުމަށް އެ މައްސަލައާއި ގުޅޭ ދާއިމީ ކޮމިޓީއަށް ފޮނުވުން ހިމެނެ އެވެ.
މީގެ އިތުރުން މަޖިލީހަށް ތައާރަފް ކުރާ ބިލުގެ ގޮތުގައި ވަތަނީ ހިދުމަތުގެ ބިލާއި، ވަޒީފާއާ ބެހޭ ގާނޫނަށް އިސްލާހު ގެނައުމުގެ 2 ބިލެއް ވަނީ އެޖެންޑާ ކޮށްފަ އެވެ.
އަންގާރަ ދުވަހުގެ ޖަލްސާގައި ކޮމިޓީ އިން ހުށަހަޅާ ކަންތައްތަކުގެ ތެރޭގައި ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އަށް އިސްލާހު ގެނައުމުގެ ބިލު، މިނިވަން މުއައްސަސާތަކުގެ ކޮމިޓީ އިން ދިރާސާކޮށް ނިންމި ގޮތުގެ ރިޕޯޓު ވަނީ ހިމަނާފަ އެވެ. މި ރިޕޯޓަކީ ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލުމަށް ސަރުކާރުން މަޖިލީހަށް ހުށަހަޅާފައިވާ ބިލުގެ ރިޕޯޓެވެ.
ގާނޫނު އަސާސީ އަށް ގެންނަ އިސްލާހުގައި ބުނެފައި ވަނީ ރައްޔިތުންގެ މަޖިލިހުގެ މެމްބަރު ކަމަށް މީހުން ހޮވުމަށް ބާއްވަން ޖެހޭ އިންތިޚާބު ބާއްވާނީ ގާނޫނު އަސާސީގެ 110 ވަނަ މާއްދާގެ ދަށުން ރައީސުލް ޖުމްހޫރިއްޔާ އަކު ހޮވުމަށް ބާއްވާ އިންތިޚާބާ އެކުގައި ކަަމަށެވެ.