އަނިޔާވެރިވުމަކީ ނާއިންސާފުން ނުޙައްގުން ކަންކަން
ކުރުމެވެ. އިސްލާމީ ޝަރީޢަތާއި، ސަމާވީ އެހެނިހެން ޝަރީއަތްތަކުގައި ވެސް
އަނިޔާވެރިވުން ވަނީ ޙަރާމް ކުރައްވާފަ އެވެ. އަދި ހަމައެހެންމެ ވަޟަޢީ އެންމެހާ
ފަލްސަފާތަކުގައި ވެސް އަނިޔާވެރިވުން ވަނީ ޙަރާމް ކުރައްވާފަ އެވެ.
އަނިޔާވެރިވުން ވަނީ ޙަރާމް ކަމެއް ކަން އިލާހީ
ޤާނޫނާއި ކީރިތި ރަސޫލާގެ އަގުމާތް ސުންނަތުން ވެސް ކަށަވަރުވެފަ އެވެ.
ރިވާހުލް މުސްލިމްގައި ވެއެވެ.
"އޭ ތިމަން ރަސްކަލާނގެ އަޅުތަކުންނޭ އެވެ!
ތިމަން ރަސްކަލާނގެ ވަނީ ތިމަން ރަސްކަލާނގެ ޒާތުފުޅުގެ މައްޗަށް އަނިޔާވެރިވުން ޙަރާމް
ކުރައްވާފަ އެވެ. އަދި ތިޔަބައި މީހުން އެއްބަޔަކު އަނެއްބަޔަކާ މެދު ތިޔަބައި
މީހުން އަނިޔާވެރިވުމަކީ ވެސް ތިމަން ރަސްކަލާނގެ ޙަރާމް ކުރައްވާފައިވާ ކަމެކެވެ.
ފަހެ ތިޔަބައި މީހުން އަނިޔާވެރި ނުވާށެވެ"
އަޅުގަނޑުމެންގެ މާތްވެގެންވާ އިސްލާމްދީނުގައި
ޢަދުލުވެރިވުމަށާއި، ޢަދުލުވެރިކަން ދެމެހެއްޓުމަށް ވަނީ ވަރަށް ބޮޑަށް ބާރު
އަޅުއްވާފަ އެވެ. އިސްލާމް ދީނަކީ އެއްވެސް ތަފާތު ކުރުމެއްނެތި އެކަލާނގެ ޙަލްގު
ކުރެއްވި އެންމެހާ މަޚްލޫގުންނަށް ޢަދުލުވެރިކަން ގާއިމުކޮށް ރައްކާތެރިކަން ހޯދާ
ދީފައިވާ ދީނެވެ. އަދި އެހެންމެ އެއްވެސް ހާލެއްގައި އަނިޔާވެރިވުން ވަނީ ޙަރާމް
ކުރައްވާފަ އެވެ.
މިއަދު މިކުޑަ ކުޑަ އިސްލާމީ މުޖުތަމައުގައި އެކި
ގޮތްގޮތަށް އަނިޔާވެރިކަން ފެތުރެމުން މިދަނީ ބިރުވެރިވާހާ މިންވަރަށެވެ.
ފިތުނަވެރި ކަމާ ހަސަދަވެރިކަން އާއްމުވެފައިވަނީ ކަންބޮޑުވާ މިންވަރަށެވެ.
ބާރުވެރިކަމާ ޢިއްޒަތާ ޝަރަފަކީ އެކަލާނގެ މިންވަރު
ކުރައްވާ އަޅަކަށް ހުވަފެނީ ކަމެއް ކަމަށް ޔަގީން ނުކުރެއްވުމަކީ ކިހާ ޣާފިލް
ކަމެއްތޯ އެވެ. މިދުނިޔެ އަކީ ކެހިވެރި ވަގުތީ ދުނިޔެ އެއް ކަން ޔަގީން ކަމާ އެކު ޤަބޫލު
ނުކުރެއްވި ތަކައްބުރުކަމާ އެކު ނުރުހޭ މީހާ އަށް އެކި ގޮތް ގޮތުން
އަނިޔާވެރިވަމުންދާ ސަގާފަތަކީ ޒަމާނުއްސުރެ މި މުޖުތަމަޢުގާ އާލާވަމުންދާ ވަރަށް
ވެސް ބިރުވެރި ސަގާފަތެއްކަން ފާހަގަ ކުރަނީ ހިތާމަޔާއެކު ގައެވެ. ނިކަން ވިސްނާ
ފިކުރު ކުރައްވާށެވެ.
