ދައުލަތުގެ މާލީ ހާލަތު ރަނގަޅުވެ، ބޭރު ފައިސާގެ އާމްދަނީ 222.8 މިލިޔަން ޑޮލަރަށް އަރާފައިވާކަމަށް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން އާންމުކޮށްފައިވާ މާލީ ރިޕޯޓުން ދައްކައިފިއެވެ.
މިއަހަރުގެ ފެބުރުވަރީ 26ގެ ނިޔަލަށް ދައުލަތަށް އާމްދަނީއާއި ހިލޭ އެހީގެ ގޮތުގައި ޖުމްލަ 7.8 ބިލިޔަން ރުފިޔާ ލިބިފައިވާއިރު، ޖުމްލަ ޚަރަދަކީ 5.9 ބިލިޔަން ރުފިޔާކަމަށް މި ރިޕޯޓްގައި ވަނީ ބުނެފައެވެ. އެހެންކަމުން، މި މުއްދަތުގެ ނިޔަލަށް ދައުލަތުގެ ބަޖެޓުން 1.9 ބިލިޔަން ރުފިޔާގެ ސާޕްލަސްއެއް ވަނީ ރެކޯޑުކުރެވިފައެވެ.
މިދިޔަ އަހަރުގެ މި މުއްދަތާ އަޅާބަލާއިރު އާމްދަނީއަށް ވަނީ ބޮޑު ކުރިއެރުމެއް ލިބިފައެވެ. އެގޮތުން، 2025 ވަނަ އަހަރު ލިބުނު 6.0 ބިލިޔަން ރުފިޔާއާ އަޅާބަލާއިރު، މިއަހަރު ލިބުނު އާމްދަނީ ވަނީ 29.3 އިންސައްތަ އިތުރުވެފައެވެ. މީގެ ތެރެއިން 83 އިންސައްތައަކީ ޓެކުހުގެ ގޮތުގައި ލިބުނު އާމްދަނީކަމުން، ދައުލަތުގެ އާމްދަނީގައި ޓެކުހުގެ ދައުރު ބޮޑުކަން ފާހަގަކުރެވެއެވެ.
ޓެކުހުގެ ގޮތުގައި ލިބުނު އާމްދަނީއަށް ބަލާއިރު، 26 ފެބުރުވަރީގެ ނިޔަލަށް 6.5 ބިލިޔަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތުގައި ލިބުނު 5.0 ބިލިޔަން ރުފިޔާއާ އަޅާބަލާއިރު 30.6 އިންސައްތައިގެ ކުރިއެރުމެކެވެ.
ސްރީލަންކަން އެއާލައިންސްގައި ރާއްޖެއައި ފަތުރުވެރިންތަކެއް، ފޮޓޯ: އެމްއޭސީއެލް
ރިޕޯޓުގައި ފާހަގަކޮށްފައިވާ ގޮތުގައި، އެންމެ ބޮޑު ކުރިއެރުމެއް ލިބިފައިވަނީ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ ޓެކްސް (ޓީ.ޖީ.އެސް.ޓީ) އިންނެވެ. އެގޮތުން ޓީ.ޖީ.އެސް.ޓީގެ ގޮތުގައި 2.3 ބިލިޔަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 39.4 އިންސައްތަ އިތުރު އަދަދެކެވެ.
ޖީ.އެސް.ޓީއާއި ވިޔަފާރި އަދި މުދަލުން ނަގާ ޓެކްސްއަކީ އަދިވެސް ދައުލަތަށް އެންމެ ގިނައިން އާމްދަނީ ވަންނަ ދާއިރާތަކެވެ. ޖުމްލަ ޖީ.އެސް.ޓީގެ ގޮތުގައި 3.2 ބިލިޔަން ރުފިޔާ ލިބިފައިވާއިރު، މިއީ މިދިޔަ އަހަރުގެ މިމުއްދަތާ އަޅާބަލާއިރު 32.1 އިންސައްތައިގެ އިތުރުވުމެކެވެ. އަދި ވިޔަފާރިއާއި މުދަލުން ނަގާ ޓެކުހުގެ ގޮތުގައި 2.2 ބިލިޔަން ރުފިޔާ ވަނީ ލިބިފައެވެ.
ޚަރަދުތަކަށް ބަލާއިރު، މިދިޔަ އަހަރާ އަޅާބަލާއިރު ޖުމްލަ ޚަރަދުތައް ވަނީ އެއްވަރެއްގައި ހިފެހެއްޓިފައެވެ. ނަމަވެސް، މުވައްޒަފުންގެ މުސާރައާއި އިނާޔަތްތަކަށް ކުރާ ހަޚަރަދު ވަނީ 9.6 އިންސައްތަ އިތުރުވެފައެވެ. މިއަހަރުގެ މި މުއްދަތުގައި މުސާރައާއި ޕެންޝަނަށް 2.64 ބިލިޔަން ރުފިޔާ ޚަރަދުކޮށްފައިވާއިރު މިއީ ޕޭ ހާމަނައިޒޭޝަން ސިޔާސަތުގެ ސަބަބުން އައިސްފައިވާ ބަދަލެއްކަމަށް ރިޕޯޓްގައި ވަނީ ބުނެފައެވެ.
ސޮވެރިން ޑިވެލޮޕްމަންޓް ފަންޑަށް (އެސް.ޑީ.އެފް) ޖަމާކުރި އަދަދުވެސް ވަނީ 2.5 އިންސައްތަ އިތުރުވެ، 287.1 މިލިޔަން ރުފިޔާއަށް އަރާފައެވެ. ބޭރު ފައިސާގެ އާމްދަނީއަށް ބަލާއިރު، މި މުއްދަތުގައި 222.8 މިލިޔަން އެމެރިކާ ޑޮލަރު ދައުލަތަށް ލިބިފައިވާކަމަށް މާލީ ވުޒާރާގެ ރިޕޯޓުން ދައްކައެވެ.