މޯލްޑިވްސް ޖާނަލިސްޓު އެސޯސިއޭޝަން ގެ ރައީސް އަހުމަދު ނާއިފް އަށް ފޭސްބުކް މެދުވެރިކޮށް މަރުގެ އިންޒާރު ދީފި އެވެ.
"ހުސެއިން މެސީ" ގެ ނަމުގައި ހިންގާ ފޭސްބުކް އެކައުންޓަކުން ނާއިފް އަށް އިންޒާރުދީ ބުނެފައި ވަނީ ކ. ގުރައިދޫ އަށް އަރައިފި ނަމަ، ވަކިވަކި ކޮށްލައިގެން ވިއްކާލާނެ ކަމަށެވެ.
މިކަމާ ގުޅިގެން ރާއްޖެ އެމްވީ އަށް މައުލޫމާތު ދެއްވަމުން ނާއިފް ވިދާޅުވީ މިފަހަރު އިންޒާރުގެ މެސެޖުތައް އަންނަން ފެށީ ސިވިލް ސާވިސް މުވައްޒަފުންގެ ހެދުން އެޅުމުގެ މިންގަނޑާ ގުޅޭ ގޮތުން ޕޮޑްކާސްޓެއްގައި ދެއްކި ވާހަކަ އާއި ސިޓީ ހޮޓާތަކުން ވެސް ވަކި ހުއްދައެއް ނަގައިގެން ފަތުރުވެރިންނަށް ބަނގުރާ ވިއްކޭ ގޮތް ހަދަންޖެހޭ ކަމަށް ބުނެ ފާޅުކުރި ހިޔާލަކާ ގުޅިގެން ކަމަށެވެ.
މަރުގެ އިންޒާރުދީ ފޭސްބުކް މެސެންޖާ އިން ނާއިފް އަށް ފޮނުވި މެސެޖުގެ ސްކްރީންޝޮޓް އެއް
މީގެ ކުރިންވެސް އެކިފަހަރު މަތިން ނާއިފް އަށް މަރުގެ އިންޒާރު ދީފައިވާކަން ފާހަގަކޮށް އޭނާ ވިދާޅުވީ މިހާރުވެސް އެކި އެކައުންޓްތަކުން ތަކުރާރުކޮށް އިންޒާރުގެ މެސެޖުތައް ލިބެމުންދާ ކަމަށެވެ. އެންމެ ކަންބޮޑުވާކަމަކީ މިކަން ކުރާ ބަޔަކު ފުލުހުންނަށް ނުހޯދެތީ ކަމަށް ނާއިފް ވިދާޅުވި އެވެ.
އޭގެ ސަބަބެއް ކަމަށް ބޭލެވެނީ އިންޒާރު ދިނުމުގެ މިފަދަ އަމަލުތަކަށް ހިތްވަރު ދިނުމުގައި ސަރުކާރުގެ ސޯޝަލްމީޑިއާ އެކްޓިވިސްޓުން ހަރަކާތްތެރިވުން ކަމުގައި ނާއިފް ވިދާޅުވި އެވެ. އިންޒާރުދޭ މީހުން ފުލުހުންނަށް ހޯދިދާނެ ކަމުގެ އެއްވެސް އުއްމީދެއް ނެތަސް، މިފަހަރު ވެސް އޭނާ އަށް މަރުގެ އިންޒާރު ދިން މައްސަލަ ފުލުހަށް ހުށަހަޅާފައިވާ ކަމަށް ނާއިފް ވިދާޅުވި އެވެ.
އެހެން އެ ވަނީ ސަރުކާރުގެ ސޯޝަލްމީޑިއާ އެކްޓިވިސްޓުން މިކަލަ ކަންކަމަށް ހިތްވަރުދޭތީ. 3 ފަހަރު މައްސަލަ ހުށަހަޅައިގެން ވެސް އަދި މީހަކު ހައްޔަރެއް ނުކުރޭ، އިންޒާރުދޭ ބަޔަކު ނުހޯދޭ. ޓެކްސްޓް މެސެޖުން އިންޒާރު ދިން ފަހަރު މެސެޖު ކުރި ނަމްބަރު ވެސް ފުލުހުންނަށް ދިނިން އެފަހަރުވެސް ކާކުކަން ނުހޯދުނު. ވަރަށް ކަންބޮޑުވާ ކަމެއް މިއީ. އެއްވެސް އުއްމީދެއް ނެތަސް، ފުލުހުންނަށް މައްސަލަ ހުށަހަޅައިފިން މިފަހަރު ވެސްމޯލްޑިވްސް ޖާނަލިސްޓު އެސޯސިއޭޝަން ގެ ރައީސް އަހުމަދު ނާއިފް
ދައުރު ނޫހުގެ އެޑިޓަރެއްގެ ގޮތުގައި ވެސް ހަރަކާތްތެރިވާ ނާއިފް އަށް މީގެ ކުރިން ވެސް ވަނީ ދެ ފަހަރަކު މަރުގެ އިންޒާރު ދީފަ އެވެ. 2023 ވަނަ އަހަރު ދައުރު ނޫހުގައި ޝާއިއުކުރި ރިޕޯޓަކާ ގުޅިގެން އޭނާ އަށް މަރުގެ އިންޒާރު ދިނެވެ. އެ މައްސަލަ އޭރު މަޖިލީހަށް ވެސް ހުށަހެޅި އެވެ. ނަމަވެސް އެ އިންޒާރު ދިނީ ކާކުކަން ހޯދުމަށް ފުލުހުން ނުކުޅެދި އެންމެ ފަހުން މައްސަލައިގެ ތަހުގީގު ވަނީ ހުއްޓާލާފަ އެވެ.
އޭގެ ފަހުން މީޑިއާ ކޮންޓްރޯލް ކުރާ ގާނޫނާ ދެކޮޅަށް ނޫސްވެރިން މުޒާހަރާ ކުރި ދުވަސްވަރު ވެސް ނާއިފް އަށް މަރުގެ އިންޒާރު ދިނެވެ. އެ މައްސަލަ ވެސް ފުލުހުންނަށް ހުށަހެޅުމުން ވެސް މިއަދާ ހަމައަށް އެއްވެސް މީހަކަށް ފިޔަވަޅެއް އަޅާފައެއް ނުވެ އެވެ.
ނޫސްވެރިންނަށް އަމާޒުކޮށް މަރުގެ އިންޒާރު ދިނުމުގެ މައްސަލަތައް އިތުރުވަމުންދާއިރު، މިފަދަ މައްސަލަތައް ތަހުގީގުކޮށް ފިޔަވަޅު އެޅުމުގައި ފުލުހުން ކުރިއަށްދާ ގޮތާމެދު ގިނަ ބަޔަކު ދަނީ ސުވާލު އުފައްދަމުންނެވެ. މިފަދަ އިންޒާރުތައް ދިނުމަށްފަހު މީގެ ކުރިން ރާއްޖޭގައި ނޫސްވެރިންނަށް ބޮޑެތި އަނިޔާ ދިނުމާއި، ފުރާނަ ދުއްވާލުމުގެ ލާއިންސާނީ އަމަލުތައް ވެސް ވަނީ ހިންގާ ފައެވެ.