ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ''ޕަރސަނަލިޓީ'' އެއްކޮށް ސްޕްލިޓް ވެފައި ކަމަށާއި، އެއްވެސް އިހުލާސްތެރިކަމެއް އެމަނިކުފާނުގެ ކިބައިން ނުފެންނަ ކަމަށް ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު މީކާއީލް ވިދާޅުވީ، ރައީސް މުއިއްޒު ރިޔާސީ އިންތިޚާބުގެ ކެންޕޭން ތެރޭގައި ވަރަށް ބޮޑަށް ކުރީގެ ރައީސް އިބްރާހިމް މުހައްމަދު ސޯލިހާއި، އެސަރުކާރުގެ ބޭފުޅުންނަށް ފާޑު ވިދާޅުވި ކަމަށެވެ. ކަނޑުފަޅުން ގޯތިދޭ ކަމަށާއި، ނުފެންނަ އެއްޗެއް ރައްޔިތުންނަށް ދެމުންދާތީ އެކަމަށް ޖޯކު ޖަހާފައިވާ ކަމަށެވެ.
ނަމަވެސް މިސަރުކާރަށް ދެއަހަރަށް ވުރެ ގިނަ ދުވަސްވެގެން ދިޔައިރު ރައްޔިތުންނަށް ދޫކުރާ ގޯއްޗާއި، ފްލެޓް ފެންނަން ނެތް ކަމަށް އޭނާ ވިދާޅުވި އެވެ. ރައީސް މުއިއްޒަށް އިޝާރާތް ކުރައްވައި މެންބަރު މީކާއީލް ވިދާޅުވީ ނުކުރައްވާނެ ކަމަށް ވިދާޅުވި ހުރިހާ ކަމެއް ކުރައްވަމުން ގެންދަވާ ކަމަށާއި، އެމަނިކުފާނުގެ މުޅި ޕަރސަނަލިޓީ އެއްކޮށް ސްޕްލިޓް ވެފައިވާ ކަމަށެވެ.
އެހެންކަމުން ރައީސް މުއިއްޒާއި، މިސަރުކާރުގެ އިހްލާސްތެރިކަމާ މެދު ސުވާލު އުފެދޭ ކަމަށް އޭނާ ވިދާޅުވި އެވެ.
މިހާރު މި އިއުލާން ކުރެއްވި ބިންތައް ކޮބައިތޯ. މިހާރު މިއިއުލާން ކުރެއްވި ފްލެޓުތައް ކޮބައިތޯ އެނގޭތޯ. މިއީ ހަމަ އެ ކެންޑީޑޭޓުތޯ. ހަމަ އެ ރައީސް ޑރ.މުހައްމަދު މުއިއްޒު ތޯ. އަޅުގަނޑަށް ހިޔެއް ނުވޭ. މުޅި މީހާ ބަދަލު ވެއްޖެ އެނގޭތޯ. އައިޑެންޓިޓީ އޮޅިއްޖެ. މުޅި ޕާސަނަލިޓީ ސްޕްލިޓް ވެއްޖެ. މުޅިން އެހެން މީހެއް މިއީ މިހާރު. މުޅިން އެހެން ޕާސަނަލިޓީއެއް ގޮތަށް މިހާރު ފެންނަނީ. މިބޭފުޅާ ކަން ކުރައްވަނީ ކުރިން ނުކުރައްވާނެ ކަމަށް ކުރިން ރައީސް ސޯލިހު ކަންކުރެއްވީ ގޯސްކޮށް ކަމަށް އެންމެ ބޮޑަށް ފާޑު ވިދާޅުވި ކަންކަން އަމިއްލަ ފުޅަށް ކުރައްވަނީ އެނގޭތޯ. އެެހެންވީމަ އަޅުގަނޑުމެންނަށް ކުރިއަށް އޮތްތަނުގައި ވެސް އަމަލު ކުރަައްވާނެ ގޮތަކާ މެދު އެއްވެސް އިހުލާސްތެރިކަމެއް ނުފެނޭ.ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް
މި ސަރުކާރުގެ "އެންމެންނަށް ބޯހިޔާވަހިކަން" ސިޔާސަތުގެ ދަށުން މާލޭ ސަރަހައްދުން ފުލެޓާއި ގޯއްޗަށް އެދުމުގެ ފުރުސަތު ހުޅުލާފައިވާތީ އެކަމަށް އިޝާރާތް ކުރައްވައި މެންބަރު މީކާއީލް ވިދާޅުވީ އޭގެ އުސޫލަކީ ބޮޑު ޖޯކެއް ކަމަށާއި، ދެ އަހަރަށް ވުރެ ގިނަ ދުވަހު މަސައްކަތް ކުރުމަށްފަހު އާއްމުކުރި އުސޫލު ދެކޮޅު ނުޖެހޭ ކަމަށެވެ. އެއީ ޕީއެންސީ ޖަގަހާގެ ތެރޭގައި އެކްޓިވިސްޓުން މަސައްކަތް ކުރުމުން ނުކުންނާނެ ނަތީޖާ ކަމަށް އޭނާ ވިދާޅުވި އެވެ.
މީގެ އިތުރުން މެންބަރު މީކާއީލް ވިދާޅުވީ މިދުވަސްވަރު ބޯހިޔާވަހިކަމުގެ އަޑުތައް ގަދަވެފައިވަނީ ކުރިއަށް ލޯކަލް ކައުންސިލް އިންތިޚާބާ ގުޅިގެން ކަމަށާއި، މިއީ ރައްޔިތުންގެ ލޮލުގައި އަޅުވާ އަނދުނެއް ކަމަށެވެ.