ކުރިއަށް އޮތް ލޯކަލް ކައުންސިލް އަދި ޑަބްލިއުޑީސީ ގެ އިންތިޚާބަކީ ދެފުށް ފެންނަ ގޮތަށް ވޯޓުލުމަށް ފުރުސަތު ލިބޭ ފަހު އިންތިޚާބަށް ވެދާނެ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު އެފަދައިން ވިދާޅުވީ އެމްޑީޕީގެ ހަރުގޭގައި ހޯމަ ދުވަހުގެ ރޭ ބޭއްވި "ހޭވައްލާ ތައްޔާރު" ޖަލްސާގައި ވާހަކަދައްކަވަމުންނެވެ.
ޚާއްސަކޮށް ޒުވާނުން ކުރިއަށް އޮތް ލޯކަލް ކައުންސިލް އަދި ޑަބްލިއުޑީސީ ގެ އިންތިޚާބާއި މެދު ވިސްނަން ޖެހޭ ކަމަށް ޝާހިދު ވިދާޅުވި އެވެ. ޒުވާނުން ނުކުމެ ޕީއެންސީ އާއި ދެކޮޅަށް ވޯޓު ދިނުމަކީ ކޮންމެހެން ކުރަން ޖެހޭ މުހިންމު ކަމެއް ކަަމަށް ޝާހިދު ވިދާޅުވި އެވެ. މި ވޯޓަށްފަހު ޒަމާންތަކެއް ވަންދެން ދިވެހިންނަށް ވޯޓެއް ލާނެ ފުރުސަތެއް ނުލިބި ދިއުމަކީ ވެސް އެކަށީގެންވާ ކަމެއް ކަމަށް ޝާހިދު ވިދާޅުވި އެވެ.
އިންތިޚާބުތައް އޮޅުވާލުމަށް މަގުފަހިވާ ގޮތަށް ސަރުކާރުގެ އަމަލުތައް ބައްޓަންކުރަމުންދާ ކަމަށް ޝާހިދު ސިފަކުރެއްވި އެވެ. ރިމޯޓަށް ފިތާލީމަ ކަން ހިނގާ އުސޫލުން ވޯޓުލުމުގެ ކަންކަން އިންތިޒާމުކުރުމަކީ އެއީ ރަނގަޅު ގޮތް ނޫން ކަމަށާއި، އެއީ މިނިވަން ކަމާއި އެކު ވޯޓުލާން ލިބޭ ފުރުސަތަކަށް ވެގެން ނުދާނެ ކަަމަށް ޝާހިދު ވަނީ ވިދާޅުވެފަ އެވެ.
"މިކަހަލަ ވާހަކަ ދެއްކީމަ ހީވެދާނެ ކަންބޮޑުކޮށްގެން ވާހަކަދައްކަނީ ކަމަށް. އަޅުގަނޑަކީ ކަންކަން ހިނގާ ގޮތް ސާފުކޮށް ފޮރުވުމެއް ނެތި ދަންނަވާ މީހެއް.މިދިޔަ ރިޔާސީ އިންތިޚާބުގައި އަޅުގަނޑު ދެންނެވިން ހުދުމުހުތާރު ވެރިއެކޭ ތި ގެންނަވަނީ. ހަމަ އެހެންވީ." ޝާހިދު ވިދާޅުވި އެވެ.
ޕީއެންސީ އަކީ ރައްޔިތުންނަށް ބާރު ދިނުމުގެ ވިސްނުން ގެންގުޅޭ ބައެއް ނޫން ކަމަށާއި ވެރިކަން ލިބޭ ކޮންމެ ފަހަރަކު ފެންނަނީ ރައްޔިތުންގެ ބާރު ދަމާ އަތުލާ މަންޒަރު ކަމަށް ޝާހިދު ވިދާޅުވި އެވެ. އަދި މަރުކަޒުކުރުމާއި ޚުދުމުހުތާރު ވެރިކަމެއްގެ ސިފަ މިހާރު ފެންނަމުންދާ ކަމަށް ޝާހިދު ވަނީ ވިދާޅުވެފަ އެވެ.