ސަރުކާރުން ދޫކުރާ ލޯނާއި ސްކޮލާޝިޕްގައި ރާއްޖެ އިން ބޭރުގައި ކިޔަވާ ދަރިވަރުންނަށް ދޫކުރާ ސްޓައިޕެންޑްތައް މުރާޖައާކުރުމުގެ މަސައްކަތް ފަށާފައިވާ ކަމަށް ރައީސް ޑރ.މުހައްމަދު މުއިއްޒު ގެ ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
ހައިދަރު އެފަދައިން ވިދާޅުވީ ސަރުކާރުން ކުރިއަށް ގެންދާ "ތަރުޖަމާނާ އެކު" ޕްރޮގްރާމްގައި ވާހަކަދައްކަވަމުންނެވެ.
އެ ޕްރޮގްރާމްގައި ވާހަކަދައްކަވަމުން ހައިދަރު ވަނީ ބޭރުގައި ކިޔަވާ ރާއްޖޭގެ ދަރިވަރުންނަށް ގަވައިދުން ފައިސާ ނުލިބޭތީ އެ ޝަކުވާ ކުރާ ކަމަށް ވިދާޅުވެފަ އެވެ. އަދި ފައިސާ ދޫކުރަން ހަމަޖެހިފައިވާ މުއްދަތަށް ވުރެ ދެ މަސް ކުރިން އެ މަސައްކަތް ފެއްޓެވި ކަމަށް އޭނާ ވަނީ ވިދާޅުވެފަ އެވެ.
އެހެން ނަމަވެސް އަށް ހަފުތާ ވަންދެން ދަރިވަރުންނަށް ފައިސާ ނުފޮނުވި ވާ ކަމަށް އެ މަނިކުފާނު އިއުތިރާފްވެ ވަޑައިގަތެވެ. އެކަން އެހެންވީ ބައެއް މައްސަލަތައް ދިމާވެގެން ކަމަށް ހައިދަރު ވަނީ ވިދާޅުވެފަ އެވެ. ސްޓައިޕެންޑް މުރާޖައާ ކުރަނީ އެކި ޤައުމުތަކަށް ސްޓައިޕެންޑް ކަނޑާއަޅާފައިވާ މިންވަރު ތަފާތުވުމުން ކަމަށް ވެސް ހައިދަރު ވިދާޅުވި އެވެ.
"ސްޓައިޕެންޑްގެ މުރާޖައާ ކުރަން އަޅުގަނޑުމެން އެބަ ފަށަން. މިހާރު ހަތް ވަރަކަށް އަހަރު ވެއްޖެ ގާތްގަނޑަކަށް އެއް ސްޓައިޕެންޑެއް ބޭނުންކުރާތާ. ދިރިއުޅުމުގެ ހަރަދުތައް ކޮންމެ ގައުމެއްގައި މި ދަނީ އިތުރުވަމުން. އެހެންވީމާ މުރާާޖައާކުރުމުގެ މަރުހަލާއެއް މި އަހަރު ތެރޭ ފަށައިފިން." މިނިސްޓަރު ވިދާޅުވި އެވެ.
މިނިސްޓަރ މިފަދައިން ވިދާޅުވެފައިވާ އިރު ބޭރުގައި ކިޔަވާ ދަރިވަރުންނަށް ދިމާވާ ދަތިތައް ބޮޑުވެ ތަކުރާރުކޮށް އެ ޝަކުވާތައް ވަޒީރަށް ދަނީ ހުށަހަޅަމުންނެވެ. އަދި ޝަކުވާތައް ބޮޑުވެ އެކަމާއި ގުޅިގެން އެކުލަވާލި ރިޕޯޓެއް ވެސް ވަޒީރާއި ހިއްސާކޮށްފައި ވެ އެވެ. މިނިސްޓްރީ އިން ޖަވާބުދާރީ ނުވުމާއި ދަރިވަރުންގެ ފޯނުކޯލަށް ޖަވާބު ނުދިނުމަކީ ވެސް ދަރިވަރުންގެ ބޮޑު ޝަކުވާއެކެވެ.