ކީރިތި ޤުރުއާން ގެ ސޫރަތުލް ހަދީދްގެ ފަހު
އާޔަތުގައި ﷲ ވަޙީ ކުރައްވަނީ ﴿20﴾ وَمَا الْحَيَاةُ الدُّنْيَا إِلَّا
مَتَاعُ الْغُرُورِ
މާނައަކީ "ކެހިވެރިކަމުގެ ވަގުތީ އުފަލެއްދޭ އެއްޗެއް
ކަމުގައި މެނުވީ ދުނިޔޭގެ ދިރިއުޅުން ނުވެތެވެ."
ހަމައެހެންމެ ސޫރަތުލް ރަހުމާންގެ 26 އަދި 27 ވަނަ
އާޔާތުގައި މާތްﷲ ވަހީ ކުރައްވާފައިވެ އެވެ.
﴿26﴾ كُلُّ مَنْ عَلَيْهَا فَانٍ "އެ ބިންމަތީގައިވާ ކޮންމެ އެއްޗަކީ، ފަނާވެދަނިވި
އެއްޗެކެވެ."
﴿27﴾ وَيَبْقَىٰ وَجْهُ رَبِّكَ ذُو الْجَلَالِ وَالْإِكْرَامِ "އަދި ކަލޭގެފާނުގެ ވެރި، ކީރިތިވަންތަކަމާއި،
މާތްވަންތަކަމުގެ ވެރިރަސްކަލާނގެ ذات ފުޅު ދެމިވޮޑިގެންވެއެވެ."
މިކާއިނާތުގެ ވެރިރައްބުގެ މި މާތް ބަސްފުޅުތަކަށް
ގޮންޖައްސަވާ ހާސް އަހަރަށް ބާރުވެރިކަމުގައި މި ދުނިޔެ މަތީގައި ތިބެވޭނެ ކަމަށް ދެކި
މާއްދީ ވަގުތީ ލައްޒަތަށްޓަކައި ބާރުވެރިކަމެއް ލިބޭ މަދު ވަގުތުކޮޅު ޙަސަދަވެރިކަމާއެކު
ނުރުހޭ ވަކި މީހަކަށް އަނިޔާވެރިވުމަށް އަވަސްވެގަތުމަކީ ކިހާ ބިރުވެރިކަމެއްތޯ
އެވެ. ޙަރާމް ކުރެއްވި އަނިޔާވެރިކަން ދެމެހެއްޓުމީ ކިހާ އަބާއްޖަވެރި ކަމެއްތޯ އެވެ.
އަނިޔާވެރިންނަށް މަހުޝަރު ދުވަހު ލިބިގެންދާނެ ވޭން
ދެނިވި ޢަޒާބުގެ ބިރުވެރިކަން އިޙުސާސްކޮށްލައްވާށެވެ. ކީރިތި ގުރުއާނުގެ ސޫރަތުލް
ޣާފިރުގެ 17 ވަނަ އާޔަތުގައި މާތްﷲ ވަހީ ކުރައްވާފައިވެ އެވެ.
﴿17﴾ الْيَوْمَ تُجْزَىٰ كُلُّ نَفْسٍ بِمَا كَسَبَتْ ۚ لَا ظُلْمَ
الْيَوْمَ ۚ إِنَّ اللَّهَ سَرِيعُ الْحِسَابِ
"މިއަދު (އެބަހީ: قيامة ދުވަހު) ކޮންމެ نفس އަކަށްމެ، އެنفس އެއް ހޯދިކަމެއްގެ ޖަޒާދެއްވާނެތެވެ.
މިއަދު އެއްވެސް ބޭއިންސާފެއް ނެތެވެ. ހަމަކަށަވަރުން اللَّه އީ حساب ބެއްލެވުން އަވަސްވެވޮޑިގެންވާ ރަސްކަލާނގެ އެވެ."
ސޫރަތުލް ޣާފިރުގެ 18 ވަނަ އާޔަތުގައި މާތްﷲ ވަހީ
ކުރައްވާފައިވެ އެވެ.
