އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުހައްމަދު ޝަހީމް ޢަލީ ސަޢީދު، ޒެންޒިބާރުގެ ވަފުދަކާ ބައްދަލުކުރައްވައިފިއެވެ.
އިސްލާމީ ކަންތައްތަކާ އައުޤާފާ ބެހޭ ވުޒާރާގައި ބޭއްވެވި މި ބައްދަލުކުރެއްވުމުގައި ވަނީ، އިސްލާމީ މުހިންމު ދާއިރާތަކުންނާއި، ޚާއްޞަކޮށް އިސްލާމިކް ފައިނޭންސާއި، ޒަކާތާއި، ވަޤުފު ތަރައްޤީ ކުރުމުގެ ދާއިރާއާ ގުޅޭގޮތުން މަޝްވަރާކުރައްވާފައެވެ.
މި ބައްދަލުކުރެއްވުމުގައި ވަޒީރު ޑރ. ޝަހީމް ވަނީ، އެ ވަފުދުގެ ބޭފުޅުންނަށް ދިވެހިރާއްޖެއަށާއި އިސްލާމީ ކަންތައްތަކާ އައުޤާފާ ބެހޭ ވުޒާރާއަށް ހޫނު މަރުޙަބާއެއް ދަންނަވައި، މުއައްސަސާތަކުގެ މެދުގައި އޮންނަ ގުޅުން ބަދަހިކުރުމަށް އެބޭފުޅުން ކުރެއްވި ޒިޔާރަތާއި ދެއްވި ޝައުޤުވެރިކަމަށް ޝުކުރު އަދާކުރައްވާފައެވެ.
އިސްލާމީ ކަންތަކާއި އައުޤާފާ ބެހޭ ވުޒާރާއިން ވިދާޅުވީ، މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ދިވެހިރާއްޖެއާއި ޒެންޒިބާރުގެ ކަމާގުޅޭ މުއައްސަސާތަކުގެ މެދުގައި ގުޅިގެން މަސައްކަތްކުރެވިދާނެ ދާއިރާތައް ފާހަގަކުރުމުގެ މައްޗަށް ކަމަށެވެ. ޚާއްޞަކޮށް އިސްލާމިކް ފައިނޭންސް ޚިދުމަތްތައް ކުރިއެރުވުމާއި، ޒަކާތުގެ އިދާރީ ހިންގުން ވަރުގަދަކުރުމާއި، ދެމެހެއްޓެނިވި ވަޤުފް އިންވެސްޓްމަންޓް އުޞޫލުތައް ތަރައްޤީކުރުމާއި، އިސްލާމީ އިޤުތިޞާދީ ފުދުންތެރިކަން އިތުރުކުރުމާ ގުޅޭގޮތުން އަލިއަޅުވާލާފައިވާ ކަމަށެވެ.
H.E. Dr. Mohamed Shaheem Ali Saeed, Minister of Islamic Affairs and Endowments, met with a delegation from Zanzibar comprising CPA Juma Amour Mohammed, Chairman of Zanzibar Treasury Sukuk SPV, Ihsaan Takaful and Financial Services, and Zanzibar Economic Empowerment Agency; Dr. Abdalla Ussi Hamad, Chairman of the ZIC Takaful Shariah Advisory Board and Board Member of the Waqf and Trust Commission; and Dr. Rajab Omar Rajab, Member of the ZIC Takaful Shariah Advisory Board.
— Ministry of Islamic Affairs & Endowments (@MVIaffairs)October 27, 2026
ރާއްޖެއަށް ޒިޔާރަތްކުރެއްވި ޒެންޒިބާރުގެ ވަފުދުގެ ތެރޭގައި ހިމެނިވަޑައިގަންނަވަނީ، ޒެންޒިބާރު ޓްރެޜަރީ ސުކޫކް އެސްޕީވީ، އިޙްސާން ތަކާފުލް އެންޑް ފައިނޭންޝަލް ސަރވިސަސް އަދި ޒެންޒިބާރު އިކޮނޮމިކް އެމްޕަވަރމަންޓް އޭޖެންސީގެ ޗެއަރމަން ސީޕީއޭ ޖުމާ ޢާމިރު މުޙައްމަދާއި، ޒެޑްއައިސީ ތަކާފުލް ޝަރީޢާ އެޑްވައިޒަރީ ބޯޑުގެ ޗެއަރމަންއެވެ. އަދި ވަޤުފް އެންޑް ޓްރަސްޓް ކޮމިޝަންގެ ބޯޑު މެންބަރު ޑޮކްޓަރ ޢަބްދުﷲ ޢުއްސީ ޙަމަދުގެ އިތުރުން ޒެޑްއައިސީ ތަކާފުލް ޝަރީޢާ އެޑްވައިޒަރީ ބޯޑުގެ މެންބަރު ޑޮކްޓަރ ރަޖަބް ޢުމަރު ރަޖަބުވެސް ހިމެނިވަޑައިގަންނަވައެވެ.
މި ބައްދަލުކުރެއްވުމުގައި ވަޒީރު ޑރ. ޝަހީމްގެ އަރިހުގައި ސްޓޭޓް މިނިސްޓަރ ޑރ.މުޙައްމަދު ޝުޖާޢު ޢަބްދުލްޙަކީމްއާއި، މޯލްޑިވްސް އައުޤާފް އިންވެސްޓްމަންޓްސް ލިމިޓެޑުގެ މެނޭޖިންގ ޑިރެކްޓަރ ޔާމީން އިދުރީސް އަދި މޯލްޑިވްސް ޒަކާތު ހައުސްގެ ޑިރެކްޓަރ ޖެނެރަލް އޮފް ޒަކާތު އައްޝައިޚް އިމްތިތާޢު ޢައްބާސް ބައިވެރިވެ ވަޑައިގެންނެވިއެވެ.