ނ.ހެނބަދޫ ކުޑަކުދިންގެ ޕާކު އިމާރާތްކުރުމަށް ބިން ހަވާލުކުރިތާ 9 މަސް ދުވަސް ވީ އިރު ވެސް މަސައްކަތެއް ނުކުރާކަން ހާމަވެއްޖެ އެވެ.
ހެނބަނދޫ ކައުންސިލް ގެ ރައީސް ހުސެއިން އަބޫބަކުރު ރާއްޖެ އެމްވީ އަށް ވިދާޅުވީ 2025 ވަނަ އަހަރުގެ ޖުލައި 21 ވަނަ ދުވަހު އެ ތަނުގެ ބިންގާ އަޅާފައިވާ ކަމަށެވެ. އެ ތަނުގެ ބިންގާ އެޅީ ރައީސް ޑރ.މުހައްމަދު މުއިއްޒު އެ ރަށަށް ކުރެއްވި ދަތުފުޅެއްގެ ތެރެއިން ކަމަށް އޭނާ ވިދާޅުވި އެވެ. ނ.ހެނބަދޫ ކުޑަކުދިންގެ ޕާކު ގެ މަސައްކަތް ހަވާލުކޮށްފައި ވަނީ ފެނަކަ އާއި އެވެ.
"ކުރަން ބޭނުން ނަމަ ހިއެއް ނުވޭ ފެނަކަ އާއި މި މަސައްކަތް ހަވާލު ކުރީ. ފެނަކަ އާއި ހަވާލު ކުރީމަ މިހެން މި ވަނީ ވެސް. މަސައްކަތަށް ގެނައި ގާ ކޮޅު ވެސް މިތާ މި ހުރީ." އޭނާ ވިދާޅުވި އެވެ.
މި ސަރަހައްދަކީ ކުޑަކުދިން ގެ ޕާކު ކައުންސިލަށް ދޭ ގްރާންޓުގެ އެހީގައި އެޅުމަށް ކުރިން ހަމަޖެހިފައި އޮތް ތަނެކެވެ. ކައުންސިލުން ވަނީ އެކަމާއި ގުޅުން ހުރި ކުރެހުންތައް ވެސް ކުރިން ކުރަހާފަ އެވެ.
މި ތަނުގެ މަސައްކަތް ސަރުކާރާއި ހަވާލު ކުރީ ސަރުކާރުން އެ މަސައްކަތް ކުރަން ބޭނުން ވެގެންނެވެ. ކައުންސިލްގެ ރައީސް ވިދާޅުވީ އެ ޕާކަށް ބޭނުންވާ ކުޅޭ ސާމާނު ވެސް ކައުންސިލްގައި އެބަ ހުރި ކަމަށެވެ. އެހެންކަމުން ސަރުކާރަށް އެ މަސައްކަތް ނެގުމުން ގެއްލުންވީ އާއްމުންނަށް ކަމަށް އޭނާ ވިދާޅުވި އެވެ.