ބެލިސްޓިކް މިސައިލްތަކުގެ ރޭންޖު 2،000 ކިލޯމީޓަރު ނުވަތަ 1،200 މޭލު ގައި ހިފެހެއްޓުމަށް އަމިއްލައަށް ކަނޑައަޅާފައި އޮތް ލިމިޓު މިހާރު އުވާލާފައިވާކަން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ރަސްމީކޮށް ކަށަވަރުކޮށްދީފިއެވެ.

ވެރިރަށް ތެހެރާނުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އީރާނުގެ އިންޤިލާބީ ފައުޖުގެ ތަރުޖަމާނު ޖެނެރަލް ޙުސައިން މުޙައްބީ ވިދާޅުވީ، މިސައިލްތަކުގެ ދުރުމިން ވަކި ހިސާބެއްގައި ހިފެހެއްޓުމަށް އެ ޤައުމުން މީގެކުރިން ގެންގުޅުނު އުސޫލު މިހާރު ބާޠިލުކުރެވިފައިވާ ކަމަށެވެ.

މަސްރަހު ދިރާސާކުރާ ފަރާތްތަކުން ދެކޭގޮތުގައި މިއީ، އެމެރިކާއާއި ޔަހޫދީ ޒަޔަނިސްޓުންގެ ފަރާތުން ކުރިމަތިވެދާނެ ކޮންމެ ނުރައްކަލަކަށް، އެއްވެސް އިމެއްނެތި ހަރުކަށި ރައްދެއް ދިނުމަށް އީރާނުގެ އެންމެ މަތީ ވެރިޔާ ދެއްވާފައިވާ އިރުޝާދުތަކާ ގުޅިގެން އެޅުނު ވަރުގަދަ ފިޔަވަޅެކެވެ.

މީގެކުރިން އީރާނުން މި ލިމިޓު ކަނޑައަޅާފައި އޮތީ ވިލާތަށް ނުރައްކަލެއް ނެތްކަން ހާމަކޮށްދިނުމުގެ ގޮތުންނެވެ. ނަމަވެސް، އެމެރިކާއާއި ޔަހޫދީން ގުޅިގެން ކުރިމަތިކުރަމުންދާ އަސްކަރީ ފިއްތުންތަކާއި ދަތިކުރުމުގެ ފިޔަވަޅުތަކުގެ ސަބަބުން މިހާރު އެ ނިންމުން ބަދަލުކުރަން މަޖުބޫރުވީ ކަމަށް މަސްދަރުތަކުން ބުނެއެވެ.

އީރާނުން މިހާތަނަށް 2،000 ކިލޯމީޓަރަށްވުރެ ދުރުރާސްތާގެ މިސައިލެއް ބޭނުންކޮށްފައި ނުވިނަމަވެސް، އެ ޤައުމުގެ ޖައްވު އަދި ހަތިޔާރާއި ބެހޭ ޕްރޮގްރާމުގައި ބޭނުންކުރާ ކުރިއަރާފައިވާ ޓެކްނޮލޮޖީ މެދުވެރިކޮށް، ބައްރުތައް ހުރަސްކޮށް ހަމަލާދެވޭ ފަދަ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް) އުފެއްދުމުގެ ޤާބިލުކަން އެ ގައުމަށް ލިބިފައިވާކަމަށް އެމެރިކާގެ އަސްކަރީ އޮފިޝަލުން ކަންބޮޑުވުމާއެކު ފާހަގަކުރެއެވެ.

ހާއްސަކޮށް، 'ޚޮރްރަމްޝަހަރު' މަރުކާގެ މިސައިލްތަކަށް ލުއި ވޯރހެޑް ހަރުކޮށްގެން އޭގެ ރޭންޖު 3،000 ކިލޯމީޓަރަށް އިތުރުކުރުމުގެ ޖާގަ އޮތުމަކީ، އިރުމަތީ ވިލާތަށާއި އެ ސަރަހައްދުގައިވާ އެމެރިކާގެ އަސްކަރީ މަރުކަޒުތަކަށް ކުރިމަތިވެދާނެ ބޮޑު ނުރައްކަލެއްގެ ގޮތުގައި ވަނީ ބެލެވިފައެވެ.