އެގްރޯނެޓް ކުންފުނީގެ ޗެއާމަންގެ މަގާމަށް މިފްކޯގެ ސީއީއޯ މުޙައްމަދު އަނަސް އަދި މެނޭޖިންގ ޑިރެކްޓަރުގެ މަގާމަށް މުޙައްމަދު ސިނާން އައްޔަންކުރުމަށް ނިންމަވައިފިއެވެ.
މިފްކޯގެ ސަބްސިޑިއަރީ ކުންފުންޏެއްގެ ގޮތުގައި އެގްރޯ ނެޓް ހަމަޖެއްސުމާ ގުޅިގެން، ދެ ބޭފުޅުން މަޤާމަށް އައްޔަންކުރަން ނިންމެވީ މިފްކޯގެ ބޯޑުންނެވެ. މިފްކޯއިން ވިދާޅުވީ އެގްރޯ ނެޓްގެ ހިންގުމަށް މި ގެނެވުނު ބަދަލާއެކު އެ ކުންފުންޏަށް އާ ފެށުމަކާއި ކުރިއެރުންތަކެއް ލިބިގެންދާނެ ކަމަށް އުންމީދުކުރައްވާ ކަމަށެވެ.
އެގްރޯ ނޭޝަނަލް ކޯޕަރޭޝަން ލިމިޓެޑް، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް މިފްކޯގެ ސަބްސިޑަރީ ކުންފުންޏަކަށް ބަދަލުކުރަން ނިންމާފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިޢުލާންކުރެއްވީ މިދިޔަ ސެޕްޓެމްބަރ މަހުގެ 7ވަނަ ދުވަހުއެވެ.
MIFCO’s Board has appointed Mr. Mohamed Anas, CEO of MIFCO, as Chair of AgroNat, and Mr. Mohamed Sinan as Managing Director, following AgroNat’s transition as a MIFCO subsidiary.
MIFCO wishes them success in their new roles and looks forward to a new chapter for AgroNat. https://t.co/z5tLzC47Wx— MIFCO (@mifcomv)October 5, 2026
ރައީސް އޭރު ވިދާޅުވީ، މިފްކޯ އާއި އެގްރޯނެޓް އެކުގައި މަސައްކަތް ކުރަންފެށުމުން، ވަރަށް ގިނަ ފައިދާތައް ލިބޭނެކަމަށެވެ.ެ މިއީ އެބަދަލާއެކު އެގްރޯނެޓްގެ ވިޔަފާރި ފުޅާކުރުމަށާއި، ކާބޯތަކެތީގެ ރައްކާތެރިކަމުގެ އަމާޒު ހާސިލްކުރުމާއި، ދަނޑުވެރިކަމުގެ ސިނާޢަތް ފުޅާކުރުމަށްވެސް ފަސޭހަވާނެ ބަދަލެއްކަމަށް ސަރުކާރުން ޤަބޫލުކުރައްވައެވެ.
އެގްރޯނެޓް (އެގްރޯ ނެޝަނަލް ކޯޕަރޭޝަން) އަކީ ދިވެހިރާއްޖޭގައި ދަނޑުވެރިކަން ތަރައްޤީކޮށް ފުޅާކުރުމަށް 2020 ވަނަ އަހަރު އުފެއްދި ސަރުކާރުގެ ކުންފުންޏެކެވެ. އެ ކުންފުނީގެ މައިގަނޑު މަޤްސަދަކީ، ދަނޑުވެރިން ހައްދާ ތަކެއްޗަށް ހަމައަގު ހޯދައިދިނުމާއި ބާޒާރަށް ނެރެދިނުމެވެ. މީގެއިތުރުން، ދަނޑުވެރިކަމުގެ ވިޔަފާރިއަށް ބޭނުންވާ ފަންނީ އަދި އިދާރީ ޤާބިލްކަން ކުރިއެރުވުމަކީ އެ ކުންފުނީގެ މަޤްސަދެކެވެ.