މިދިޔަ އަހަރު މަސްދަޅު ބަހަން ސަރުކާރުން ކުރި ޚަރަދުތަކުގެ މައުލޫމާތު ސާފުކޮށް ނުދީ، މި އަހަރު ވެސް ސަރުކާރުގެ ފަރާތުން ގޭބީސީތަކަށް މަސްދަޅު ބަހަން ފަށަން ތައްޔާރުވެއްޖެ އެވެ.
2025 ވަނަ އަަހަރުގެ ބަޖެޓުގައިވާ މާއުލޫމާތުން ހާމަވަނީ ސްޓޭޕަލް ފުޑް ސަބްސިޑީގެ ދަށުން މިފްކޯއިން ދޫކުރާ މަސްދަޅު އަގުހެޔޮ ކުރުމަށް ސަރުކާރުން 111 މިލިއަނަށްވުރެ ގިނަ ރުފިޔާ ހަރަދުކުރި ކަމަށެވެ. މިއީ ސަރުކާރުން ކުރިން ހާމަ ކުރި އަދަދަށްވުރެ 30 މިލިއަން ރުފިޔާ އިތުރު އަދަދެކެވެ.
މި ހިސާބުތަކަށް ބާލާއިރު މަސްދަޅު ކޭހަކަށް ޖެހެނީ މާކެޓް ރޭޓަށް ވުރެ 34 އިންސައްތަ ބޮޑުކޮށް، 1005 ރުފިޔާއަށެވެ. މިއީ ސަރުކާރުން އެގެ ކުރިން ހާމަކުރި އަދަދަށްވުރެ ވަރަށް ބޮޑަށް ތަފާތު އަދަދެކެވެ. މި 30 މިލިއަން ރުފިޔާގެ ތަފާތު ކޮބައިތޯ ސުވާލު އުފެދުނު ނަމަވެސް މިއަދާއި ހަމައަށް ވެސް އެ އަދަދުތަކާއި މެދު ސަރުކާރުން އެއްވެސް ތަފްސީލެއް ހިއްސާކޮށްފަ އެއް ނުވެ އެވެ. އެހެންކަމުން މަސްދަޅު ކޭސް ބެހުމުގެ ނަމުގައި ބޮޑު ޚިޔާނާތެއް ވެފައިވަ ކަމަށް ބައެއް އާއްމުން ތުުހުމަތުކުރެ އެވެ.
އެ ކަންބޮޑުވުންތަކަށް ބެލުމެއް ނެތި، ކުރިއަށް އޮތް ރޯދަ މަހަށް ގޭބިސީތަކަށް ސަރުކާރުން ދޭ މަސްދަޅު ކޭސްތައް އަންނަ ހޮނިހިރު ދުވަހު މާލެ ސަރަހައްދުގައި ބަހަން ފަށާނެ ކަަމަށް ސަރުކާރުން ވަނީ ހާމަކޮށްފަ އެވެ.
ސަރުކާރުން ބުނެފައިވާ ގޮތުގައި މަސްދަޅު ކޭސް ބަހަން ފެށުމުގެ ކުރިން ޓޯކަން ނަގަން ޖެހޭނެ އެވެ. އަދި ޓޯކަން އަށް ރަޖިސްޓްރީ ވުމުގެ ފުރުސަތު މިހާރު ވަނީ ހުޅުވަލާފަ އެވެ. ރޯދަ ހަދިޔާގެ ޓޯކަންއަށް އެދޭނީroadhahadhiya.mvއިންނެވެ.
މަސްދަޅު ދޫކުރަން ހަމަޖެހިފައި ވަނީ މާލޭގައި މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލް، ހެންވޭރު ބޯޅަދަނޑު އަދި ގަލޮޅު ދަނޑުގަ އެވެ. ހުޅުމާލެ- ފޭސް 1 ގައި އުމަރު ޒާހިރު ބިލްޑިންގް، ޕޮލްކޯ ޓަވަރު ތިރީގައި އަދި މުހައްމަދު ގާސިމް ޕްރީސްކޫލް ގައި މަސްދަޅު ބަހާ އިރު ހުޅުމާލެ ފޭސް 2 ގައި ކާމިލުދީދީ ސްކޫލް، ހިޔާޓަވަރު 10 އަދި ވިނަރެސް ފްލެޓް ގައި މި މަސައްކަތް ކުރިއަށް ދާނެ އެވެ. ވިލިމާލޭގައި މަސްދަޅު ބަހާނީ ވެމްކޯ ސައިޓްގަ އެވެ.
މަސްދަޅު ކޭސް ދޫކުރާނީ ހުކުރު ދުވަސް ފިޔަވައި އެހެން ދުވަސްތަކުގެ ރޭގަނޑު 8:30 އިން 11:00 އަށެވެ.
ސަރުކާރަށް އެއް އަހަރު ފުރުމުގެ މުނާސަބަތުގައި ނޮވެމްބަރު 17، 2024 ގައި ސޯޝަލް ސެންޓަރުގައި ބޭއްވި ޖަލްސާއެއްގައި ރައީސް މުއިއްޒު އިއުލާނުކުރެއްވީ "ރޯދަ ހަދިޔާ" ގެ ގޮތުގައި ކޮންމެ ގޭބިސީއަކަށް މަސްދަޅު ކޭހެއް ބަހާނެ ކަމަށެވެ. މި އިއުލާނާ އެކު ރައްޔިތުން ފާރަވެރިވި ކަންކަމުގެ ތެރޭގައި މަސްދަޅު ހުންނާނެ ގޮތާއި، މަސްދަޅުގެ ލޭބަލްގައި ރައީސް މުއިއްޒު އެންމެ ބޮޑަށް ޕްރޮމޯޓު ކުރެވޭނެ ގޮތް ހަދައި، މިކަމަށް ދާނެ ހަރަދާއި، މަސްދަޅުތައް ބަހާނެ ގޮތް ހިމެނެއެވެ. ނަމަވެސް އެ އަދަތުތަކާއި ބަޖެޓުގައި ހިމެނޭ އަދަދުތަކާއި ދިމާ ނުވާ އިރު އެކަމަށް ސަރުކާރުން ޖަވާބުދާރީ ވެފަ އެއް ނުވެ އެވެ.