ރާއްޖެއަށް މިހާރު ކުރަމުންދާ ވިއްސާރައިގައި އުތުރުގެ ގިނަ ރަށްތަކެއްގައި ފެންބޮޑުވެ، ގިނަ އަދަދެއްގެ ގެތަކަކަށް ފެންވަދެ ބޮޑެތި ގެއްލުންތަކެއް ލިބިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ހާމަކޮށްފިއެވެ.

ވިއްސާރައިގެ ސަބަބުން އެންމެ ބޮޑަށް އަސަރުކޮށްފައިވަނީ ހދ. އަތޮޅާއި ހއ. އަތޮޅުގެ އިތުރުން ޅ. އަތޮޅުގެ ބައެއް ރަށްތަކަށެވެ.

އެންމެ ބޮޑު ގެއްލުމެއް ލިބުނު އެއް ރަށަކީ ހދ. ނޮޅިވަރަމެވެ. ރޭން ފެށިގެން ވެހުނު ބޯ ވާރޭގެ ސަބަބުން އެ ރަށުގެ %95 ގެތަކަށް ފެންވަދެ، ހިފާގެންގުޅޭ ތަކެއްޗަށް ވަނީ ބޮޑެތި ގެއްލުންތަކެއް ވެފައެވެ. އަދި ބައެއް އާއިލާތައް މިހާރު އެހެން ގެތަކަށް ބަދަލުކުރެވިފައިވާއިރު، 5 ސަރަޙައްދަކުން ކޯރު ކަނޑައިގެންނާއި ޕަންޕު ޖަހައިގެން ފެން ހިންދުމުގެ މަސައްކަތް ކުރަމުންދިޔަ ނަމަވެސް އަދިވެސް ފެންގަނޑު ކޮންޓްރޯލް ކުރެވިފައި ނުވާ ކަމަށް ރަށު ކައުންސިލުން މަޢުލޫމާތުދެއެވެ. މި ހާލަތުން އަރައިގަތުމަށް ކައުންސިލުން މިހާރު ވަނީ އެމްއެންޑީއެފްގެ އެހީތެރިކަމަށް އެދިފައެވެ.



ހދ. ކުޅުދުއްފުށި ސިޓީއަށް ބޯކޮށް ވާރޭވެހުމުގެ ސަބަބުން 190 އަށްވުރެ ގިނަ ގެއިން އެހީތެރިކަމަށް އެދި ރިޕޯޓްކޮށްފައިވާއިރު، ކުޅުދުއްފުށީ ކައުންސިލުން ދަނީ އެ ގެތަކުގެ ހާލަތު ވަޒަންކުރަމުންނެވެ. އަދި ކައުންސިލާއި، ފުލުހުންނާއި، އެމްއެންޑީއެފް ފަޔަރ އެންޑް ރެސްކިއު ސަރވިސަސް އަދި މޯލްޑިވްސް ރެޑް ކްރެސެންޓް، އެމްއާރުސީ ގުޅިގެން ރަށުތެރެއިން ފެންހިއްކުމުގެ މަސައްކަތް ކުރަމުންދާ ކަމަށް އެއިދާރާއިން ވިދާޅުވިއެވެ.

ހދ. ނޮޅިވަރަންފަރުގެ 60 އަށްވުރެ ގިނަ ގެއަކުން ފެންބޮޑުވެގެން ރިޕޯޓްކޮށްފައިވެއެވެ. ނޮޅިވަރަންފަރުގައި ގިނަ ގެތަކުގެ އަޑިން ފެން އަރަމުންދާތީ ފުލުހުންނާއި ރައްޔިތުން ގުޅިގެން ވެލިބަސްތާ ޖެހުމުގެ މަސައްކަތް ދަނީ ކުރަމުންނެވެ. ނަމަވެސް އެ ރަށުން އެއްވެސް ގެއަކުން މީހުން ހުސްކުރަންޖެހޭ ހާލަތަކަށް އަދި ގޮސްފައި ނުވާ ކަމަށް އެންޑީއެމްއޭއިން ވިދާޅުވިއެވެ.



