ޓެރަރިސްޓް ޖަމާއަތްތައް އަނެއްކާވެސް ކަނޑައަޅައި، އަދި ސީރިއާ އަށް ދިވެހިން ދަތުރުކުރުން މަނާކޮށްފައި އޮތްއޮތުން ބަދަލުކޮށް ސީރިއާގައި ވެރިކަންކުރާ ހަޔާތު ތަހްރީރް އަލް ޝާމް (އެޗްޓީއެސް) ޖަމާއަތް ރާއްޖޭގެ ޓެރަރިސްޓް ޖަމާއަތްތަކުގެ ލިސްޓުން އެންމެފަހުން އުނިކޮށްފި އެވެ.
ޓެރަރިޒަމް މަނާ ކުރުމުގެ ގާނޫނު ބުނާގޮތުން ޓެރަރިސްޓް ޖަމާއަތްތަކުގެ ލިސްޓާއި ދިވެހިން ދަތުރުކުރުން މަނާ ހަނގުރާމަވެރި ސަރަހައްދުތައް ރައީސް ކަނޑައަޅުއްވަން ޖެހޭނެ އެވެ. އަދި ގައުމީ ސަލާމަތާ ބެހޭ މަޖިލީހުގެ ލަފައާ އެކު، ކޮންމެ އަހަރަކު އެއްފަހަރު އެ ލިސްޓު މުރާޖާ ކުރަމުން ގެންދަން ޖެހޭނެ އެވެ.
އެގޮތުން މިދިޔަ ބުރާސްފަތި ދުވަހު ޓެރަރިސްޓް ޖަމާއަތްތަކުގެ ލިސްޓާއި ދިވެހިން ދަތުރުކުރުން މަނާ ހަނގުރާމަވެރި ސަރަހައްދުތައް ރައީސް ކަނޑައަޅުއްވާ އެ ލިސްޓު ވަނީ ގެޒެޓު ކޮށްފަ އެވެ. ވޭތުވެދިޔަ އަހަރުތަކުގައި ބަދަލުނުވެ އޮތް ލިސްޓު މިފަހަރު މިފަހަރު ވަނީ ބަދަލުކޮށްފަ އެވެ.
ސީރިއާގެ ރައީސް ބައްޝާރުލްއަސަދުގެ ވެރިކަން ކުއްލި ގޮތަކަށް ވައްޓާލުމަށްފަހު ޑިސެމްބަރު، 2024 ގައި ވެރިކަމާ ހަވާލުވި އެޗްޓީއެސް ޖަމާއަތަކީ އޮކްޓޫބަރު، 2019 އިން ފެށިގެން ރާއްޖޭގެ ޓެރަރިސްޓް ލިސްޓްގައި އޮތް ޖަމާއަތެކެވެ. އަދި އެ ލިސްޓް ޑިސެމްބަރު، 2024 ގައި އެންމެފަހުން ނެރުނުއިރު ވެސް އެޗްޓީއެސް ޖަމާއަތް ހިމެނޭހެން 20 ޖަމާއަތެއް ރާއްޖޭގެ ޓެރަރިސްޓް ޖަމާއަތްތަކުގެ ލިސްޓްގައި އޮތެވެ. އަބޫ މުޙައްމަދު އަލް-ޖައުލާނީ އިސްވެ ހުންނަވާ މި ޖަމާއަތަކީ ކުރިން އަލްގައިދާއާ ގުޅުން އޮތް ޖަބްހަތުއް ނުސްރާގެ ނަމުގައި ހަރަކާތްތެރިވި ޖަމާއަތެއް ނަމަވެސް، ފަހުން އެ ޖަމާއަތް ވަނީ ސީރިއާ ސަރުކާރުގެ މުހިންމު ބައިވެރިއަކަށް ބަދަލުވެފައެވެ.
އަދި ރާއްޖޭގެ ޓެރަރިސްޓް ޖަމާއަތްތަކުގެ ލިސްޓުން އެޗްޓީއެސް އުނި ކުރިއިރު، އެމެރިކާއިން ވެސް މިދިޔަ އަހަރު ވަނީ އެ ޖަމާއަތް އެ ލިސްޓުން އުނިކޮށްފަ އެވެ.