ފަހި ދިރިއުޅުން ކޯޕަރޭޝަން، އެފްޑީސީ ފްލެޓްތައް ކުއްޔަށް ދޭނަމަ ފްލެޓްތައް އަތުލައި ބައިލައްކަ ރުފިޔާއާއި ހަމައަށް ފްލެޓުތަކުގެ ވެރިން ޖޫރިމަނާ ކުރާނެ ކަމަށް ފަހި ދިރިއުޅުން ކޯޕަރޭޝަން، އެފްޑީސީން ވިދާޅުވެއްޖެއެވެ.
ފަހިދިރިއުޅުން ފްލެޓްތަކަކީ އިޖްތިމާޢީ ބޯހިޔާވަހިކަމުގެ ދަށުން ސަރުކާރުން ހެޔޮ އަގުގައި ދޫކޮށްފައިވާ ފްލެޓްތަކެކެވެ. މި 4000 ފްލެޓްތަކުގައި 3 ކޮޓަރިއާއި ދެކޮޓަރީގެ ފްލެޓްތައް ހުރިއިރު، މިތަންތަން ކުއްޔަށް ދިނުމަކީ އެތަންތަނުގެ ވެރިންނާއެކު ވެފައިވާ އެއްބަސްވުމާއިވެސް ޚިލާފު ކަމެކެވެ.
ނަމަވެސް ބައެއް ފަރާތްތަކުން މި ފްލެޓްތައް ކުއްޔަށް ދޫކުރަން މީސްމީޑިއާގައި ދަނީ މަދުން ނަމަވެސް ޕޯސްޓްތައް ޖަހަމުންނެވެ. މިފަދަ މައްސަލައެއް މީސްމީޑިއާގައި މިހާރުވެސް ވަނީ ފެންމަތިވެފައެވެ. އެފްޑީސީން ހުޅުމާލެ ދެވަނަ ފިޔަވަހިން ދޫކޮށްފައިވާ 3 ކޮޓަރީގެ އެޕާޓްމެންޓެއް 23،000 ރުފިޔާއަށް ކުއްޔަަށް ދިނުމަށް މީހަކު ވަނީ މީސްމީޑިއާގައި ޖަހާފައެވެ. ނަމަވެސް 3 ކޮޓަރީގެ މި ފްލެޓަށް ސަރުކާރުން ކަނޑައަޅާފައިވަނީ 11،500 ރުފިޔާއެވެ. އެހެންކަމުން މިއީ ސަރުކާރުން މި ތަންތަން ދޫކޮށްފައިވާ އަގަށް ވުރެ ދެގުނަ ބޮޑު އަގެކެވެ.
I was notified of this earlier today and I have already informed my team to look into this. FDC flats are NOT for sub leasing - violates lease agreement with tenant.@Fdc_mvwill actively pursue those who are leasing and will fine up to MVR 50,000 and terminate the agreement with…https://t.co/5GdFYJjEGy
— Hamdhan Shakeel (@HamdhanShakeel)March 6, 2026
މިމައްސަލަ ފެންމަތިވުމާއެކު މީސްމީޑިއާގައި ހިއްސާކުރެއްވި ޕޯސްޓެއްގައި ފަހިދިރިއުޅުން ކޯޕަރޭޝަންގެ މެނޭޖިންގ ޑިރެކްޓަރ ހަމްދާން ޝަކީލް ވަނީ މިމައްސަލަ އެކުންފުނީގެ ސަމާލުކަމަށް އައިސްފައިވާ ކަމަށް ވިދާޅުވެފައެވެ. ހަމްދާންގެ ޕޯސްޓްގައިވަނީ އެފްޑީސީ ފްލެޓްތަކަކީ 3 ވަނަ ފަރާތަކަށް ކުއްޔަން ދެވޭނެ ތަންތަން ނޫންކަން ތަކުރާރުކުރައްވާފައެވެ. އަދި މިފަދަ ޢަމަލުތައް ކުރާ ފަރާތްތައް 50،000ރުފިޔާއާ ހަމައަށް ޖޫރިމަނާކޮށް ފްލެޓުގެ އެއްބަސްވުން އުވާލެވޭނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ، ސަރުކާރުން އިޖްތިމާޢީ ބޯހިޔާވަހިކަމަށް ދޫކޮށްފައިވާ ފްލެޓްތައް ކުއްޔަށް ދިނުމަކީ އިޖްތިމާޢީ ބޯހިޔާވަހިކަމުގެ މަޝްރޫޢުތަކުގެ މަޤްޞަދަށް ހުރަސް އެޅޭ ކަމެއް ކަމަށެވެ. އަދި އަސާސެއް ގޮތުން މިއީ ގޯސް ޢަމަލެއްކަން ފާހަގަކޮށް އޭނާ ވަނީ ފްލެޓްތައް ފައިދާ ހޯދާ ވިޔަފާރިއަކަށް ހެދުމަކީ ކޮންމެ ދިވެއްސެއްގެ ހައްޤަށްވެސް އަރައިގަތުން ކަމަށް ވިދާޅުވެފައެވެ.
ބޯހިޔާވަހިކަމުގެ މަޝްރޫޢުގެ ދަށުން ހުޅުމާލޭގައި ތަރައްޤީކޮށްފައިވާ 4000 ހައުސިން ޔުނިޓުތައް ހަވާލުކުރަމުންދަނީ ފިނިޝިން ހުރިހާ މަސައްކަތެއްވެސް ނިންމުމަށްފަހުއެވެ. ފްލެޓްގެ އެއްބަސްވުމުގައި ސޮއިކުރުމަށް، ލިސްޓް ކަނޑައެޅުމުގެ މަސައްކަތް ކުރަނީ ގެދޮރުވެރިކަމާ ބެހޭ ވުޒާރާއިންނެވެ. އެފްޑީސީން ސޮއިކުރަމުންދަނީ އެވުޒާރާއިން ފޮނުވާ ލިސްޓަށެވެ.