ބޯންމަތުއަތުން ޔުނައިޓެޑް ބަލިވެ ކެރިކަށް ޕްރެޝަރ ބޮޑުވެއްޖެ

އިނގިރޭސި ޕްރިމިއާ ލީގުގައި ރޭ ބޯންމަތު އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗުން 3-0 ގެ ނަތީޖާއަކުން ޔުނައިޓެޑް ބަލިވެއްޖެއެވެ.

ޔުނައިޓެޑް މި މެޗުން ބަލިވިއިރު މިދިޔަ ހަފްތާގައި ޗެމްޕިއަންސް ލީގުގައި އިޓަލީގެ ކޯމޯ އަތުންވެސް ޔުނައިޓެޑް 4-1 ގެ ނަތީޖާއަކުން ބަލިވެ, ކޯޗު މައިކަލް ކެރިކަށް ވަނީ ފާޑުކިއުންތައް އަމާޒުވެފައެވެ. އަދި މި ނަތީޖާ އާއިއެކު އޭނާއަށް އޮތް ޕްރެޝަރ ވަނީ އިތުރުވެފައެވެ.

މެންޗެސްޓަރގެ އޯލްޑް ޓްރެފަޑްގައި ކުޅުނު މި މެޗަށް އެ ޓީމު ނިކުތްއިރު ކެރިކް ވަނީ ޓީމުގެ ކެޕްޓަން ބްރޫނޯ ފެނާންޑޭޒް ބެންޗަށް ލާފައެވެ. އަދި މި މެޗުގެ އެއްވެސް ހިސާބެއްގައި އޭނާއަށް ފުރުސަތު ދީފައެއް ނުވެއެވެ.

ފެނާންޑޭޒް ބެންޗަށް ލާފައިވަނީ ޓެކްޓިކަލް ބަދަލެއްގެ ގޮތުން ކަމަށް ކެރިކް ބުނި ނަމަވެސް ކޯމޯ އަތުން ބަލިވި މެޗަށްފަހު ފެނާންޑޭޒް ބުނެފައިވަނީ އެ މެޗުން ޓީމު ބަލިވެފައިވަނީ ކެރިކްގެ ޓެކްޓިކްސް ގޯސްވުމުން ކަމަށެވެ.

ބޯންމަތުން މި މެޗުގައި ޔުނައިޓެޑްގެ ގޯލު ހުޅުވާލާފައިވަނީ މެޗުގެ 38 ވަނަ މިނިޓުގައި ރަޔާން ކާމިޔާބުކޮށްދިން ލަނޑުންނެވެ. މި ލަނޑަކީ ބޯންމަތަށް ލިބުނު ހިލޭ ޖެހުމެއް ޖަސްޓިން ކްލައިވަޓް ނަގައިދިންއިރު އޭރިޔާ ތެރޭގައި ހުރެ ރަޔާން ކާމިޔާބުކޮށްދީފައިވާ ލަނޑެކެވެ.

އަދި ފުރަތަމަ ހާފުގެ ކުޅުން ނިމެން ދެ މިނިޓަށް ވެފައިވަނިކޮށް ޔުނައިޓެޑްގެ ލެނީ ޔޯރޯ އަތުން ގެއްލުނު ބޯޅައެއް ހޯދުމަށްފަހު މާކަސް ޓެވޭނިއާ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.

ބޯންމަތުން މި މެޗުގައި ޖެހި ތިންވަނަ ލަނޑަކީ މެޗުގެ 71 ވަނަ މިނިޓުގައި އެވަނިލްސަން ކާމިޔާބުކޮށްދީފައިވާ ލަނޑެކެވެ.

މި މެޗުން ޔުނައިޓެޑް ބަލިވުމާއިއެކު އެ ޓީމަށް 8 މެޗުން ލިބިފައިވާ 7 ޕޮއިންޓާއެކު ވަނީ ތާވަލުގެ 16 ވަނައަށް ވެއްޓިފައެވެ. ބޯންމަތަށް ލިބިފައިވާ 9 ޕޮއިންޓާއެކު އެ ޓީމު ވަނީ 13 ވަނައަށް ޖެހިލާފައެވެ.