ރައްޔިތުންގެ މަޖިލީހުގެ ދައުރު ކުރުކޮށް، ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމާ ގުޅޭގޮތުން ފެންނަ ނުފެންނަ ވޯޓެއް ނެގުމަށް ސަރުކާރުން ގެންގުޅޭ ވިސްނުމާ ގުޅޭގޮތުން، މިނިވަން މުއައްސަސާތަކާ ބެހޭ ކޮމިޓީގައި މެންބަރު މީކާއިލް އަހުމަދު ނަސީމު ކުރެއްވި ސުވާލުތަކަށް އިލެކްޝަންސް ކޮމިޝަނުގެ ރައީސް މުހައްމަދު ޒާހިދު ސީދާ ޖަވާބު ނުދެއްވައި، ސުވާލުތަކުން ރެކިވަޑައިގަތުމުން ކޮމިޓީ ހޫނުވެއްޖެ އެވެ.
ހޯމަ ދުވަހު ބޭއްވި މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި ގަލޮޅު ދެކުނު ދާއިރާގެ މެންބަރު މީކާއިލް ވަނީ ވަރަށް މުހިއްމު ސުވާލުތަކެއް ކޮމިޝަނުގެ ރައީސަށް އަމާޒުކުރައްވާފަ އެވެ. މީކާއިލް ފާހަގަކުރެއްވި ގޮތުގައި ކުރިއަށް އޮތް ލޯކަލް ކައުންސިލް އިންތިޚާބަކީ ތަފާތު ހަތަރު ފާހަގަ ޖަހަންޖެހޭ، މިހާރުވެސް ރައްޔިތުންގެ މެދުގައި އޮޅުންބޮޅުން ބޮޑުވެފައިވާ އިންތިޚާބެކެވެ. މިފަދަ ހާލަތެއްގައި އިންތިޚާބާ އެކު ރިފަރެންޑަމް ވޯޓެއް ނެގުމަކީ އެންމެ އައުލާކަން ބޮޑު ގޮތްތޯ އާއި، 45 ދުވަހުގެ ތެރޭގައި ރައްޔިތުން އެކަމަށް އަހުލުވެރިކުރެވޭނެތޯ މީކާއިލް ސުވާލުކުރެއްވި އެވެ.
"އަޅުގަނޑު މިއަހަނީ އިލެކްޝަންސް ކޮމިޝަނުގެ ރައީސްގެ ހައިސިއްޔަތުން މަނިކުފާނުގެ އޮޕީނިއަން އަކީ ކޮބައިތޯ. ރައްޔިތުން ސްޓޭޓް އޮފް ކޮންފިއުޝަނަކަށް ނުގޮސް މިކަން ކުރެވޭނެތޯ،" މީކާއިލް ސުވާލުކުރެއްވި އެވެ.
މި ސުވާލަށް ޖަވާބު ދެއްވަމުން ކޮމިޝަނުގެ ރައީސް ޒާހިދު ވިދާޅުވީ، ކޮމިޝަނުން ދައްކާ ކޮންމެ ވާހަކައަކީ ފަސް މެންބަރުން މަޝްވަރާކޮށްގެން ނިންމާ ނިންމުންތަކެއް ކަމަށެވެ. އަދި މިއީ ގިނަ މަގާމުތަކަކަށް އެއްފަހަރާ ވޯޓުލާ ފުރަތަމަ ފަހަރު ނޫން ކަމަށްވެސް އޭނާ ވިދާޅުވި އެވެ. މީގެ އިތުރުން، ގާނޫނަކުން ކަމެއް ލާޒިމްކޮށްފި ނަމަ އެކަމެއް ކޮމިޝަނުން ކުރާނެ ކަމަށާއި، އެއީ އެންމެ ރަނގަޅު ގޮތްތޯ ނުވަތަ ނޫންތޯ އެއީ މުޅިން ތަފާތު ކަމެއް ކަމަށް ޒާހިދު ވިދާޅުވި އެވެ.
