ހުޅުމާލެ ދެވަނަ ފިޔަވަހީގެ ހިޔާ ފްލެޓުގެ 5 ވަނަ ޓަވަރުގައި ހުކުރު ދުވަހުގެ ރޭ ހިނގި އަލިފާނުގެ ހާދިސާއާ ގުޅިގެން އިމާރާތުގެ މައި ފާހާނާ ހޮޅިއަށް ބޮޑެތި ގެއްލުންތަކެއް ވެއްޖެ އެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އިން ބުނީ މި ހާދިސާގެ ސަބަބުން އިމާރާތުގެ މައި ފާހާނާ ހޮޅިއަށް ބޮޑެތި ގެއްލުންތަކެއް ލިބިފައިވާ ކަމަށެވެ. މި ގެއްލުންތަކާ ގުޅިގެން އެ ޓަވަރުގެ ބައެއް އެޕާޓްމަންޓުތަކުގެ ފާހާނާ ބޭނުން ނުކުރެވޭ ކަމަށް އިންސިޑެންޓް ކޮމާންޑަރު މައުލޫމާތު ދެއްވާފައިވާ ކަމަށް އެ އޮތޯރިޓީ އިން ބުންޏެވެ.
މި ހާދިސާއާ ގުޅިގެން ލިބުނު ގެއްލުންތައް ދެނެގަނެ މަރާމާތުގެ މަސައްކަތްތައް އަވަސް ކުރުމަށްޓަކައި އެންޑީއެމްއޭ އިން އިތުރުން އެމްއެންޑީއެފް އާއި ދިވެހި ފުލުހުންގެ ޚިދުމަތާއި އެޗްޑީސީ އާއި އެމް.ޑަބްލިއު.އެސް.ސީ އަދި ސްޓެލްކޯ އިން ގުޅިގެން މަސައްކަތް ކުރަމުންދާ ކަމަށް އެންޑީއެމްއޭ އިން ބުންޏެވެ.
ހިޔާ ފްލެޓުގެ 5 ވަނަ ޓަވަރުގައި އަލިފާނުގެ ހާދިސާ ހިނގާފައިވަނީ ހުކުރު ދުވަހުގެ ރޭ ހަތެއް ޖަހާކަށްހާ އިރު އެވެ.
ހިޔާ 5 ވަނަ ޓަވަރުގައި އަލިފާނުގެ ހާދިސާއެއް ހިނގައިފި
މި ހާދިސާގައި އެއްވެސް މީހަކަށް ޖިސްމާނީ އަނިޔާ އެއް ލިބުނު ކަމުގެ ރިޕޯޓެއް އަދި ލިބިފައެއް ނުވެ އެވެ. ނަމަވެސް އިމާރާތުގެ މައި ފާހާނާ ހޮޅިއަށް ލިބިފައިވާ ގެއްލުންތަކުގެ ސަބަބުން އެ ޓަވަރުގައި ދިރިއުޅޭ އާއިލާތަކަށް ވަނީ ބޮޑެތި ދަތިތަކެއް ކުރިމަތިވެފަ އެވެ.
ފާހާނާ ހޮޅިއަށް ލިބިފައިވާ ގެއްލުންތައް މަރާމާތު ކުރުމުގެ މަސައްކަތް އަވަސް ކުރުމަށް އިދާރާތަކުން މަސައްކަތް ކުރަމުންދާއިރު، މަރާމާތުގެ މަސައްކަތް ނިންމާލެވޭނެ ވަގުތެއް އަދި އިއުލާން ކޮށްފައެއް ނުވެ އެވެ.