އަޅުގަނޑަށް އެނގިގެން ވިހަފަރުގެ އީއައިއޭ އެއް ސަބްމިޓެއް ނުކުރޭ، އަދި މަޝްރޫއު ވެސް ނުފެށޭ: އީއާރުއޭގެ ޗީފް އެގްޒެކެޓިވް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ނ. ވިހަފަރުގައި އެއަރޕޯޓު ތަރައްޤީކުރުމަށް ބޭނުންވާ ބިންހިއްކުމުގެ ޢަމަލީ މަސައްކަތް ފެށުމަށް އެ ސަރަޙައްދުގައި ބޭއްވި ރަސްމިއްޔާތު ޝަރަފުވެރިކޮށްދެއްވި އިރު އެ މަޝްރޫއުގެ އެންވަޔަރަންމަންޓަލް އިމްޕެކްޓް އެސެސްމަންޓް ރިޕޯޓު (އީއައިއޭ) ނުހަދާކަން އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރުއޭ) އިން ކަށަވަރު ކޮށްދީފި އެވެ.

ސަރުކާރުން މަޝްރޫއު ފެށިކަމަށް ބުނެފައިވާ އިރު، ދިވެހިރާއްޖޭގެ ތިމާވެށި ރައްކައުތެރިކޮށް ދެމެހެއްޓުމާ ބެހޭ ގާނޫނުގައި ބުނެފައިވަނީ ރާއްޖޭގެ ތިމާވެއްޓަށް ފާހަގަ ކުރެވޭ ފަދަ ބަދަލެއް އަތުވެދާނެ އެއްވެސް ޕްރޮޖެކްޓެއް ހިންގުމުގެ ކުރިން އެކަމުން ތިމާވެއްޓަށް އަސަރު ފޯރާނެ މިންވަރު ބަޔާން ކުރާ ރިޕޯޓެއް ހަދާ ހުށަހަޅަން ވާނެ ކަމަށެވެ. 

"ހުރިހާ ފަރާތަކަށް ވެސް އެނގޭނެ އީއައިއޭ ރިޕޮސިޓްރީ އަކީ ޕަބްލިކް (އެއްޗެއްކަން) ... ޕްރޮޖެކްޓާ ގުޅުން ހުރި ރިޕޯޓް ގެ މަރުހަލާތައް މިހާރު ކުރިއަށް ދަމުން ދަނީ،" އީއާރުއޭގެ ޗީފް އެގްޒެކެޓިވް ވިދާޅުވި އެވެ. 

އީއާރުއޭގެ ޗީފް އެގްޒެކެޓިވް ހައްސާން މުހައްމަދު ރާއްޖެ ޓީވީ އާ ވާހަކަ ދައްކަވަމުން ވިދާޅުވީ، "ކުޑަ ލޭންޑިން އޭރިއާ އެއް" ހަދަން އެއް ދުވަހުގެ މުއްދަތުގެ ހުއްދަ އެއް ދީފައިވާ ކަމަށާއި، "އެއީ މަޝްރޫއުގެ ބައެއް ނޫން،" ކަމަށެވެ. 

އޭނާ ވިދާޅުވީ، އެއީ ވަކި ކުޑަ ކަމަކަށް އިންނަ ޕާމިޓެއް ކަމަށާއި އެއީ އެންމެ ދުވަހަކަށް ދިން ޕާމިޓެއް ކަމަށެވެ.

ހައްސާން ވިދާޅުވި ގޮތުން އަދި ވިހަފަރު ގެ މަޝްރޫއުގެ އެއްވެސް ކަމެއް ކުރިއަކަށް ނުދެއެވެ. އޭނާ ވިދާޅުވީ، މަޝްރޫއު ކުރިއަށް ދާނީ، ތިމާވެށީގެ ހުއްދަތައް ލިބި، އެންވަޔަރަންމަންޓަލް ކްލިއަރެންސް ޕްރޮސެސް ނިމުމުން ކަމަށެވެ.

