މަދަނީ ހުކުމްތައް ތަންފީޒުކުރާނެ ގޮތުގެ އޮނިގަނޑަކާއި، އެކަމަށް ޚާއްސަ އިދާރާ އެއް ބޭނުންވާ ކަމަށް އުއްތަމަ ފަނޑިޔާރު އަބްދުލްޣަނީ މުޙައްމަދު ވިދާޅުވެއްޖެ އެވެ.
ޤަޟާއީ އަހަރު އިފުތިތާހު ކުރުމަށް އާދިއްތަ ދުވަހުގެ ރޭ ބޭއްވި ރަސްމިއްޔާތުގައި ޣަނީ ވަނީ މަދަނީ އަދުލުގެ ނިޒާމަކީ ވަރަށް ފުޅާ ނިޒާމެއް ކަމަށް ފާހަގަކުރައްވާފަ އެވެ. އެ ނިޒާމްގެ ތެރެއިން ކޮންމެ ދުވަހަކު އެތައް ޙުކުމްތަކެއް ކުރާ އިރު އެ މައްސަލަތަކުގައި ކުރާ ހުކުމްތައް ފަނޑިޔާރުގެއިން ބޭރުން ނުވަތަ އެތެރެއިން ވިޔަސް ތަންފީޒު ކުރާނެ ޤާނޫނީ ހަރުދަނާ ނިޒާމެއް އޮތުން މުހިންމު ކަމަށް އަބްދުލްޣަނީ ވިދާޅުވި އެވެ.
ކޯޓުތަކުން ކުރާ ޙުކުމްތަކުގެ ނަތީޖާ ހާސިލް ވާނީ އެ ހުކުމްތައް އެގޮތުގައި ތަންފީޒު ވެގެން ކަމަށް އުއްތަމަ ފަނޑިޔާރު ވަނީ ވިދާޅުވެފަ އެވެ.
"މިއަދު މި ވަނީ މިފަދަ މެކޭނިޒަމްއަކަށް އިންތިހާ އަށް ބޭނުންވެފައި. މިފަދަ ޙުކުމް ތަންފީޒް ކުރާނެ ހަރުދަނާ ޤާނޫނީ އޮނިގަނޑަކާއި އެއްކޮށް، މިކަމަށް ޚާއްސަ އިދާރާ އެއް ޤާނޫނީ އޮނިގަނޑުގެ ބާރުވެރިކަމާއި އެކު މިއަދު ވަނީ އުފައްދަން ޖެހިފައި." އުއްތަމަ ފަނޑިޔާރު ވިދާޅުވި އެވެ.
ކޯޓުތަކުން ކުރާ ހުކުމްތައް ތަންފީޒުކުރެވުމުން އިޖުތިމާއީ ހަމަޖެހުން ޤާއިމްވެގެން ދާނެ ކަމަށް ވެސް އެ މަނިކުފާނު ވަނީ ވިދާޅުވެފަ އެވެ. އުއްތަމަ ފަނޑިޔާރު ވިދާޅުވީ އެކަމުގެ ސަބަބުން ރާއްޖެ އަށް ކޮމާޝަލް ބޭންކުތަކާއި އިންވެސްޓަރުންގެ އިތުބާރު ލިބިގެންދާނެ ކަމަށެވެ.
ހަމައެހެންމެ ހުކުމްތައް ތަންފީޒުކުރުމުގެ ސަބަބުން އާއިލީ ހަމަނުޖެހުމުގެ ތެރެއިން އަނބިންނާއި ދަރިންގެ އިތުރުން މުސްކުޅި މައިންބަފައިންނާ މެދު ހިންގޭ ނޭދެވޭ އަމަލުތަކުން އެ ފަރާތްތަކަށް ރައްކާތެރިކަން ލިބިގެންދާނެ ކަމަށް އުއްތަމަ ފަނޑިޔާރު ވިދާޅުވި އެވެ. ކޯޓުތަކުން ކުރާ ހުކުމްތައް އެގޮތުގައި ތަންފީޒް ވުމަކީ ފަނޑިޔާރު ގެއިން ދެކެމުންދާ އުއްމީދީ ހުވަފެނެއް ކަމަށް ވެސް އުއްތަމަ ފަނޑިޔާރު ވިދާޅުވި އެވެ.
މީގެ އިތުރުން ލަސްވަމުންދާ މައްސަލަތައް އަވަސްކުރުމަށް ވަރަށް ޚާއްސަ އިސްކަމެއް ދެއްވާކަމަށް އުއްތަމަފަނޑިޔާރު ވަނީ ވިދާޅުވެފަ އެވެ. ޝަރުއީ ދާއިރާ އަކީ އާއްމުންގެ އިތުބާރާއި ޔަގީންކަން އޮތް ދާއިރާއަކަށް ހެދުމަށް މަސައްކަތް ކުރައްވާ ކަމަށް ވެސް އެ މަނިކުފާނު ވަނީ ވިދާޅުވެފަ އެވެ.