ކުއްލި ހާލަތްތަކާއި ކުރިމަތިވެދާނެ ނުރައްކާތަކަށް ދުރާލައި ތައްޔާރުވުމުގެ ގޮތުން، ކޮންމެ ގޭބިސީއަކުން ވެސް މަދުވެގެން 3 ދުވަހަށް ފުދޭވަރަށް ފެނާއި ބަންދުކުރި ކާބޯތަކެތި ރައްކާކޮށްފައި ބެހެއްޓުމަށް އިނގިރޭސިވިލާތުގެ ސަރުކާރުން އާންމުންނަށް އިލްތިމާސްކޮށްފިއެވެ.

ދުނިޔޭގެ މަސްރަހަށް އަންނަ ބަދަލުތަކާއި، އަންދާޒާނުކުރެވޭ ފަދަ ކުއްލި ހާދިސާތަކަށް އާންމު ރައްޔިތުން ހޭލުންތެރިކުރުވުމުގެ މަޤްޞަދުގައި މި އިރުޝާދު ނެރުއްވާފައިވަނީ އިނގިރޭސިވިލާތުގެ ކަމާބެހޭ އިސް އޮފިޝަލުންނެވެ.

އެ އިދާރާތަކުން ލަފާދީފައިވަނީ، ކޮންމެ މީހަކަށް 3 ދުވަހުގެ މުއްދަތަށް ބޭނުންވާނެ 9 ލީޓަރުގެ ފެނުގެ އިތުރުން، ފަސޭހައިން ހަލާކުނުވާ ބާވަތްތައް ކަމަށްވާ ދަޅުގައި ބަންދުކޮށްފައި ހުންނަ މަހާއި ތަރުކާރީ އަދި ހިއްކާފައި ހުންނަ މޭވާ ފަދަ ތަކެތި ކޮންމެ ގެއެއްގައި ވެސް ރައްކާކޮށްފައި ބެހެއްޓުމަށެވެ.

މިފަދަ ފިޔަވަޅުތަކަކީ ހަނގުރާމައެއް، ބޮޑު ސައިބަރ ހަމަލާއެއް ނުވަތަ ގުދުރަތީ ކާރިސާއެއް ފަދަ ކުއްލި ހާލަތެއް ކުރިމަތިވެއްޖެނަމަ، އަސާސީ ހިދުމަތްތައް މެދުކެނޑިގެންދާ ވަގުތުތަކުގައި އާންމު ދިރިއުޅުމަށް ދިމާވެދާނެ ދަތިތައް ކުޑަކުރުމަށް އެޅޭ ރައްކާތެރިކަމުގެ މުހިންމު ފިޔަވަޅެކެވެ.

ކާބޯތަކެތީގެ އިތުރުން، ކަރަންޓު ކެނޑިދާނެ ހާލަތަކަށް ތައްޔާރުވުމުގެ ގޮތުން ޕަވަރ ބޭންކާއި، ބެޓެރީން މަސައްކަތްކުރާ ރޭޑިއޯއާއި، ފުރަތަމަ އެހީދޭ ފޮށްޓާއި، ނަގުދު ފައިސާގެ އިތުރުން މުހިންމު ލިޔެކިޔުންތައް ވެސް ރައްކާތެރިކަމާއެކު ތައްޔާރީ ހާލަތުގައި ބެހެއްޓުމަށް ވަނީ އިރުޝާދުދީފައެވެ.

ބައިނަލްއަޤްވާމީ ސަލާމަތީ މަސްރަޙު ގޯސްވަމުންދިއުމާއި މޫސުމީ ބަދަލުތަކުގެ ސަބަބުން، ކާބޯތަކެތި ފޯރުކޮށްދިނުމުގެ ނިޒާމަށް ބުރޫއަރައި، ސަޕްލައި ޗޭނަށް ކުރިމަތިވެދާނެ ގޮންޖެހުންތަކުން އަރައިގަތުމަށް މިފަދަ ދުރާލައި ވާ ތައްޔާރީތަކަކީ ކޮންމެހެން ބޭނުންތެރި ކަމެއް ކަމަށް އިނގިރޭސިވިލާތުގެ އޮޑިޓް އޮފީސްތަކުންނާއި ކަމާގުޅުންހުރި އިދާރާތަކުން ވެސް ވަނީ ފާހަގަކޮށްފައެވެ.