ހުޅުމާލޭ ގައި އަލަށް ހުޅުވި ޝަހީދު އަލީ ސްކޫލް ގެ ދަރިވަރުންގެ 77 އިން ސައްތަ އަކީ ރާއްޖޭގެ އަތޮޅުތައް ތަމްސީލު ކުރާ ދަރިވަރުންކަން ފަޚުރުވެރިކަމާ އެކު އެޑިއުކޭޝަން މިނިސްޓަރު ޑރ. އިސްމާއީލު ޝަފީއު ފާހަގަ ކުރައްވައިފި އެވެ.
ތައުލީމީ އައު އަހަރު ފެށުނު ދުވަހު އެ ސްކޫލް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ވަރަށް ހިނުތުންވެ ހުންނަވާ އެޑިއުކޭޝަން މިނިސްޓަރު ވިދާޅުވީ، ސްކޫލަށް މިހާރުވެސް 2000ށް ވުރެ ގިނަ ކުދިން އެންރޯލް ވެއްޖެ ކަމަށާއި އޭގެ ތެެރެއިން 77 އިން ސައްތަ ދަރިވަރުންނަކީ އަތޮޅު ތެރޭގެ ރަށްތަކަށް ނިސްބަތްވާ ދަރިވަރުން ކަމަށެވެ.
"އިއްޔެ ނިމިގެން ދިޔަ އިރުގައި، 2100 އާ ކައިރިވެއްޖެ، އެ 2100 ދަރިވަރުންގެ ތެރެއިން، 77 އިން ސައްތަ ދަރިވަރުންނަކީ، އަތޮޅު ތެރޭގެ ރަށްތަކަށް ނިސްބަތްވާ ދަރިވަރުން، އެހެންވީމާ އަޅުގަނޑު ދަންނަވާލަން ބޭނުންވަނީ، މާލޭގައި މި ސްކޫލް ގާއިމުވެފައި އޮތަސް، ހުޅުމާލޭގެ ދެވަނަ ފިޔަވަހީގައި މި ސްކޫލް ގާއިވެފައި ހުރި ކަމުގައި ވިޔަސް، މި ސްކޫލަކީ މުޅި ދިވެހިރާއްޖޭގެ ހުރިހާ ރަށްތައް ޝާމިލު ކުރާ ސްކޫލެއްގެ ގޮތުގައޭ އޮންނާނީ،" މިނިސްޓަރު ވިދާޅުވި އެވެ.
ލާމަރުކަޒީ ނިޒާމުން ރާއްޖެ ހިންގަންވާނެ ކަމަށް ގާނޫނު އަސާސީ ގައި ކަނޑައެޅިފައިވިޔަސް، ސަރުކާރުން ގެންދަނީ މާލެ އަށް ރާއްޖޭގެ އާބާދީ ތޮއްޖެއްސުމަށް އެކި ގޮތް ގޮތުން މަސައްކަތް ކުރަމުންކަން ފާހަގަ ކުރެވެއެވެ. ރާއްޖޭގެ ރަށްތަކުން މާލެ އަށް ދަރިވަރުންނާ އެކު އާއިލާތައް ހިޖުރަ ކުރަމުން ދަނީ ދިރިއުޅޭ ރަށްރަށުގައި ހުރިހާ ގްރޭޑް ތަކެއް ނެތުމާއި، ރަނގަޅު ޓީޗަރުން ނެތުމާއި، ވަސީލަތްތައް މަދުވުމުން ކަމަށް ބެލެނިވެރިން ބުނެ އެވެ. ބައެއް ރަށްރަށުގައި އެންމެ އަސާސީ ތައުލީމުގެ ހަރުފަތް ކަމުގައިވާ ޕްރީ ސްކޫލުގެ ޚިދުމަތް ވެސް ދެވެމުން ނުދާކަން ފާހަގަ ކުރެވެ އެވެ.
ދެ އަހަރު ދުވަހުގެ ތެރޭގައި މަސައްކަތް ނިންމާ ޝަހީދު އަލީ ސްކޫލު ހުޅުވި ކަމަށް އެޑިއުކޭޝަން މިނިސްޓަރު ވިދާޅުވި އިރު ރަށްރަށުގައި އެތައް އަހަރެއްވެ ދިގުލައިގެން ގޮސްފައިވާ މަސައްކަތްތައް ނުނިމި ހުރިކަން ވެސް ރަށްރަށުގެ ކައުންސިލުތަކުން އަންނަނީ ފާހަގަ ކުރަމުންނެވެ.
މިނިސްޓަރު އިތުރަަށް ފާހަގަ ކުރެއްވި ގޮތުގައި އަތޮޅު ތެރޭގެ 77 އިންސައްތަ ނިސްބަތްވާ ދަރިވަރުންގެ އަދަދަކީ އެއީ ވަރަށް ބޮޑު އަދަދެއް ކަމަށެވެ.
އަލަށް ހުޅުވި މި ސްކޫލު އަކީ އޭސީ ކުރެވިފައިވާ 54 ކްލާސްރޫމާއި، މަލްޓިޕާޕަސް ހޯލެއްގެ އިތުރުން ޒަމާނީ އެކި ވަސީލަތްތަކުން ފުރިހަމަވެފައިވާ ތަނެކެވެ. މި ސްކޫލާއެކު ހުޅުމާލޭގައި ދިރިއުޅޭ ރައްޔިތުންނަށް ތައުލީމީ ފުރުސަތުތައް ވަރަށް ބޮޑަށް ފުޅާވެ، ފަހިވެގެންދާނެ ކަމަށް ސަރުކާރުން ބުނެ އެވެ.