ގަލްފުގެ ޤައުމުތަކުން 1.5 ބިލިއަން ފީފާގެ ތެޔޮ ބޭރުކުރަން އެހީވި ކަމަށް އެމެރިކާއިން ބުނެފި

ސަރަހައްދީ ހުރަސްތަކާއެކުވެސް، އެމެރިކާ އަސްކަރިއްޔާގެ އެހީތެރިކަމާއެކު ގަލްފުގެ ޤައުމުތަކުން 1.5 ބިލިއަން ފީފާގެ ތެޔޮ އެކްސްޕޯޓްކޮށްފިކަމަށް އެމެރިކާއިން ބުނެފިއެވެ.

އީރާނުން ހުރްމުޒް ކަނޑުއޮޅީގެ ކޮންޓްރޯލް ހޯދުމަށް ކުރަމުންދާ މަސައްކަތްތަކާއި އެކުވެސް ޖޫން މަހުން ފެށިގެން އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ އެހީތެރިކަމާއެކު ގަލްފުގެ ޤައުމުތަކުން 1.5 ބިލިއަން ފީފާގެ ތެޔޮ އެކްސްޕޯޓްކޮށްފައިވާ ކަމަށް އެމެރިކާ އަސްކަރިއްޔާއިން ހާމަކޮށްފިއެވެ.

ސެންޓްކޮމުން އާންމުކޮށްފައިވާ ރިޕޯޓެއްގައިވާ ގޮތުން، ފާއިތުވެދިޔަ 6 މަސްދުވަހުގެ ތެރޭގައި 3,000 އަށްވުރެ ގިނަ ވިޔަފާރި އުޅަނދު ވަނީ އެމެރިކާގެ އަސްކަރީ އެހީތެރިކަމާއެކު ހުރްމުޒް ކަނޑުއޮޅިން ދަތުރުކޮށްފައެވެ.

އީރާނުގެ އިންޒާރުތަކާއެކުވެސް، އެ ކަނޑުއޮޅިން ދަތުރުކުރި އުޅަނދުތަކުގެ 95 އިންސައްތައަށްވުރެ ގިނަ އުޅަނދު ރައްކާތެރިކަމާއެކު ފުރައިގެން ގޮސްފައިވާ ކަމަށާއި، މިއީ ބައިނަލްއަޤްވާމީ ކަނޑުގެ މަގުތަކުގެ ސަލާމަތީ ކޮންޓްރޯލް ދެމެހެއްޓިފައިވާކަން ދައްކުވައިދޭ ކަމެއް ކަމަށް އެމެރިކާއިން ބުނެއެވެ.

މި ހަރަކާތްތައް ބެއްލެވުމަށްޓަކައި އެމެރިކާގެ ކޮމާންޑަރު އެޑްމިރަލް ބްރެޑް ކޫޕަރ ވަނީ އެ ސަރަހައްދަށް ޒިޔާރަތްކުރައްވާފައެވެ. އެމެރިކާއާއި ޔަހޫދީ ދައުލަތުން ފެބްރުއަރީ މަހުގެ ނިމުނުކޮޅު އީރާނާ ދެކޮޅަށް ފެށި ހަރަކާތްތަކަށްފަހު، ސެޕްޓެމްބަރު މަހު އެކަނިވެސް ދުވާލަކު މަދުވެގެން 16.5 މިލިއަން ފީފާގެ ތެޔޮ އެ ސަރަހައްދުން ބޭރުކޮށްފައިވާ ކަމަށް ކެޕްލަރ މާކެޓް އިންޓެލިޖެންސް އިން ފާހަގަކޮށްފައިވެއެވެ.

ނަމަވެސް، ކުރިއާ އަޅައިބަލާއިރު ތެޔޮ ފިއުޗަރސްގެ އަގު އަދިވެސް ހުރީ ވަރަށް މަތީގައި ކަމަށް ރިޕޯޓުތައް ބުނެއެވެ. ބްރެންޓް ގްރޭޑުގެ ތެޔޮ ފީފާއެއްގެ އަގު ހުރީ ގާތްގަނޑަކަށް 114.50 ޑޮލަރުގައެވެ.