ހއ. ތަކަންދޫގެ ބައެއް ސަރަޙައްދުތަކަށާއި ގޭބީސީތަކަށް ލިބެމުންދާ ގެއްލުންތަކާ ގުޅިގެން ސަރުކާރުގެ ކަމާބެހޭ އިދާރާތަކުގެ ސަމާލުކަމަށް އެކަން ގެނެވި، އެމްއެންޑީއެފްގެ ނޮދަން ކޮމާންޑްގެ ޓީމެއް ވަރަށް އަވަހަށް އެ ރަށަށް ދިއުމަށް ދަނީ ތައްޔާރުވަމުންނެވެ. އަދި އަދި ސަރުކާރުގެ ޑިޒާސްޓަރ މެނޭޖްމަންޓް ސެންޓަރާއި ހއ. ތަކަންދޫ ކައުންސިލް ގުޅުވައި، ރައްޔިތުންނަށް ލިބެމުންދާ ގެއްލުންތައް ސެންޓަރަށް ރިޕޯޓު ކުރަންވީގޮތް ކައުންސިލަށް ވަނީ ދަންނަވާފައެވެ.

މީގެ އިތުރުން، ޅ. ނައިފަރަށް ބޯކޮށް ވާރޭވެހި ފެންބޮޑުވެގެން މިހާތަނަށް 2 ގެއަކުން ރިޕޯޓްކޮށްފައިވާ ކަމަށް އެންޑީއެމްއޭއިން ވިދާޅުވިއެވެ. ނަމަވެސް އެއްވެސް ގެއަކުން މީހުން ނެރެންޖެހޭ ފަދަ ހާލަތެއް އަދި މެދުވެރިއެއްނުވާ ކަމަށާއި، ފެން ވަންނަ ގެތަކުގެ ކައިރީ ވެލިބަސްތާ ޖެހުމާއި ފެން ހިންދުމުގެ މަސައްކަތް މިހާރު ކުރެވެމުންދާކަމަށް ކައުންސިލާ ހަވާލާދީ އެ އިދާރާއިން ވިދާޅުވިއެވެ.



ކުޅުދުއްފުށި ސިޓީއާއި ނައިފަރުގައި ފެން ހިންދުމުގެ މަސައްކަތުގައި އެމްއެންޑީއެފް ނޮދަން އޭރިއާ ކޮމާންޑުން ހަރަކާތްތެރިވަމުން އަންނައިރު، ކުޅުދުއްފުށީގައި ކައުންސިލާއި، ފުލުހުން، އެމްއެންޑީއެފް ފަޔަރ އެންޑް ރެސްކިއު ސަރވިސް އަދި މޯލްޑިވްސް ރެޑް ކްރެސެންޓް ގުޅިގެން ދަނީ ކުރަމުންނެވެ.



އެންޑީއެމްއޭއިން ވިދާޅުވީ މި ރަށްތަކުގެ ހާލަތު ވަރަށް ގާތުން ބަލަމުންދާ ކަމަށާއި، އިންސާނީ އެހީތެރިކަން ބޭނުންވާ ފަރާތްތައް ދެނެގަނެ ކައުންސިލްތަކާ ގުޅިގެން އެ އިންތިޒާމުތައް ހަމަޖައްސަމުން އަންނަ ކަމަށެވެ.

މޫސުމާބެހޭ ޤައުމީ އިދާރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، ފާއިތުވި 24 ގަޑިއިރު އެންމެ ގިނައިން ވާރޭ ވެހިފައިވަނީ ކުޅުދުއްފުށި ސިޓީއަށެވެ. އެއީ 188.3 މިލިލީޓަރުގެ ވާރެއެވެ. ދެން އެންމެ ގިނައިން ވާރޭ ވެހިފައި ވަނީ ހދ.ހަނިމާދޫއަށެވެ. އެއީ 125.7 މިލިމީޓަރުގެ ވާރޭއެވެ.