ކުރިއަށް އޮތް ލޯކަލް ކައުންސިލް އިންތިޚާބަށް ރައްޔިތުންނާ މަޝްވަރާ ކޮށްގެން ވަރަށް ފުރިހަމަ މެނިފެސްޓޯއެއް އާއްމު ކުރުމުގެ މަސައްކަތް ކުރަމުންދާ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ، އެމްޑީޕީން ލޯކަލް ކައުންސިލް އިންތިޚާބަށް ވަރަށް ފުރިހަމައަށް ތައްޔާރު ވަމުންދާ ކަމަށާއި، ފޯމް ހުށަހެޅުމުގެ މަސައްކަތް ކުރަމުންދާ ކަމަށެވެ.
ވަހީދު ވިދާޅުވީ އިންތިޚާބަށް ފެނިފެސްޓޯ އެކުލަވާލުމުގެ މަސައްކަތް ކުރަމުންދާ ކަމަށާއި، އެ މަސައްކަތް ކުރަމުންދަނީ ރައްޔިތުންގެ ހިޔާލާއި، މަޝްވަރާގެ ދަށުން ކަމަށެވެ. އަދި ރައްޔިތުން ބޭނުންވާ ފަދަ މެނިފެސްޓޯއެއް އާއްމު ކުރާނެ ކަމަށް އޭނާ ވިދާޅުވި އެވެ.
މީގެ އިތުރުން ވަހީދު ވިދާޅުވީ އެމްޑީޕީގެ ޓިކެޓުގައި ކައުންސިލް އިންތިޚާބުގައި ވާދަ ކުރާ ހުރިހާ ކެންޑިޑޭޓުންނަކީ ވެސް ލާމަރުކަޒީ ނިޒާމު ދަންނަ ފަރިތަ ބަޔަކަށް ވާނެ ކަމަށާއި، ކެންޑިޑޭޓުންނަށް ދޭން ޖެހޭ ތަމްރީނުތައް ދެމުންދާ ކަމަށެވެ.
މި އިންތިޚާބުގައި ވާދަކުރާ ކެންޑިޑޭޓުންނަކީ ލާމަރުކަޒީ ނިޒާމަށް ފަރިތަ ލާމަރުކަޒީ ނިޒާމު ދަންނަ، ލާމަރުކަޒީ ނިޒާމުގައި އެބަހުރާ ހަމަތަކުގެ މަތީން ކައުންސިލްގެ މަސްއޫލިއްޔަތު އަދާކުރެވޭނެ ފަރާތްތަކެއްގެ ގޮތުގައި ހެދުމަށްޓަކައި މަސައްކަތް ކުރަމުން. ރާއްޖޭގެ ހުރިހާ ކަންކޮޅުތަކެއްގައި މިއިންތިޚާބުގައި ކުރިމަތިލާ ކެންޑިޑޭޓުންނާ އަދި އެއާއެކުގައި މިއިންތިޚާބުގައި ވާދަކުރާ ހުރިހާ ފަރާތްތަކެއްގެ ކެންޕޭން ޓީމްތަކަށް ވެސް އަޅުގަނޑުމެން މިދަނީ އެބޭފުޅުންނަށް ބޭނުންވާ ތަމްރީން ދެމުން.އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު
ވަހީދު ވިދާޅުވީ އެމްޑީޕީ އަކީ އަބަދުވެސް އިންތިޚާބުތަކަށް ފަރިތަ ޕާޓީއެއް ކަމަށާއި، އިންތިޚާބުތަކަށް ކުރިމަތިލާނީ ވަރަށް ފުރިހަމަ އަށް ތައްޔާރު ވެގެން ކަމަށެވެ.
މި އިންތިޚާބުގައި އެމްޑީޕީން ނުކުންނަނީ ސިޔާސީ ނުފޫޒުން ކައުންސިލްތައް ހިމާޔަތް ކުރުމަށްކަން ފާހަގަކުރައްވައި ވަހީދު ވިދާޅުވީ ރައީސް ޑރ.މުހައްމަދު މުއިއްޒުގެ ސަރުކާރާއެކު، ކައުންސިލްތަކުގެ ބާރު ހަނި ކޮށްފައިވާ ކަަމަށެވެ. އަދި ރައްޔިތުން މަޖިލީހުގެ މެޖޯރިޓީ ވެސް ޕީއެންސީއަށް ދިނުމުން، މިއަދު މަޖިލީހުގައި ރައްޔިތުންގެ ބާރު ނެތް ކަމަށް ވަހީދު ވިދާޅުވި އެވެ.
އެހެންކަމުން ކުރިއަށް އޮތް ލޯކަލް ކައުންސިލް އިންތިޚާބުގައި ޕީއެންސީގެ ކެންޑިޑޭޓުންނަށް ނޫނެކޭ ބުނެ، އެމްޑީޕީގެ ކެންޑިޑޭޓުންނަށް ވޯޓު ދިނުމަށް އޭނާ ގޮވާލެއްވި އެވެ.