އީއާރުއޭގެ ޗީފް އެގްޒެކެޓިވް މިހެން ވިދާޅުވި ނަމަވެސް  ރައީސް އޮފީހުގެ ރަސްމީ ވެބްސައިޓްގައި ޝާއިއު ކޮށްފައިވާ މި ކަމާ ގުޅޭ ޚަބަރު ގައި ސާފު ކޮށް ބުނެފައިވަނީ "ނ. ވިހަފަރުގައި އެއަރޕޯޓެއް ތަރައްގީ ކުރުމަށް ބިން ހިއްކުމުގެ އަމަލީ މަސައްކަތް ފަށާފައިވާ،" ކަމަށެވެ.

މި މަޝްރޫޢުގެ ދަށުން، 40 ހެކްޓަރަށްވުރެ ބޮޑު ސަރަޙައްދެއް، 1.6 މީޓަރުގެ އުސްމިނުގައި ހިއްކޭނެ ކަމަށާއި، އެ ރަސްމިއްޔާތުގައި "ޢަމަލީ ގޮތުން މިމަޝްރޫޢު ފައްޓަވައިދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުޙައްމަދު ސަޢީދާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދު،" ކަމަށް ރައީސް އޮފީހުން ހާމަ ކޮށްފައިވެ އެވެ.

މަޝްރޫއުގެ އަމަލީ މަސައްކަތް ފެށުމުގެ ރަސްމިއްޔާތު ސަރުކާރުގެ ޓީވީ - ޓީވީއެމް އިން ވަގުތުން ދުރަށް ދައްކަމުން ދިޔައިރު، ދެ ހައިމާކް ބާއްވައިގެން ކޮނެގެން ފަސްނަގާ އަޅަމުން ދިޔަ އިރު މުޅި ސަރަހައްދަށް ކިސަޑުތައް ފެތުރިފައިވާ މަންޒަރު ވެސް ދެއްކި އެވެ.

އީއާރުއޭގެ ޗީފް އެގްޒެކެޓިވް ވިދާޅުވީ، އީއައިއޭ ރިޕޯޓު ފާސް ވުމުގެ ކުރިން "އުސޫލެއްގެ ގޮތުން މަޝްރޫއު ކުރިއަށް ގޮސްގެން ނުވާނެ،" ކަމަށެވެ.

ވަރަށް ސާފު ކޮށް އޭނާ ވިދާޅުވީ، 29 ވަނަ ދުވަހު ވިހަފަރުގައި ކުރިއަށް ދިޔައީ މަޝްރޫއު ފެށުން ނޫން ކަމަށެވެ.

އޭނާ އިތުރަށް ވިދާޅުވީ، އީއައިއޭ ރިޕޯޓު ހުށަހެޅުމުން، ރިވިއު ޕްރޮސެސް އިން ކުރިއަށް ގެން ގޮސްގެން ނޫނީ މަޝްރޫއުގެ އަމަލީ މަސައްކަތް ނުފެށޭނެ ކަމަށެވެ. 

އޭނާ އިތުރަށް ވިދާޅުވީ، އޭގެ ކުރިން އެއްވެސް ކަމެއް ކުރިއަށް ގެންދާ ކަމަށް ރިޕޯޓެއް ލިބިއްޖެ ނަމަ، އެއީ ގާނޫނާ ޚިލާފަށް ކުރިއަށް ގެންދާ ކަމެއް ކަމަށެވެ. 

"އަޅުގަނޑަށް އެނގިގެން ވިހަފަރުގެ އީއައިއޭ އެއް ސަބްމިޓެއް ނުކުރޭ."

ހައްސާން ވިދާޅުވީ، ރިޕޯޓު ހުށަހެޅުމުން ރިޕޯޓު އާންމު ކޮށް ފެންނަން ހުންނާނެހެން އީއާރުއޭގެ ވެބްސައިޓް ގައި ޝާއިއު ކުރާނެ ކަމަށެވެ.