ރާއްޖޭގެ ހާއްސަ އިގުތިސާދީ ސަރަހައްދުގައި ގާނޫނާ ހިލާފަށް ހަރަކާތްތެރިވި ލަންކާގެ 2 ބޯޓު އަތުލައިގެންފި އެވެ.
އެމްއެންޑީއެފުން ބުނިގޮތުގައި އަތުލައިގެންފައި ވަނީ ދެ މަސް ބޯޓެވެ. މި ދެ ބޯޓު ހިފަހައްޓާފައި ވަނީ އެމްއެންޑީއެފް ކޯސްޓްގާޑާއި އެމްއެންޑީއެފް އެއާ ކޯއިން ހިންގި ސަވެއިލަންސް އޮޕަރޭޝަނެއްގައި އެވެ.
އެމްއެންޑީއެފުން ބުނީ މި ދެ ބޯޓު އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެންގޮސްފައި ވަނީ އާދިއްތަ ދުވަހުގެ މެންދުރު 2:02 ހާއިރު، ހއ. ކެލާގެ އިރުން 109 ނޯޓިކަލް މޭލު ބޭރުން ކަމަށެވެ. އެ ދެ ބޯޓު އެމްއެންޑީއެފް ގެ ބެލުމުގެ ދަށަށް ގެންދިއުމަށް ފަހު ބޯޓުތައް ވައްދާފައި ވަނީ ކުޅުދުއްފުށި ސިޓީ ބަނދަރަށެވެ. އަދި އެ ބޯޓުތައް ފުލުހުންނާ ހަވާލުކުރުމުގެ މަސައްކަތް ކުރަމުންދާ ކަމަށް އެ އިދާރާ އިން ބުނެ އެވެ.
ރާއްޖޭގެ ހާއްސަ އިގްތިސޯދީ ސަރަހައްދުގައި ޤަވާއިދާއި ޚިލާފަށް ހަރަކާތްތެރިވުމުގެ ސަބަބުން އެމްއެންޑީއެފްގެ އެއާ ކޯއިން ވަނީ މިދިޔަ ނޮވެމްބަރު މަހުގެ ތެރޭ ވެސް ލަންކާގެ މަސް ބޯޓެއް ވެސް އަތުލައިގަނެފަ އެވެ. އެ ބޯޓުން ގިނަ އަދަދެއްގެ މަސްތުވާތަކެތި ވަނީ ފެނިފަ އެވެ. އަދި އެ ބޯޓުން އެ ގައުމުގެ ފަސް މީހަކު ހައްޔަރުކޮށް ޝަރީއަތް ނިމެންދެން އެ މީހުން ވަނީ ބަންދުކޮށްފަ އެވެ.