ސްޕެއިންގެ ޓޮލެޑޯ އަވަށުގައި ބާރު ދުވެލީގެ 2 ރޭލު ޖެހި ހިނގި ނުރައްކާތެރި އެކްސިޑެންޓެއްގައި މަދުވެގެން 39 މީހުން މަރުވެ، އެތައް ބަޔަކު ޒަޚަމްވެއްޖެ ކަމަށް އެ ޤައުމުގެ ކަމާބެހޭ އިދާރާތަކުން ހާމަކޮށްފިއެވެ.

މި ހާދިސާ ހިނގާފައިވަނީ ލޮސް ޔެބެނެސް އަދި އުރްދާ ރަށާ ދެމެދު އޮންނަ ރޭލު މަގުގައެވެ. ކަމާބެހޭ ފަރާތްތަކުން މައުލޫމާތު ދޭ ގޮތުގައި، އެކްސިޑެންޓްވި 2 ރޭލުގައި ޖުމްލަ 400 އަށް ވުރެ ގިނަ ފަސިންޖަރުން ދަތުރުކުރަމުން ދިޔައެވެ.

މީގެ ތެރޭގައި ހިމެނެނީ "އިރިއޯ" ރޭލުގައި ތިބި 147 ފަސިންޖަރުންނާއި، "އޭވީއީ" ރޭލުގައި ދަތުރުކުރި 297 ފަސިންޖަރުންނެވެ. މި ނުރައްކާތެރި ހާދިސާއާ ގުޅިގެން ރޭލުގެ ބައެއް ބައިތައް ފުރޮޅާލައި، މެޑްރިޑާއި އަންދަލޫސިއާ ގުޅުވައިދޭ ރޭލު ދަތުރުފަތުރުގެ ޚިދުމަތް މިހާރު ވަނީ ވަގުތީ ގޮތުން މެދުކަނޑާލާފައެވެ.

މި ހިތާމަވެރި ހާދިސާއާ ގުޅިގެން ސްޕެއިންގެ ބޮޑުވަޒީރު ޕެޑްރޯ ސަންޗެޒް ވަނީ ފުން ހިތާމަ ފާޅުކުރައްވައި، އަނިޔާވި ފަރާތްތަކަށާއި ވަކިވެދިޔަ މީހުންގެ ޢާއިލާތަކަށް ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބޭނެ ކަމުގެ ޔަޤީންކަން ދެއްވާފައެވެ.

ހާދިސާ ހިނގި ސަރަހައްދުގައި ހާލުގައި ޖެހިފައިވާ ފަރާތްތަކަށް އަވަސް ފަރުވާ ދިނުމަށްޓަކައި، މޯބައިލް އިންޓެންސިވް ކެއާ ޔުނިޓުތަކާއި ލޮޖިސްޓިކްސް އެހީތެރިކަން ފޯރުކޮށްދޭ އުޅަނދުތައް ވަގުތުން ވަނީ އެ ސަރަހައްދަށް ފޮނުވާފައެވެ.

މިއީ މިއަހަރުގެ ތެރޭގައި ސްޕެއިންގައި މިފަދަ ބާރު ދުވެލީގެ ރޭލެއް އެކްސިޑެންޓްވި ދެވަނަ ފަހަރެވެ. މި އަހަރުގެ ޖެނުއަރީ މަހު ހިނގި މި ހާދިސާގައި ވެސް 45 މީހުންގެ ފުރާނަ ވަނީ ގެއްލިފައެވެ.