ބްރެޒިލްގެ އިންތިޚާބުގައި އެ ޤައުމުގެ ރައީސް ލުއީޒް އިނާސިއޯ ލޫލާ ދަ ސިލްވާ ހޯއްދެވި ކާމިޔާބީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ.

މި މަހުގެ 25ވަނަ ދުވަހު ބޭއްވި ބްރެޒިލްގެ ރިޔާސީ އިންތިޚާބުގެ ދެވަނަ ބުރު ކާމިޔާބު ކުރައްވައި، ލޫލާ ދަ ސިލްވާ ވަނީ ވެރިކަމުގެ ހަތަރުވަނަ ދައުރެއް ކަށަވަރު ކުރައްވާފައެވެ.

މިކަމާ ގުޅިގެން ބްރެޒިލްގެ ރައީސަށް ފޮނުއްވި މެސެޖެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ބްރެޒިލްގައި ފަހުން ބޭއްވި ރިޔާސީ އިންތިޚާބުގައި ލިބިވަޑައިގެންނެވި ކާމިޔާބީއަށްޓަކައި، ދިވެހި ސަރުކާރާއި ރައްޔިތުންގެ ނަމުގައާއި އެމަނިކުފާނުގެ އަމިއްލަ ނަންފުޅުގައި ރައީސް ލުއީޒް އިނާސިއޯ ލޫލާ ދަ ސިލްވާއަށް އިޚްލާސްތެރިކަމާއެކު މަރުޙަބާ ވިދާޅުވާ ކަމަށެވެ.

މި އިންތިޚާބީ ކާމިޔާބަކީ ރައީސް ލޫލާ ދަ ސިލްވާގެ ވެރިކަމުގައި ގެންގުޅުއްވާ ތަސައްވުރު ބްރެޒިލްގެ ރައްޔިތުން ބަލައިގެންފައިވާކަން ސާބިތުކޮށްދޭ ކަމެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ރިޔާސީ އައު ދައުރުގައި ފުރިހަމަ ކާމިޔާބީއަށް އެދިވަޑައިގަންނަވާ ކަމަށާއި ފުރިހަމަ ސިއްޙަތެއް ލެހެއްޓެވުމަށް ދުޢާ ކުރައްވާ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ ރައީސް ލޫލާ ދަ ސިލްވާއަށާއި ބްރެޒިލްއާއި އެ ޤައުމުގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގަންނަވަމުންނެވެ.

ސެނެޓުގެ ކަނާތުފިޔައިގެ މެންބަރު ފްލާވިއޯ ބޮލްސޮނާރޯއާ ވާދަކުރައްވައި ލޫލާ ހޯއްދެވި މި ކާމިޔާބީއަކީ ޒަމާނީ ބްރެޒިލްގެ ސިޔާސީ ތާރީޚުގައި މިހާތަނަށް ފެނިފައި ނުވާ ފަދަ ނަތީޖާއެކެވެ. މިއީ، 1989 ވަނަ އަހަރު ދެ ބުރުގެ ރިޔާސީ ނިޒާމު ތަޢާރަފުކުރި ފަހުން، ފުރަތަމަ ބުރުން ދެވަނަ ލިބުނު ކެންޑިޑޭޓަކު ދެވަނަ ބުރު ކާމިޔާބު ކުރެއްވި ފުރަތަމަ ފަހަރެވެ.

މީގެކުރިން 2003 އިން 2010 އަށް ބްރެޒިލްގައި ވެރިކަން ކުރެއްވުމަށް ފަހު، 2022 ވަނަ އަހަރު އަލުން އިންތިޚާބު ކާމިޔާބު ކުރެއްވި ލޫލާ، މެދުކެނޑުމަކަށް ފަހު ލިބިވަޑައިގެންނެވި ހަތަރުވަނަ ދައުރު ފަށްޓަވާނީ އަންނަ އަހަރުގެ ޖެނުއަރީ މަހުގެ 5 ވަނަ ދުވަހުއެވެ.