މާލެ ސިޓީގެ ގޭގޭ ގައި ހުރި ނައްތާލަން ބޭނުންވާ، ބާވެ ނުވަތަ ހަލާކުވެފައިވާ މުޞްޙަފް ތަކާއި ކީރިތި ޤުރުއާނުގެ އާޔަތް ތަކާއި ކީރިތި ރަސޫލާގެ (صلى الله عليه وسلم) ޙަދީޘްތައް ލިޔެފައި ހުންނަ ފޮތްތަކާއި ލިޔުންތައް ނައްތާލުމަށް، މާލޭ ސިޓީ ކައުންސިލާ ހަވާލުކުރަން ހުޅުވާލައިފި އެވެ.
ބާ މުސްހަފް ނައްތާލުމުގެ ޕްރޮގްރާމެއް މާލެ ސިޓީ ކައުންސިލުން ފެށީ މދިޔަ އަހަރުގެ ތެރޭގަ އެވެ. މި ހަރަކާތުގައި މަންފާ ޖަމިއްޔާ އާއި، އީގަލްސް ކޮމިއުނިޓީ، މާލެ ސިޓީ ކައުންސިލް، ވެމްލޯ އަދި ފުލުހުން ބައިވެރިވާކަމަށް ކައުންސިލުން ވަނީ ބުނެފަ އެވެ.
ސިޓީ ކައުންސިލުން ބުރާސްފަތި ދުވަހު ކުރި އިއުލާނެއްގައި ބުނީ ނައްތާލަން ބޭނުންވާ މުސްހަފުތަކާއި ގުރުއާނުގެ އާޔަތް ނުވަތަ ހަދީޘް ހިމެނޭ އެފަދަ ދީނީ ފޮތްތަކާއި ލިޔުންތައް އެ ކައުންސިލާ ހަވާލުކުރެވޭނެ އިންތިޒާމު މިހާރު ހަމަޖައްސާފައިވާ ކަމަށެވެ.
އެ ތަކެތި އަންނަ ހޮނިހިރު ދުވަހުން ފެށިގެން މި މަހުގެ 29 ގެ ނިޔަލަށް، ކޮންމެ ދުވަހެއްގެ ހެނދުނު 9:00 އިން މެންދުރު 12:00 އަށް، މެންދުރު ފަހު 1:00 އިން ހަވީރު 5:00 އަށް ބަލައިގަންނާނެ ކަމަށް ސިޓީ ކައުންސިލުން ބުންޏެވެ.
އެގޮތުން ތަކެތި ބަލައިގަންނަ ތަންތަނަކީ މާލެ އިން ނަމަ ސިނަމާލެ ތިނެއްގެ ގޯތިތެރެ އެވެ. ވިލިމާލެ އިން ނަމަ މާލޭ ސިޓީ ކައުންސިލް އިދާރާގެ ވިލިމާލެ ސެކްޝަން އަދި ހުޅުމާލޭގެ މާލޭ ސިޓީ ކައުންސިލް އިދާރާގެ އޮފީހުން ހޮނިހިރު ދުވަހުން ފެށިގެން މިތަކެތި ބަލައިގަންނާނެ ކަމަށް ސިޓީ ކައުންސިލުން ބުނެ އެވެ.
ސިޓީ ކައުންސިލުން ބުނީ އެ އިދާރާއިން ބަލައިގަންނާނީ ގޭގެއިން ގެންދާ، ނައްތާލަން ބޭނުންވާ، ބާވެ ނުވަތަ ހަލާކުވެފައިވާ މި ފަދަ ތަކެތި އެކަނި ކަމަށެވެ.