އަތޮޅުތެރޭގެ ރަށްރަށުގެ ސްކޫލުތަކުން 1500ށް ވުރެ ގިނަ ދަރިވަރުން މާލޭގެ ސްކޫލުތަކަށް ބަދަލުވެފައިވާ ކަމަށް އެޑިޔުކޭޝަން މިނިސްޓްރީން ބުނެފި އެވެ.
މިއަހަރުގެ ދިރާސީ އައު އަހަރުގެ ކިޔެވުން ފެށުމަށް ވަމުންދާ ތައްޔާރީތަކާ ގުޅޭގޮތުން މިނިސްޓްރީން ބުނީ، މިއަހަރުގެ ދިރާސީ އަހަރަށް ގްރޭޑް 1ށް 4790 ދަރިވަރުން ވައްދާފައިވާ ކަމަށެވެ. އޭގެ ތެރޭގައި ހިމެނެނީ މާލެ ސަރަހައްދުގެ ސްކޫލުތަކަށް ވެއްދި 1748 ދަރިވަރުންނާއި އަތޮޅުތަކުން އަލަށް ގްރޭޑް އެކަކަށް ވެއްދި 3042 ދަރިވަރުންނެވެ.
މިނިސްޓްރީން ބުނީ، މިއަހަރު އަތޮޅުތަކުން މާލޭގެ ސްކޫލްތަކަށް 1530 ދަރިވަރަކު ބަދަލުވެފައިވާ ކަމަށާއި، މާލެއިން ހުޅުމާލޭގެ ސްކޫލްތަކަށް 836 ދަރިވަރުން ބަދަލުވެފައިވާ ކަމަށެވެ.
ސްކޫލުތަކުގެ ތައްޔާރީތަކާ ގުޅޭގޮތުން އެޑިޔުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ މިއަހަރުގެ ދިރާސީ އަހަރުގެ ކިޔެވުން ފެށުމަށް ވަރަށް ފުރިހަމައަށް ތައްޔާރު ވަމުންދާ ކަމަށާއި، ސްކޫލްތައް ހުޅުވޭއިރު ޓީޗަރުންނާއި ފޮތްތައް ހަމަވާނެ ކަމަށެވެ. ނަމަވެސް އަދިވެސް ސްކޫލު ފޮތްތައް ނުލިބޭކަމުގެ ޝަކުވާ ބައެއް ބެލެނިވެރިން ދަނީ ކުރަމުންނެވެ.
މީގެ އިތުރުން ކުރީ ސަރުކާރުގައި ދޫކުރި ގެދޮރުވެރިޔާ ފްލެޓުތަކާ ގުޅިގެން މިއަހަރު ގިނަ އާއިލާތަކުން ހުޅުމާލެއަށް ދިރިއުޅުން ބަދަލު ކުރާނެ އެވެ. އެއާއެކު ހުޅުމާލޭގެ ސްކޫލުތަކަށް ވަނީ ޑިމާންޑް ބޮޑުވެފަ އެވެ. އަދި ހުޅުމާލޭގެ ސްކޫލުތަކުން ޖާގަ ހޯދުމަށް ދަތިވެފައިވާ ކަމަށާއި، ސިޔާސީ ގޮތުން ނުރަނގަޅު ނުފޫޒެއް ފޯރުވާގެން ނޫން ގޮތަކަށް ޖާގަ ނުލިބޭ ކަމަށް ވެސް ބައެއް ބެލެނިވެރިން ތުހުމަތު ކޮށްފައިވެ އެވެ.
އެކަޑަމިކް ކަލަންޑަރުގައިވާ ގޮތުން ސްކޫލްތަކުގެ ކިޔެވުން ފެށޭނީ 27 ޖެނުއަރީ 2026 ގަ އެވެ. މި އަހަރުގެ ފުރަތަމަ ޓާމްގެ މިޑް ބްރޭކް ލިބޭނީ 24 މެއި 2026ން 30 މެއި 2026ށެވެ. އަދި ފުރަތަމަ ޓާމްގެ ކިޔެވުން ނިންމައި ޗުއްޓީ ލިބޭނީ 17 ޖުލައި 2026ން 1 އޯގަސްޓް 2026ށެވެ. މީގެ އިތުރުން ބޮޑު ޗުއްޓީ ލިބޭނީ 18 ޑިސެމްބަރު 2026ން 12 ޖެނުއަރީ 2027 ށެވެ.