އަންނަ އަންގާރަ ދުވަހު ދިރާސީ އައު އަހަރުގެ ކިޔެވުން ފެށެމަށް ތައްޔާރުވަމުން އަންނައިރު ބައެއް ގްރޭޑު ތަކުގެ ދަރިވަރުންނަށް ޓެކްސްޓް ފޮތްތައް ހަމަނުވާތި ބެލެނިވެރިން ކަންބޮޑުވުން ފާޅުކުރަން ފަށައިފި އެވެ.
އަތޮޅު ތެރެއާއި މާލެގެ ސްކޫލުތަކުގައި ކިޔަވާ ދަރިވަރުންނަށް ފޮތް ލިސްޓަށް ފޮތް ހަމަނުވާ މައްސަލަ ފާހަގަ ކުރެވިފައިވާއިރު، ބައެއް ދަރިވަރުންނަށް ދިވެހި އިސްލާމް ފޮތް ނުލިބޭ ކަމަށް ބައެއް ބެލެނިވެރިން ފާހަގަކުރެ އެވެ.
މިކަމާ ގުޅޭގޮތުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ރާއްޖެ އެމްވީ އަށް ވިދާޅުވީ، ކިޔެވުން ފެށުމުގެ ކުރިން ފޮތް ހަމަވާނެ ކަމަށާއި، ގާތްގަނޑަކަށް ހުރިހާ ސުކޫލުތަކަށް ފޮތް ޑިސްޕެޗް ކުރެވިފައިވާ ކަމަށެވެ. އަދި މާލެ އޭރިއާ އަށް އަދިވެސް ކުދިން ކިޔެވުން ބަދަލުކުރަމުން އަންނަކަން ފާހަގަކުރައްވާ މިނިސްޓަރު ވިދާޅުވީ މާލެ އޭރިއާ އަށްވެސް މިއަދު ހުރިހާ ފޮތެއް ފޮނުވާ ނިމޭނެ ކަމަށެވެ،
ފޮތް ހަމަވާނެ، ކިޔެވުމަށް އަސަރުކުރާ ކަމެއް ދިމާނުވާނެ.އެޑިއުކޭޝަން މިނިސްޓަރު ޑރ. އިސްމާއީލް ޝަފީއު
ދައުލަތުގެ މީޑިއާއަށް ދެއްވި އިންޓަވިއުއެއްގައި މީގެ ކުރިން މިނިސްޓަރު ވިދާޅުވެފައިވަނީ ފޮތްތައް ފޯރުކޮށްދިނުމުގައި ބައެއް ދަތިތައް ކުރިމަތިވެފައިވާ ކަމަށެވެ. އަދި މާލޭގެ އުތުރު ބަނދަރު ސަރަހައްދުގައި ކުރިއަށްދާ މަސައްކަތްތަކުގެ ސަބަބުން، އަތޮޅުތަކަށް ފޮތް ފޮނުވުމަށް ބޯޓުތަކަށް ތަކެތި ބަރުކުރުމުގައި ވެސް ދަތިތަކެއް ހުރިކަން ވަޒީރު ފާހަގަކުރެއްވި އެވެ. އޭގެ އިތުރުން މިނިސްޓަރު އޭރު ވިދާޅުވީ، މީގެ ކުރިން ފޮތްތައް ތަރުތީބު ކުރަމުން އައީ އަރަބިއްޔާ ސުކޫލުގައި ކަމަށްވީ ނަމަވެސް މިހާރު އެ މަސައްކަތް އަމީނިއްޔާ ސްކޫލަށް ބަދަލުކުރުމުން ޖާގައިގެ ދަތިކަން ކުރިމަތިވެފައިވާ ކަމަށެވެ. ސްކޫލްތަކުގެ ކިޔެވުން ފެށުމުގެ ކުރިން ހުރިހާ ދަރިވަރުންނަށް ބޭނުންވާ ފޮތްތައް ހަމައަށް ލިބޭނެ ކަމުގެ ސައްތައިން ސައްތަ ޔަގީންކަން މިނިސްޓަރު ވަނީ މީގެ ކުރިން ދެއްވާފަ އެވެ.
ފާހަގަކޮށްލެވޭ ގޮތުގައި، ދަރިވަރުން މިހާރު ތިބީ، ބޮޑު ޗުއްޓީގަ އެވެ. ދިރާސީ އަހަރުގެ ކިޔެވުން ފެށޭނީ، މި މަހު 27 ވާ އަންގާރަ ދުވަހު ކަމަށްވާއިރު، ޓީޗަރުން މި މަހު 25ގައި ސުކޫލުތަކަށް ވަނީ ނިކުމެފަ އެވެ.