﴿18﴾ وَأَنذِرْهُمْ يَوْمَ الْآزِفَةِ إِذِ الْقُلُوبُ لَدَى الْحَنَاجِرِ
كَاظِمِينَ ۚ مَا لِلظَّالِمِينَ مِنْ حَمِيمٍ وَلَا شَفِيعٍ يُطَاعُ
"ކައިރިވަމުންއަންނަ ދުވަހާމެދު، ކަލޭގެފާނު އެއުރެންނަށް
إنذار ކުރައްވާށެވެ! މޮޅިޔާއި، ހިތާމައިން ފުރިގެންވާ
حال، ހިތްތައް ކަރުތެރެޔަށް އަރައިގެން އަންނަހިނދެވެ.
(އެދުވަހުން) އަނިޔާވެރިންނަކަށް رحمة ތެރިޔަކު ނުވަތަ ކިޔަމަންގަނެވޭ شفاعة ތެރިޔަކުވެސް ނުވެ އެވެ."
ސޫރަތުލް އަންބިޔާގެ 46 ވަނަ އާޔަތުގައި މާތްﷲ ވަހީ
ކުރައްވާފައި ވެއެވެ.
﴿46﴾ وَلَئِن مَّسَّتْهُمْ نَفْحَةٌ مِّنْ عَذَابِ رَبِّكَ لَيَقُولُنَّ
يَا وَيْلَنَا إِنَّا كُنَّا ظَالِمِينَ
ކަލޭގެފާނުގެ ވެރިރަސްކަލާނގެ عذاب ން ކިތަންމެ ކުޑަ މިންވަރެއް އެއުރެންގައި ބީހުނަސް، ހަމަކަށަވަރުން،
އެއުރެން ބުނާނެތެވެ. އޭ ތިމަންމެންނަށްހުރި ހަލާކެއްގެ ބޮޑުކަމާއެވެ! ހަމަކަށަވަރުން،
ތިމަންމެން އަނިޔާވެރިން ކަމުގައިވީމު އެވެ.
ސޫރަތުލް ޣާފިރުގެ 52 ވަނަ އާޔަތުގައި މާތްﷲ ވަހީ
ކުރައްވާފައި ވެއެވެ.
﴿52﴾ يَوْمَ لَا يَنفَعُ الظَّالِمِينَ مَعْذِرَتُهُمْ ۖ وَلَهُمُ
اللَّعْنَةُ وَلَهُمْ سُوءُ الدَّارِ
(އެއީ) އަނިޔާވެރިންނަށް އެއުރެންގެ عذر ދެއްކުން މަންފާއެއް ނުކުރާނޭ ދުވަހެވެ. އަދި އެއުރެންނަށް
ހުރީ لعنة އެވެ. އަދި އެއުރެންނަށްހުރީ ނުބައިވެގެންވާ
ގޮވައްޗެވެ.
ވަގުތީ ބާރުވެރިކަން ހޯދުމަށްޓަކައި ތިމާމެންގެ
ނެތް ތެދުވެރިކަމަކާއި ނެތް އިޚުލާސްތެރި ނިޔަތެއް އަދި ރައްޔިތުންގެ މެދުގައި ނެތް
ލޯތްބެއް ގަދަ ބާރުން ހޯދުމަށްޓަކައި މަހުޝަރު ދުވަހަކީ އަންނާނެ ދުވަހެއް ކަމަށް
ނުދެކި އަދި އެދުވަހުގެ ބިރުވެރި ނުބައި ރޭވުންތައްރާވާ މުވައްސަސާތައް ނަހަމަ
ގޮތުގައި ބޭނުން ކޮށް ޝަރުޢީ ނިޒާމް ވެސް ގަޑުބަޑުކޮށްގެން ނުހައްގުން
އަނިޔާ ދިނުމުގެ އާޚިރު ނަތީޖާ އަކީ އެފަދަ ފާސިގުން ދެ ދުނިޔޭގަ ވެސް ބޭޒާރުވެ
ތިމާގެ މުޅި ހަޔާތް ޚަރާބުގެ މަގުން ޙަލާކުވެގެން ދިއުން އިބުރަތަކަށް
ނުފުދޭތޯ އެވެ.
އަޅުގަނޑު މިއަދު ހުރަގޭގެ ތޭރިތަކުގައި އިހުސާސް
ކުރަމުން މިދަނީ އެފަދަ ލާ އިންސާނީ ބިރުވެރި އަނިޔާތަކެއްގެ ދިރިހުރި މިސާލެކެވެ.
