ކޭޕާކް ފްލެޓްތައް ވިއްކުމުގެ ނަމުގައި މަކަރާއި ހީލަތުން އެތައް ބައެއްގެ އަތުން ފައިސާ ނެގި މައްސަލައިގެ ދައުވާ ސާބިތުވި ހަސަން މަމްދޫހު (މަންޑޭ) ގެ ޚިޔާނާތުގެ ފައިސާ، މި ސަރުކާރުގެ އިކޮނޮމިކް މިނިސްޓަރު މުހައްމަދު ސައީދަށް ލިބިފައިވާ ކަމުގެ ބޮޑެތި ތުހުމަތުތަކެއް ފެންމަތިވެއްޖެ އެވެ.
މި ތުހުމަތުތައް ފެންމަތިވެފައިވަނީ، ކޭޕާކް މައްސަލާގައި 94 ދައުވާ އެއް ސާބިތުވެ، އެ މަޝްރޫއު ހިންގި ހަންބޯ ކުންފުނީގެ ކުރީގެ ހިއްސާދާރު ހަސަން މަމްދޫހު (މަންޑޭ) އަށް ކްރިމިނަލް ކޯޓުން ދިގު މުއްދަތުގެ ޖަލު ހުކުމެއް އިއްވާފައިވާ ދަނޑިވަޅެއްގަ އެވެ.
މި މައްސަލައިގެ ތެރެއިން ވަޒީރު ސައީދަށް އަމާޒުވާ ތުހުމަތުތަކަކީ، މަމްދޫހުގެ ހަނގު އަނބި އައިމިނަތު ޝަހުދާ އާއި، ވަޒީރު ސައީދުގެ އަނބިކަނބަލުން އިހުސާނާ އަބްދުﷲ ހިއްސާވާ ކުންފުންޏަކަށް ކޭޕާކް ޚިޔާނާތުގެ ފައިސާ ޖަމާކޮށްފައިވާ ކަމަށް ބުނާ ތުހުމަތުތަކެވެ.
އިކޮނޮމިކް މިނިސްޓްރީގެ ކުންފުނިތަކުގެ ރެޖިސްޓްރީން ދައްކާ ގޮތުގައި، "އިކުއިލިބްރީ" ނަމަކަށް ކިޔާ މި ކުންފުންޏަކީ 2020 ވަނަ އަހަރު ޝަހުދާ އާއި އިހުސާނާ ހިއްސާދާރުންގެ ގޮތުގައި ތިބެގެން ރެޖިސްޓްރީކޮށްފައިވާ ކުންފުންޏެކެވެ.
މި ކުންފުންޏަކީ ކޭޕާކްގެ ޚިޔާނާތުގެ ފައިސާ ދައުރުކުރުމަށް ބޭނުންކުރި ވަސީލަތެއް ކަމަށް ތުހުމަތުކޮށް، ސޯޝަލް މީޑިއާގައި އާންމުން ދަނީ މިކަން ބަލައި ސައީދާ މެދު ފިޔަވަޅު އެޅުމަށް ގޮވާލަމުންނެވެ.
ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭ ގައި ތަރައްގީކުރަމުންދާ ކޭ-ޕާކް ރެޒިޑެންސް ގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ހީލަތް ހަދާފައިވާ ކަމަށް ތުހުމަތުކުރެވޭ މައްސަލަ ފެންމަތިވެ، މަންޑޭގެ މައްޗަށް 100 އަށް ވުރެ ގިނަ ދައުވާ ދައުލަތުން ވަނީ އުފުލާފަ އެވެ. އަދި ދިވެހި ފުލުހުންގެ ޚިދުމަތުން މި މައްސަލައިގެ ތަހުގީގު ފުރިހަމަ ކުރުމަށް ފަހު ގެއްލުން ލިބުނު 51 މީހުންނާ ގުޅިގެން ދައުވާތައް ކުރުމަށް ކްރިމިނަލް ކޯޓަށް ހުށަހެޅީ 12 ޑިސެންބަރު 2023 ގައެވެ. އިކުއިލިބްރީ އަކީ މަމްދޫހުގެ އަނބިމީހާ ގެ ކުންފުންޏަކަށް ވާއިރު މި ޚިޔާނާތުގެ ފައިސާ އެ ކުންފުންނާއި ކުންފުނީގެ ހިއްސާދާރުންނަށް ލިބުނު ކަމަށް އާއްމުން ދަނީ ތުހުމަތު ކުރަމުންނެވެ.
