ސ. ހުޅުދޫ ގައި ރައީސް ޑރ. މުހައްމަދު މުއިއްޒުގެ ސެކިއުރިޓީ އަށް އެމްއެންޑީއެފް އިން ކުއްޔަށް ނަގައިގެން ދުއްވި ވެހިކަލް އަކުން ޖެހި ނުރައްކާތެރި އެކްސިޑެންޓެއްވި މައްސަލައާ ގުޅިގެން ކާރުގެ ވެރިފަރާތުން ސޯޝަލް މީޑިއާގައި ޖެހި ޕޯސްޓު ނަގަން އަންގައިފި އެވެ.
މި މަހުގެ 5 ވަނަ ދުވަހުގެ މެންދުރު ފަހުގެ ވަގުތެއްގައި ހިނގި މި އެކްސިޑެންޓާ ގުޅިގެން ދެމަފިރި އަކަށް ވަނީ އަނިޔާ ވެސް ވެފަ އެވެ. މި ހާދިސާއާ ދެ ކާރަށް ވެސް ވަނީ ބޮޑެތި ގެއްލުން ތަކެއް ލިބިފަ އެވެ.
އެމްއެންޑީއެފް އިން ކުއްޔަށް ނަގައިގެން ދުއްވި ކާރު އެކްސިޑެންޓްވެ، ކާރު ހަދަން އެމެއެންޑީއެފް އިން ފައިސާ ނުދިން މައްސަލަ އެއް ފެންމަތިވީ އޭގެ 20 ދުވަސް ފަހުން މި މަހުގެ 25 ވަނަ ދުވަހުގަ އެވެ.
ރައީސްގެ ސެކިއުރިޓީ އިން ކުއްޔަށް ނަގައިގެން ދުއްވި ކާރުގެ ވެރި ފަރާތް، އަހުމަދު ވަސީމް ވަނީ ސޯޝަލް މީޑިއާގައި މިކަމުގެ ކަންބޮޑުވުން ފާޅު ކޮށް، ކަން ހިނގައިދިޔަ ގޮތް ހިއްސާ ކޮށްފަ އެވެ. އޭނާ ކުރި ޕޯސްޓުގައި ބުނީ ރައީސްގެ ސެކިއުރިޓީ އަށް އެމްއެންޑީއެފް އިން ކުއްޔަށް ގެންދިޔައީ އޭނާގެ ކާރު ކަމަށާ އެ އެކްސިޑެންޓު ވުމުން ކާރު ހަދަން ބޭނުންވާ ފައިސާ ދޭނެ ކަމަށް ބުނެ މޮޅު ވާހަަކަތަކެއް އެމްއެންޑީއެފް އިން ދެއްކި ކަމަށެވެ.
އެމްއެންޑީއެފް ގެ ޓީމު އެ ރަށުން ފުރައިގެން ދިޔަތާ އެތައް ދުވަހެއް މިހާރު ފާއިތުވެފައިވާ ކަން ފާހަގަކޮށް އެ ޕޯސްޓުގައި ބުނީ ކާރު ހަދަން ދާ ޚަރަށް ވާ ފައިސާ އެނގޭނެ ހެން ގަރާޖުން ދީފައިވާ ކޯޓޭޝަން ވެސް އެ ކާރު ދުއްވަން އިން އެމްއެންޑީއެފް އޮފިސަރަށް ފޮނުވާފައިވާ ކަމަށެވެ.
އޭގެ ފަހުން ކާރު ހެދުމަށް އެއްވެސް މަސައްކަތެއް ކުރަން ކާރު ދުއްވި އޮފިސަރު ވެސް އެމްއެންޑީއެފް ގެ އެހެން ބޭފުޅަކު ވެސް އެއްބާރު ލުން ދީފައި ނުވާކަމަށް އެ ކާރުގެ ވެރިފަރާތުން ވަނީ ބުނެފަ އެވެ.
މިކަމުގެ އިތުރު ތަފްސީލު އަހުމަދު ވަސީމް ވަނީ ރާއްޖެއެމްވީ އާ ހިއްސާ ކޮށްފަ އެވެ. އޭނާ ބުނީ ކަންބޮޑުވުން ފާޅުކޮށް ސޯޝަލް މީޑިއާގައި ޕޯސްޓު ކުރުމާއެކު ސިފައިން އޭނާގެ އާއިލާ އަށް ގުޅި ކަމަށެވެ. އަދި އެ ޕޯސްޓު ނަގަން ވެސް ބުނި ކަމަށެވެ. ނަމަވެސް އެކަމަށް އެ އާއިލާ އިން ދެކޮޅު ހެދި ކަމަށާ އޭގެ ފަހުން ގިނަ އިރުތަކެއް ނުވެ ފުލުހުން ވެސް ގުޅި ކަމަށެވެ.
އަހުމަދު ވަސީމް ބުނީ އެ ކާރު ދުއްވަން އިން ސިފައިންގެ އޮފިސަރު ހުޅުދޫ ދާއިރާގެ މަޖިލިސް މެންބަރަށް ވެސް ގުޅާ އުނދަގޫ ކުރަމުންދާ ކަމަށް މެންބަރުގެ ސަޕޯޓަރުން ބުނާ ކަމަށެވެ. އެ ކާރުގެ ކަންކަމާ ގުޅިގެން ޒިންމާ ނަގަން ޖެހޭނީ ދާއިރާގެ މެންބަރު ކަމަށް އެ އޮފިސަރު މިހާރު ބުނަމުން ގެންދާ ކަމަށް ވެސް އަހުމަދު ނަސީމް ވަނީ ބުނެފަ އެވެ.
ސިފައިންގެ އެ އޮފިސަރު ހިމާޔަތް ކުރަން ބަޔަކު މަސައްކަތް ކުރަނީ ކީއްވެތޯ ސުވާލު އުފެދޭ ކަމަށާ އެމްއެންޑީއެފް އާ ސުވާލު ކުރުމުން އެ މައްސަލަ ބަލާނީ ފުލުހުން ކަމަށް ސިފައިން ތަކުރާރު ކޮށް ބުނަމުންދާ ކަން ވެސް އޭނާ ފާހަގަކުރި އެވެ.
އެކްސިޑެންޓާ ގުޅިގެން އެ ސީން އަށް ފުލުހުން ވެސް ދިއަ ކަމަށާ މައްސަލަ ނިމުނީ ނުގަވާއިދުން ވެހިކަލް ދުއްވި ސިފައިންގެ އޮފިސަރު އެ ކާރު ހަދަން ފައިސޭ ދޭ ގޮތަަށް ކަމަށް އޭނާ ބުންޏެވެ. ފުލުހުން އެކަން އެ އޮފިސަރަށް އެންގި ކަމަށާ އެކަމުގައި އިތުރަށް ބަލާނެ ކަމެއް ނޯންނާނެ ކަމަށް ވެސް އޭނާ ކިޔައިދިނެވެ. ނަމަވެސް އަދި ވެސް އެ ކާރު ހަދަން ފައިސާ ދޭން ސިފައިން ދެކޮޅު ހަދަމުން ދާ ކަމަށް އަހުމަދު ވަސީމް ބުންޏެވެ.
އެ ހާދިސާ އަށް ގާތްގަނޑަކަށް މަހެއް ވެފައިވީއިރު ކާރު ހެދޭނެ ގޮތެއް ނެތި، އާއިލާ އަށް ދިމާވާ އުނދަގުލާ، ވާ ގެއްލުމުގެ ޒިންމާ ނަގާނީ ކޮން ފަރާތަކުން ތޯ އޭނާ ވަނީ ސުވާލު އުފައްދާފަ އެވެ.