އައްޑޫ ސިޓީގައި އައިސީޓީ ހަބެއް ގާއިމުކުރުމަށް ސަރުކާރުން ބިން ހޯދާފައިވަނީ، އެ ސިޓީގެ ލޭންޑް ޔޫސް ޕްލޭން ފާސްކޮށްނުދީ ހިފެހެއްޓުމަށްފަހު އޮޅުވާލުމެއްގެ ތެރެއިން ކަމަށް، އައްޑޫ ސިޓީގެ މޭޔަރު އަލީ ނިޒާރު ތުހުމަތުކުރައްވައިފި އެވެ.
ހޮނިހިރު ދުވަހުގެ ރޭ ޕީއެންސީން ބޭއްވި ޖަލްސާގައި ވާހަކަފުޅު ދައްކަވަމުން، އިކޮނޮމިކް މިނިސްޓަރ ސަޢީދު ވިދާޅުވީ އެ މަޝްރޫޢުގެ އަމަލީ މަސައްކަތްތައް ވަރަށް އަވަހަށް ފެށިގެންދާނެ ކަމަށެވެ.
އެ ޖަލްސާގައި ވާހަކަދައްކަވަމުން ވަޒީރު ސައީދު ފާހަގަކުރެއްވި ގޮތުގައި، ދުނިޔޭގެ މަޝްހޫރު ކުންފުނި ގޫގުލްގެ ކޭބަލް އިންޑިއާ ކަނޑު ހުރަސްކޮށް އޮމާނާ ގުޅާލުމަށް ހަމަޖެހިފައިވަނީ އައްޑޫ ސިޓީ ހިތަދޫ މެދުވެރިކޮށެވެ. މީގެ ސަބަބުން އައްޑޫގެ އިގްތިސާދީ ގޮތުން ވަރުގަދަވެގެންދާނެ އެވެ. ހާއްސަކޮށް ޑިޖިޓަލް އިގްތިސާދުގެ މާހައުލަށް ބަލާއިރު، މި މަޝްރޫއާއެކު އައްޑޫ ސިޓީއަކީ ބައިނަލްއަގުވާމީ ފެންވަރުގެ އައިސީޓީ ހަބަކަށް ވެގެންދިއުމުގެ ފުރުސަތު ފަހިވެގެންދާނެ ކަމަށެވެ.
ސައީދުގެ އެ ވާހަކަތަކާއި ގުޅިގެން ނިޒާރު ވިދާޅުވީ އެ ކަމަށް ބޭނުންވާ ބިން ހޯދީ ވެސް އޮޅުވާލުމުގެ ތެރެއިން ކަމަށެވެ.
"މި ބިމަކީ ސަރުކާރުގެ ބޭނުމަށް ކަމަށް ބުނެ ހޯދި ބިމެއް. އަޅުގަނޑުމެން ތަކުރާރުކޮށް ސުވާލު ކުރިން ކީއްކުރާ ބިމެއްތޯ ސާފުކޮށެއް ނުދެއްވާ. ދެން ލޭންޑް ޔޫޒް ޕްލޭން ފާސްކޮށްދޭނީ އެ ބިން ދިނީމަ އޭ ބުނީމަ ބިން ދިނީ. އެއީ އެކަން ހިނގި ގޮތަކީ." ނިޒާރު ވިދާޅުވި އެވެ.
ނިޒާރު ފާހަގަކުރެއްވި ގޮތުގައި، އޭޝިއާ ސަރަޙައްދުގައި ވެސް އެފަދަ ދެވަނަ އެހެން ތަނެއް ނެތް ކަމަށް ބުނެ ދައްކާ ވާހަކަތަކަކީ ޙަޤީޤަތާ ޚިލާފު އޮޅުވާލުމަކަށް ވުމުގެ ފުރުސަތު ބޮޑެވެ. އަދި ސަރުކާރުން މިހާތަނަށް މިފަދަ ފޮނި ވާހަކަ ދައްކާފައިވީ ނަމަވެސް، އެ ކަންކަމުގެ އެއްވެސް އަމަލީ ސިފައެއް މިހާތަނަށް ފެންނަން ނެތް ކަމަށް އޭނާ ވިދާޅުވިއެވެ.
އިތުރަށް ވާހަކަދައްކަވަމުން ނިޒާރު ވިދާޅުވީ، އައްޑޫގެ އިޤްތިޞާދަށް ފައިދާވާނެ ކަމަށް ބުނި ނަމަވެސް، އެކަން ވާނެ ގޮތެއް ސައީދަށް ސާފުކޮށްދެއްވިފައި ނުވާ ކަމަށެވެ. އަދި އައްޑޫގެ ރައްޔިތުންނަށް ލިބޭނެ ވަޒީފާގެ ފުރުސަތުތަކާއި ކުރާނެ މަންފާ ނޭނގި، މި މަޝްރޫޢުން އައްޑޫއަށް ކުރިއެރުން ލިބޭނެ ކަމަށް ބުނުމަކީ ހަމަޖެހޭ ކަމެއް ނޫން ކަމަށް ނިޒާރު ފާހަގަކުރެއްވި އެވެ.
"ބަޔަކު ކޮމިއުނިކޭޝަނަށް ބޭނުންކުރާ ކޭބަލެއް މިތަނުން ދިއުމުން އަދި ވަޒީފާ އެއް ނު އުފެދޭނެ. އައިޓީ ހަބަކަށް އަދި ބަދަލެއް ނުވާނެ. އެކަމުގެ ޓެކްނިކަލް ޑީޓެއިލް އެއް ވެސް ނުދެއްވާ. ފްލޯކް ވާހަކަ އެއީ. ވަރަށް ބޮޑު އޮޅުވާލުމެއް އެއީ." ނިޒާރު ވިދާޅުވި އެވެ.
އެ ބިމުގެ ކުލި ސަރުކާރަށް ލިބޭ ގޮތަށް އޮތުމުން، އޭގެ ސަބަބުން ރައްޔިތުންނަށް އެއްވެސް މަން ފާއެއް ނުކުރާނެ ކަމަށް އޭނާ ފާހަގަކުރެއްވި އެވެ. މީގެއިތުރުން، އިންތިޚާބާ ދިމާކޮށް ރައްޔިތުންނަށް މިފަދަ ގޮތްގޮތަށް އޮޅުވާލުމަކީ ދެރަވަރު ކަމެއް ކަމަށާއި، އެފަދަ ކަންކަމުގެ މަޅީގައި ރައްޔިތުން ނުޖެހުމަށް ނިޒާރު ވަނީ އިލްތިމާސްކުރައްވާފަ އެވެ.