ނުޙައްގުން ހަރާމް އަނިޔާވެރި ހުކުމެއް ކޮށް ލޯބިވާ އާއިލާ އާ އެކަހެރިކޮށް
އިސްލާމް ދީނުގެ މާތް އަޅުކަންތައް އެންމެ ފުރިހަމަ ގޮތުގައި ކުރުމަށް މަހުރޫމްކޮށް
އަދި ދުވަހުން ދުވަހަށް ބޭނުންވާ ޒަރޫރީ ކަންކަމުން ވެސް އެއްކިބާކޮށް ހުރަގޭގެ
ތޭރިތަކުގެ ޝިކާރައަކަށް މިވީ ސިޔާސީ ބައެއް އަނިޔާވެރިންގެ ނުކުޅެދޭ ބޯދާ ސިޔާސަތެއްގެ ސަބަބުން ކަން މިއަދު ހާމަވެގެންދެ އެވެ.
މޮޅިވެރިކަމާ ހިތްދަތި ކަންމަތީ އިންސާފުގެ
ތަރާދަށް އިންތިޒާރު ކުރަމުންދާއިރު ހިތައް ކުރެވޭ އިހުސާސްތައް ވަރަށް ވެސް ގިނަވެފައި
ހިތާމަވެރި އެވެ. މި ދުނިޔޭގެ އެއްވެސް ކަމެއް ތާ އަބަދުމެ އެއްގޮތަކަށް ނޯންނާނެ
ކަމާ އިރާދަ ކުރެއްވިއްޔާ ﷲގެ ތަނަވަސް ރަހުމަތާއެކު މި ދުވަސް ނިމި މާ އުޖާލާ
މާދަމާ އެއް ﷲ މިންވަރު ކުރައްވާނެ ކަމުގެ ފުރިހަމަ ޔަގީންކަމާ އެކު ދުވަސްތައް ގުނަމެވެ.
މިދުވަސްވެސް މާޒީ ވެދާނެ އެވެ. ވާދަވެރިންނަށް
ހަޖަމް ނުވުން ކިހާ ޖާހިލު ތޯއެވެ. ވަރަށް ފުންކޮށް ވިސްނާ ޖާހިލު އަނިޔާވެރި
ވިސްނުން ދޫކޮށް ހެޔޮ އަމަލުތައް ކުރުމަށް އަވަސްވެގަތުން ކިހާ ބުއްދިވެރިތޯ އެވެ.
ތައުބާ ވެގަތުން އަވަސްކޮށް މަހުޝަރު ދުވަހަށް ތައްޔާރުވެލައްވާށެވެ.
ސޫރަތުލް އާލް އިމްރާންގެ 185 ވަނަ އާޔަތުގައި މާތްﷲ
ވަހީ ކުރައްވާފައިވެ އެވެ.
﴿185﴾ كُلُّ نَفْسٍ ذَائِقَةُ الْمَوْتِ ۗ وَإِنَّمَا تُوَفَّوْنَ
أُجُورَكُمْ يَوْمَ الْقِيَامَةِ ۖ فَمَن زُحْزِحَ عَنِ النَّارِ وَأُدْخِلَ
الْجَنَّةَ فَقَدْ فَازَ ۗ وَمَا الْحَيَاةُ الدُّنْيَا إِلَّا مَتَاعُ الْغُرُورِ
މާނައީ؛ "ކޮންމެ نفس އަކީވެސް، މަރުގެ ރަހަ ލިބިގަންނާނޭ އެއްޗެކެވެ. އަދި، (ތިޔަބައިމީހުން
ކުޅަ عمل ތަކަށް) ތިޔަބައިމީހުންނަށް ފުރިހަމަޔަށް
ޖަޒާ ދެއްވާނެކަން ކަށަވަރީ، قيامة ދުވަހުންނެވެ. ފަހެ، ނަރަކައިން އެއްކިބާކުރައްވައި، ސުވަރުގެޔަށް ވެއްދެވި މީހާ
(ދަންނާށެވެ!) ފަހެ، އެމީހަކު نصيب ލިބިގެންފިކަން ކަށަވަރެވެ. ކެހިވެރިކަމުގެ ވަގުތީ އުފަލެއް ދޭ އެއްޗެއްކަމުގައި
މެނުވީ، ދުނިޔޭގެ ދިރިއުޅުން ނުވެ އެވެ."