ޒާހިދު ތަކުރާރުކޮށް ވިދާޅުވީ އޭނާ ކޮމިޓީއަށް ވަޑައިގަތީ އަމިއްލަ "ޕާސަނަލް އޮޕީނިއަން" ދެއްވަން ނޫން ކަމަށާއި، ކޮމިޝަނުގެ ރައީސްގެ ހައިސިއްޔަތުން ދައްކަވާނީ ކޮމިޝަނުން ނިންމާފައިވާ ވާހަކަތައް ކަމަށެވެ.
ނަމަވެސް، މީކާއިލް ވަނީ ކޮމިޝަނުގެ ރައީސް ސުވާލު އޮޅުވާލައްވާ ކަމަށް ވިދާޅުވެ ވަރަށް ބޮޑަށް ނުރުހުން ފާޅުކުރައްވާފަ އެވެ.
"އަޅުގަނޑު މިއަހަނީ އޮނަރަބަލް ޒާހިދުގެ އަމިއްލަ ޚިޔާލެއް ނޫން. އިލެކްޝަންސް ކޮމިޝަނުގެ ރައީސްގެ ހައިސިއްޔަތުން ތިޔަ މުއައްސަސާގެ އޮބްޖެކްޓިވް އޮޕީނިއަން އަށް މިއަހަނީ. 45 ދުވަހަކީ ރައްޔިތުން އަހުލުވެރިކުރަން އެކަށީގެންވާ މުއްދަތެއްތޯ؟" މީކާއިލް އަނެއްކާ ވެސް ސުވާލު ތަކުރާރު ކުރެއްވި އެވެ.
މި ސުވާލާ ގުޅިގެންވެސް ޒާހިދު ވިދާޅުވީ، އިތުރު އެއްޗެއް ދެންނެވޭނީ ކޮމިޝަނުގައި އިތުރަށް މަޝްވަރާ ކުރުމަށްފަހު ކަމަށެވެ. މި މައްސަލައިގައި ކޮމިޓީގެ މަސްލަހަތު ބޮޑަށް ހޫނުވެގެން ދިޔައީ، ބޮޑު ނިންމުމެއް ނިންމާއިރު އިލެކްޝަންސް ކޮމިޝަނުގެ އިސްވެރިޔާގެ ހައިސިއްޔަތުން ލަފައެއް ދެއްވަން އޭނާ އުޒުރުވެރިވެވަޑައިގަތުމުންނެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށްޓަކައި ގާނޫނުއަސާސީ އަށް ހުށަހަޅާފައިވާ އިސްލާހުގެ ބިލު، މަޖިލީހުގެ ޗުއްޓީ މުއްދަތުގައި ދައުރުން ބޭރުން ޖެނުއަރީ 5 ވަނަ ދުވަހު ކުއްލި ގޮތަކަށް އެޖެންޑާކުރުމާ ގުޅިގެން، ބައެއް ފަރާތްތަކުން ވަނީ އެކަމަށް ބަހުސްކޮށް ފާޑުކިޔުންތައް އަމާޒުކޮށްފަ އެވެ.
އެ ގާނޫނުގައިވާ ގޮތުން، ރައްޔިތުންގެ ހިޔާލު ހޯދުމުގެ އާންމު ވޯޓެއް ބޭއްވުމަށް އެދި ހުށަހަޅާ ތާރީހާއި ވޯޓު ނެގުމާ ދެމެދު، މަދުވެގެން 45 ދުވަސް އަދި ގިނަވެގެން 90 ދުވަހުގެ މުއްދަތެއް އޮންނަންޖެހެ އެވެ. އަދި އެ މުއްދަތުގެ ތެރޭގައި އާންމުން ހޭލުންތެރިކުރުމުގެ މަސައްކަތްތައް ކުރިއަށް ގެންދަންޖެހޭނެ ކަމަށް ވެސް ގާނޫނުގައި ބަޔާންކޮށްފައިވެ އެވެ.