މާލެ ސިޓީ ކައުންސިލްގެ ދިގު މާޒީގައި ފުރަތަަމަ ފަހަރަށް އިންޓަރނަލް އޮޑިޓެއް ހިންގާ އާއްމު ކުރުމަށް ތައްޔާރުވެފައި ވުމަކީ ފޮރުވުމެއް ނެތި ސިޓީ ކައުންސިލްގެ މަސައްކަތްތައް އެ ކައުންސިލުން ހިންގަމުންދާ މިންވަރު ކަމަށް މާލޭގެ މޭޔަރ އާދަމް އާޒިމް ވިދާޅުވެއްޖެ އެވެ.
ސިޓީ ކައުންސިލް ރައްޔިތުންގެ ބައްދަލުވުމުގަައި ވާހަކަދައްކަވަމުން އާޒިމް ވިދާޅުވީ މާލޭގެ ދެމެހެއްޓެނެވި ތަރައްޤީ އަށް ޒިންމާދާރުކަމާއި އެކު މަސައްކަތް ކުރުމަށް މާލޭގެ މޭޔަރގެ ހައިސިއްޔަތުން ވަރަށް ބޮޑަށް އަހައްމިއްޔަތުކަން ދެއްވާ ކަމަށެވެ. އެގޮތުން އެންމެ ބޮޑު އިސްކަމެއް ދެއްވާފައިވާނީ ޒިންމާދާރު މުއައްސަސާ އަކަށް ސިޓީ ކައުންސިލް ހެދުމަށް ކަމަށް އޭނާ ވަނީ ވިދާޅުވެފަ އެވެ. އާޒިމް ވިދާޅުވީ އެ މަގްސަދު ހާސިލްކުރުމަށް ހިންގުމުގެ ނިޒާމް ހަރުދަނާ ކުރުމަށް ގިނަ މަސައްކަތްތަކެއް ކުރައްވާފައި ވާނެ ކަމަށް އާޒިމް ވިދާޅުވި އެވެ.
"އިންޓަރނަލް އޮޑިޓް އާއްމުކޮށް ހާމަކުރުމަކީ އެތެރޭގެ ހިންގުމަށް ފާޑުކިޔުމަށް ފާޅުކޮށް ތަރުޚީބު ދޭ ކަމާއި، އެތެރޭގައި ހުރި ރަނގަޅު ކުރަން ޖެހޭ ކަންތައްތައް ފޮރުވުމުގެ ބަދަލުގައި ރަނގަޅުކުރަން ބޭނުންވާ ކަމުގެ އަލިގަދަ ހެއްކެއް. ގަވަރނަންސް ހަރުދަނާ ކުުރުމަށް ހިންގާ ކަންކަމުގެ ތެރޭގައި އޮޑިޓަރ ޖެނެރަލްގެ ޒިންމާގެ ތެރެއިން ހިންގާ އޮޑިޓް ވެސް ހިނގަމުން އެބަދޭ." އާޒިމް ވިދާޅުވި އެވެ.
އާޒިމް ވަނީ ހިންގުމުގައި ދެ ފުށް ފެންނަ އުސޫލްތައް ޚިޔާރުކުރުމަށް އިސްކަން ދެއްވާ ކަމަށެވެ. މާލޭ ސިޓީގެ ބިންތަކުގެ ލިސްޓު އާއްމުކުރުމަކީ ވެސް ހިންގުން ހަރުދަނާ ކުރުމަށާއި އާއްމުންނަށް ހަމަހަމަ ޚިދުމަތެއް ދިނުމަށް ކުރި ކަމެއް ކަމަށް އާޒިމް ވިދާޅުވި އެވެ. އެކަމުގެ ބޭނުމަކީ އޮޅުވާލައިގެން ރައްޔިތުން ބިންތައް ދިނުމަށް މަގުފަހި ނުވާކަން ކަށަވަރުކުރުން ކަމަށް ވެސް އާޒިމް ވަނީ ވިދާޅުވެފަ އެވެ.
އާޒިމް ވަނީ މާލޭގެ ހުރިހާ ބިމެއްގެ ބޭސް ރޭޓް ހިމެނޭ އުސޫލެއް މި މަހުގެ ތެރޭގައި ނިންމާނެ ކަމަށް ވެސް ވިދާޅުވެފަ އެވެ. އެއީ މާލޭގެ ބިން އެއް ހަމައަކުން ދޫކުރުމަށް މަގުފަހި ވެގެން ދާނެ ކަމެއްކަމަށް އޭނާ ވަނީ ވިދާޅުވެފަ އެވެ.