މާލެ ސިޓީ މޭޔަރު ކަމަށް ވާދަ ކުރުމުގެ ކުރިން ފުރަތަމަ އިމްތިހާނުން ޕީއެންސީ ގެ ކެންޑިޑޭޓު މޫސާ އަލީ ޖަލީލު ފެއިލް ވެއްޖެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްއިން ބޭއްވި އެ ޕާޓީގެ ފޮރޮންޓް އޮފީސް ޖަލްސާގައި ރައީސް ޔާމީން ވިދާޅުވީ، މިއީ މޫސާ ޖަލީލަށް ކުރިމަތިވި ފުރަތަމަ އިމްތިހާނު ކަމަށާއި، މަގާމަށް އިންތިހާބުވުމުގެ ކުރިން އޭނާ އެވަނީ އެ އިމްތިހާނުން ފެއިލްވެފައި ކަމަށެވެ. އަދި މުޅި ރާއްޖޭގައި އެންމެ ބާރަށް ދެކެވޭ ވާހަކަ އަކީ މުޢިއްޒު މޭޔަރަކަށް ހުންނަވައިގެން ހިންގާފައިހުރި ކޮރަޕްޝަންތަކުގެ ވާހަކަ ކަމަށާއި އެވާހަކަ ދެކެވެމުން ދަނިކޮށް މާލޭގެ ރައްޔިތުންނަށް ހިދުމަތް ކުރުމުގައި މޫސާ ޖަލީލު ހުންނަވާނީ ރައީސް މުއިއްޒު ގެ ފިޔަވަޅުމަތީގައި ކަމަށް ވިދާޅުވުމުން ރައްޔިތުން ފުންކޮށް ވިސްނަން ޖެހޭ ކަމަށް ޔާމީން ވިދާޅުވި އެވެ.
ޔާމީން ވިދާޅުވީ ރައްޔިތުންގެ ހައްގަށް އުނިކަމެއް ނާންނަގޮތަށް ކަމަކާ ކުރިމަތިލާން ވާނީ ގާނޫނަށް ތަބާވާ ތެދު ގަބޫލުކުރާ އަދި ހަގީގަތް ގަބޫލުކުރާ މީހެއް ކަމަށެވެ.
މިދެންނެވި ހުރިހާ ހަގީގަތްތައް ފަސްޖެހި ނިމުނީ، ވަޅުޖެހި ނިމުނީ. އެއީ މިހާރު ވެރިއަކަށް ހުންނެވި ބޭފުޅަކަށް ސަނާ ކިޔާ ސަޖިދަ ޖަހާ ހިސާބަށް ދިޔާމަ މިކަން ވާނެ ގޮތް މިީ އިނގޭތޯ. ދެން އެވަރު މީހަކު މޭޔަރަކަށް އައިއްސަ މާލޭގަ އަނެއްކަ ރައްޔިތުންނަށް އެބުނާ ގޮތަށް ހިދުމަތް ކުރެވިދާނެހޭ. އަޅުގަނޑުގެ ފޮތުގަ އޭނާ އަކަށް އެކަމެއް ނުވާނެ. އެއީ އޭނަ ނަފްސަކަށް އޭނަ އިތުބާރެއް ނުކުރޭ، ތެދުބަހުން ވާހަކަ ދައްކާކަށް ބޭނުމެއް ނުވޭ.ކުރީގެ ރައީސް އަބްދުﷲ ޔާމީން
މީގެ އިތުރުން ރައީސް ޔާމީން ވިދާޅުވީ ތިން ހަތަރު އޮފީހުގެ ކަންކަމާ ބެހޭ ލިޔުންތަކާ މާލޭ މީހުންގެ ޝަހުސީ މައުލޫމާތާއި، ގޯތިގެދޮރާ ގުޅޭ ލިޔެކިޔުންތައް ކަނޑައެޅިގެން އަންދާލާފައިވާ ކަމަށެވެ. މިފަދަ ބޮޑެތި ޖަރީމާތައް ހިންގާފައިވާ ކަމަށް ތުހުމަތު ކުރެވޭއިރު، އެކަންކަމުގެ ތެދުދޮގު ބަލަން ބޭނުންނުވުމަކީ މޫސާ ޖަލީލު އަމިއްލަ ނަފްސަށް އިތުބާރު ނުކުރާކަމުގެ ހެއްކެއް ކަމަށްވެސް ވެސް ޔާމީން ވިދާޅުވި އެވެ.
ފާހަގަކޮށްލެވޭ ގޮތުގައި އެމްއެމްޕީއާރުސީ ގެ ޚިޔާނާތުގެ ފައިސާ ލިބުނި މީހުންގެ ލިސްޓްގައި، މާލެ ސިޓީގެ މޭޔަރު ކަމަށް ސަރުކާރު ހިންގާ ޕީއެންސީ ޓިކެޓުގައި ވާދަކުރާ ކުރީގެ ޗީފް އޮފް ޑިފެންސް ފޯސް އަދި ކުރީގެ ޑިފެންސް މިނިސްޓަރު މޫސާ އަލީ ޖަލީލުގެ ނަން ހިމެނޭ ކަން ކުރިން ވަނީ ހާމަވެފަ އެވެ.
އެ މައްސަލަ 2023 ވަނަ އަހަރު މޫސާ އަލީ ޖަލީލްގެ މައްޗަށް ދައުވާކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓަރ ޖެނަރަލްގެ އޮފީހަށް ވެސް އޭރު ފޮނުވި އެވެ.