ޔުއޭފާ ޗެމްޕިއަންސް ލީގުގައި ޕެރިސް ސެއިންޓް ޖާމެއިން އަތުން ބަލިވި ނަމަވެސް ރެއާލް މެޑްރިޑާ ދެކޮޅަށް ކުޅޭ ސީޒަންގެ ފުރަތަމަ އަލް ކްލަސިކޯ މެޗަށް އެފްސީ ބާސެލޯނާ އޮތީ ތައްޔާރަށް ކަމަށް އެޓީމުގެ ކޯޗު ހާންސީ ފްލިކް ބުނެފިއެވެ.

އޭނާ މިހެން ބުނެފައިވަނީ ސްޕެނިޝް ލަލީގާގައި ތާވަލުގެ އެންމެ ކުރީގައި އުޅޭ ދެޓީމު ކަމަށްވާ ބާސާ އާއި ރެއާލްގެ މެދުގައި މިރޭ ދަންވަރު ކުޅުމަށް ހަމަޖެހިފައިވާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ފްލިކް ބުނީ އެލް ކްލަސިކޯއަކީ މުޅިން ތަފާތު މެޗެއް ކަމަށެވެ. އޭނާ ގަބޫލް ކުރާގޮތުގައި މިއީ ކުލަބް ފުޓްބޯޅައިގައި މުޅި ދުނިޔޭގައިވެސް ކުޅޭ އެންމެ ފޯރިގަދަ ކުރިމަތިލުން ކަމަށެވެ. އަދި މިމެޗަކީ މުޅި ދުނިޔެވެސް އެމެޗަށް އިންތިޒާރު ކުރާ މެޗެއްކަމަށް ބާސާގެ ކޯޗު ފާހަގަ ކުރިއެވެ. ފްލިކް ބުނީ އޭނާ އާއި އޭނާގެ ކުޅުންތެރިން ތިބީ މި މުހިންމު މެޗަށް ވަރަށް ރަނގަޅަށް ތައްޔާރު ވެގެން ކަމަށެވެ. މިމެޗުން މޮޅުވުމުން 3 ޕޮއިންޓް ލިބުނު ނަމަވެސް އެކާމިޔާބީގެ އުފާ އެއަށްވުރެ މާ ބޮޑު ކަމަށް ފްލިކް ހާމަކުރިއެވެ.

ފްލިކް ބުނިގޮތުގައި މިމެޗުގައި އަނިޔާގެ ސަބަބުން ޖޫލްސް ކޮއުންޑޭ އާއި ޑާނީ އޮލްމޯ އަށް ނުކުޅެވޭނެއެވެ. މިމެޗުން މޮޅުވެއްޖެ ނަމަ ބާސާ އާއި ރެއާލްގެ މެދުގައިވާ ފަރަގު 9 ޕޮއިންޓަށް އިތުރު ވާނެއެވެ. ނަމަވެސް ރެއާލް މިމެޗު ކާމިޔާބު ކޮށްފި ނަމަ ދެޓީމުގެ ދެމެދުގައިވާ ފަރަގު 3 ޕޮއިންޓަށް ކުޑަކުރުމުގެ ފުރުސަތުވެސް އޮންނާނެއެވެ.

ބާސާ އާއި ރެއާލްގެ މެދުގައި އެންމެ ފަހުން ކުޅުނު 7 މެޗުގެ ތެރެއިން 6 މެޗު ކާމިޔާބު ކޮށްފައިވަނީ ބާސާއެވެ. މިމެޗާއި ކުރިމަތިލާއިރު ބާސާވަނީ މިސީޒަންގައި ފުރަތަމަ ފަހަރަށް މެޗަކުން ބަލިވެފައެވެ. ޗެމްޕިއަންސް ލީގުގައި ޕީއެސްޖީ އާއި ބައްދަލުކުރި މެޗުން ބަލިވެފައިވަނީ 4-2 ލަނޑުންނެވެ.

މިމެޗާއި ކުރިމަތިލާއިރު ގިނަ އަހަރު ތަކަކަށްފަހު ރެއާލްގެ ބެންޗުން ހޯސޭ މޮރީނިއޯ ފެންނާނެއެވެ. މޮރީނިއޯ އަކީ އެލް ކްލަސިކޯއަށް ވަރަށް ފަރިތަ ކޯޗެކެވެ. އޭނާވަނީ މީގެކުރިން 17 އެލް ކްލަސިކޯގައި ރެއާލްގެ ބެންޗުން ފެނިގެން ގޮސްފައެވެ. ނަމަވެސް މޮރީނިއޯ ބުނީ ރެއާލް އާއި ބާސާގެ މެދުގައި ކޮންމެ އަހަރަކު މަދުވެގެން ދެ އެލް ކްލަސިކޯ ކުޅެވޭއިރު ބެންޗުގައި އިންނަނީ ކާކުތޯ ބެލުން މުހިންމު ނޫން ކަމަށާއި މުހިންމީ އެމެޗު ކަމަށެވެ. މޮރީނިއޯ ކުރިމަތިލި ފުރަތަމަ 10 އެލް ކްލަސިކޯގެ ތެރެއިން އެންމެ މެޗަކުން މޮޅުވި ނަމަވެސް އޭނާ އެންމެ ފަހުން ކުޅުނު 5 އެލް ކްލަސިކޯގައި ބާސާ އަތުން ބަލިވެފައެއް ނުވެއެވެ. އަދި އޭގެ ތެރެއިން 3 މެޗު ވަނީ ކާމިޔާބު ކޮށްފައެވެ.