މީގެ އިތުރުން، ރިޔާސީ އިންތިޚާބުގެ ކެމްޕެއިން ޚަރަދުތަކަށް މި ފައިސާ ބޭނުންކޮށްފައިވާ ކަމަށް އާންމުންގެ ތެރޭގައި ވަނީ ބޮޑެތި ތުހުމަތުތަކެއް ކޮށްފަ އެވެ. ބައެއް ފަރާތްތަކުން ތުހުމަތުކުރާ ގޮތުގައި، ކޭޕާކް ޚިޔާނާތުގެ ފައިސާ ސީދާގޮތެއްގައި ސައީދަށް ވަނީ ލިބިވަޑައިގެންފަ އެވެ. މިފަދަ ތުހުމަތުތަކެއް ފެންމަތިވެފައިވާއިރު، ރައީސް ޑރ. މުޙައްމަދު މުއިއްޒު އިންތިޚާބީ ރައީސްގެ ގޮތުގައި ހުންނެވި ދުވަސްވަރު، އެ އޮފީހުގެ މަސައްކަތްތަކުގައި މަމްދޫހުގެ އަނބިމީހާ ޝަހުދާ އިސްކޮށް ހަރަކާތްތެރިވެފައިވާކަން ފާހަގަކޮށްލެވެ އެވެ.
މީސްމީޑިއާގައި މި ތުހުމަތުތައް ކުރެވެމުން ދިއުމާއި އެކު މައުލޫމާތު ސާފުކުރުމަށް ސައީދު އަށް ތަކުރާރުކޮށް ރާއްޖެ އެމްވީ އިން ގުޅި ނަމަ ވެސް އޭނާ ފޯނަށް ޖަވާބެއް ދެއްވާފައެއް ނުވެއެވެ. އަދި މިކަމާއި ގުޅޭ ގޮތުން މީސްމީޑިއާގައި ކުރާ ކޮމެންޓްތަކާއި ގުޅިގެން ކޮމެންޓެއް ކުރައްވާފަ އެއް ވެސް ނުވެ އެވެ.
ކޭޕާކް މައްސަލައިގައި މަންޑޭ ގެ މައްޗަށް 397 އަހަރުގެ ޖަލު ހުކުމެއް އިއްވާފައިވާއިރު، އެ ޚިޔާނާތުން މާލީ މަންފާ ލިބުނު އެހެން ފަރާތްތަކަށް ފިޔަވަޅު ނާޅާތީ އާންމުން ދަނީ ކަންބޮޑުވުން ފާޅުކުރަމުންނެވެ. ސައިދު އަށް މިފަދަ ތުހުމަތުތަކެއް ކުރެވިފައިވާއިރު، ޕީއެންސީގެ މޭޔަރު ކެންޑިޑޭޓް މޫސާ އަލީ ޖަލީލަށް ވެސް މި ޚިޔާނާތުގެ ފައިސާ ލިބިފައިވާ ކަމަށް މަމްދޫހުގެ އާއިލާއާ ހަވާލާދީ ސޯޝަލް މީޑިއާގައި ބުނެފައި ވެއެވެ. އެ މަސްދަރުތަކުން ބުނާ ގޮތުގައި، އޭނާއަށް އެ ފައިސާ ދީފައިވަނީ ވަރަށް މުހިންމު ބޭނުމަކު އެހީތެރިކަމަށް އެދުމުންނެވެ. ނަމަވެސް، މި ތުހުމަތުތަކާ ގުޅިގެން ރަސްމީ ސިފައެއްގައި ކަމާ ގުޅުންހުރި ފަރާތަކުން އަދި ވަކި އެއްޗެއް ހާމަކޮށްފައެއް ނުވެއެވެ.