ނޮޓިންހަމް އާއި އިޕްސްވިޗް އެއްވަރުވެއްޖެ

އިނގިރޭސި ޕްރިމިއާ ލީގުގައި ރޭ އިޕްސްވިޗް ޓައުން އާއި ދެކޮޅަސް ނޮޓިންހަމް ފޮރެސްޓް ކުޅުނު މެޗު 1-1 ގެ ނަތީޖާއަކުން އެއްވަރުވެއްޖެއެވެ.

އިޕްސްވިޗްގެ ޕޯޓްމަން ރޯޑުގައި 29 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު އެއްވަރުގެ ނޮޓިންހަމްއަށް ލިބުނު ޕޮއިންޓާއެކު އެ ޓީމު ވަނީ ރެލިގޭޝަން ޒޯނުން އަރާފައެވެ. ލީގުގައި މިހާތަނަށް ކުޅުނު 8 މެޗުން ނޮޓިންހަމްއަށް ލިބިފައިވާ 6 ޕޮއިންޓާއެކު އެ ޓީމަށް ވަނީ 16 ވަނަ ލިބިފައެވެ. އިޕްވިޗަށް ލިބިފައިވާ 10 ޕޮއިންޓާއެކު އެ ޓީމު އޮތީ ތާވަލުގެ 8 ވަނައިގައެވެ.

ނަމަވެސް މިއަދު ކޮވެންޓްރީ ސިޓީ އާއި ޓޮޓެންހަމް ކުޅޭ މެޗުތަކުން އެ ދެ ޓީމަށް ޕޮއިންޓެއް ލިބުނުނަމަވެސް ނޮޓިންހަމް އަނެއްކާވެސް ރެލިގޭޝަން ޒޯނަށް ވެއްޓޭނެއެވެ.

އޮލިވާ ގްލޭޒްނާރގެ އިރުޝާދުގެ ދަށުން ކުޅެމުންދާ ނޮޓިންހަމްއިން މޮޅު ކުޅުމެއް މި މެޗުގައި ދައްކާފައިވާއިރު އެ ޓީމަށް ލަނޑު ޖަހަން ލިބުނު ގިނަ ފުރުސަތުތަކެއް ވަނީ ގެއްލިފައެވެ.

ނޮޓިންހަމްއިން މި މެޗުގެ 13 ވަނަ މިނިޓުގައި ލަނޑު ނަފާފައިވަނީ އަރިމަތިން ޑެނިއަލް މުނޯޒް ނަގައިދިން ހުރަހަކުން ނެކޯ ވިލިއަމްސް އެވެ.

ނޮޓިންހަމްއިން ލީޑު ނެގިތާ ގިނައިރުތަކެއް ނުވަނީސް އަނިޔާއަށްފަހު އަލުން އަނބުރާ ކުޅުމުގެ ތެރެއަށް އައި މޯގަން ގިބްސް ވައިޓަށްވަނީ ދެ ޓީމުގެ ދެމެދުގައިވާ ފަރަގު ބޮޑު ކުރުމަށް ރަގަޅު ފުރުސަތެއް ލިބި ބޭކާރުވެފައެވެ.

ނަމަވެސް މެޗުގެ ފުރަތަމަ ހާފުގެ ކުޅުން ނިމެން ހަތަރު މިނިޓަށް ވެފައިވަނިކޮށް އިޕްސްވިޗްގެ ޖޫލިއޯ އެންކީސޯ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ.

މި މެޗުގެ ދެވަނަ ހާފުގައިވެސް ނޮޓިންހަމްއަށް ވަނީ އިތުރު ލަނޑުތަކެއް ޖަހަން ފުރުސަތު ލިބިފައެވެ. އެގޮތުން ބަދަލު ކުޅުންތެރިއެއްގެ ގޮތުގައި ކުޅެންއެރި ކަލަމް ހަޑްސަން އޮޑޮއިއަށް ލިބުނު ފުރުސަތު ފާހަގަކޮށްލެވެއެވެ.