މި ދުނިޔެމަތީގައި އުފާވެރިކަމާއި ބާއްޖަވެރިކަން ލިބޭނީ އެއް މުއުމިނާ އަނެއް މުއުމިނާއާއި ދޭތެރޭގައި އޮންނަ ގުޅުން ރަނގަޅުވުމުންކަމަށް ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، މައުމޫން ފައުންޑޭޝަނުން ބޭއްވި 2 ވަނަ އިޙްޔާ ޖަލްސާގައި ވާހަކަދައްކަވަމުންނެވެ.
މި ފޯރަމްގައި ރައީސް މައުމޫން ވާހަކަދައްކަވާފައިވަނީ "މުއުމިނުން ވާކަންކަށަވަރީ، އަޚުންތަކެއް ކަމުގައި" މި މައުޟޫއަށެވެ. މި މައުޟޫއަށް ވާހަކަދައްކަވަމުން ރައީސް މައުމޫން ވިދާޅުވީ، އެއް މުއުމިނަކު އަނެއް މުއުމިނަކާއި ދެމެދު އޮންނަ ގުޅުން ވާންވާނީ އަޚުންތަކެއްގެ ގޮތުގައި އޮންނަ ރީތި ގުޅުމަކަށްކަމަށެވެ. ދުނިޔެމަތީގައި އުފާވެރިކަމާއި ބާއްޖަވެރިކަން ލިބޭނީ އޭރުންކަމަށް ވިދާޅުވިއެވެ.
2 އަޚުންގެ ދެމެދުގައި ހަމަނުޖެހުމެއް ވާނަމަ އެކަންތައްތައް ހައްލުކުރަންޖެހޭކަން ފާހަގަކުރައްވާ، ރައީސް މައުމޫން ވިދާޅުވީ، އެދެމީހުން ވާހަކަދައްކާ އެކަންކަން ހައްލު ކުރަން މާތް ﷲ ޤުރްއާނުގައި ބަޔާންކުރައްވާފައިވާކަމަށެވެ.
"އެއް މުއުމިނާ އަނެއް މުއުމިނާއާއި ދޭތެރޭގައި އޮންނަ ގުޅުން ވާންޖެހޭނީ އަޚުންގެ މެދުގައި އެއްބަނޑު އެއްބަފާ ބައެއްގެ މެދުގައި އޮންނަ ފަދަ ރީތި ލޮބުވެތި ގުޅުމަކަށް. އެކަކު އަނެކަކަށް ކަމޭހިތައި، އެކެއްގެ ހައްޤުތައް ރައްކާތެރިކޮށް އެކަކު އަނެކަކަށް އެހީތެރިވުމުގެ މައްޗަށް މި ގުޅުން އޮންނަންޖެހޭނީ ބިނާވެފައި. އެގޮތުގެ މަތިން އަޅުގަނޑުމެން ދިރިއުޅެމުން ގެންދާކަމަށް ވަނީނަމަ މި ދުނިޔޭގެ ހަޔާތުގައި އަޅުގަނޑުމެންނަށްވެސް އުފާވެރިކަމާއި، ބާއްޖަވެރިކަމާއި ހަމަޖެހުން ލިބޭނެ." ރައީސް މައުމޫން ވިދާޅުވިއެވެ.
ކޮންމެ މީހަކުވެސް އެމީހެއްގެ ދިރިއުޅުން ތަނަވަސްކުރަން މަސައްކަތް ކުރަންޖެހޭކަމަށް ރައީސް މައުމޫން ވިދާޅުވިއެވެ. އެމީހެއްގެ އަނބިދަރިންނަށް ރަނގަޅު ދިރިއުޅުމެއް ހޯދައިދޭން މަސައްކަތް ކުރަންޖެހޭކަމަށާއި އެމީހެއްގެ ޤައުމަށް ފައިދާވާ ކަންކަން ކޮށްދޭންޖެހޭކަން ފާހަގަކުރެއްވިއެވެ. މިފަދަ ކަންތައްތައް ކުރުމަކީ އަޅުގަނޑުމެންގެ މައްޗަށް ވާޖިބުވެފައިވާކަމެއްކަމަށް ވިދާޅުވިއެވެ. ލިބިފައިވާ މުދަލާއި ފައިސާގެ ތަނަވަސްކަންވެސް މިކަހަލަ ކަންތައްތަކުގައި ބޭނުންކުރަންޖެހޭކަމަށާއި، މާތް ﷲ އަންގަވާފައިވާ ހަޔާތެއް ލިބޭނީ އެއިރުންކަމަށް ރައީސް މައުމޫން ވިދާޅުވިއެވެ.
މައުމޫން ފައުންޑޭޝަނުން މިއަހަރުގެ ރަމަޟާންމަހަށް ޚާއްސަކޮށްގެން ބޭއްވި ދެވަނަ އިޙްޔާ ޖަލްސާގެ ތެރެއިން--
މި ފޯރަމްގައި ދިވެހިރާއްޖޭގެ އިސްލާމީ ޔުނިވަރސިޓީގެ ސީނިއަރ ލެގްޗަރަރ އަލްއުސްތާޛާ ސާމިޔާ ޒަކަރިއްޔާވެސް ވަނީ ވާހަކަފުޅުދައްކަވާފައެވެ. އެކަމަނާ ވާހަކަދައްކަވާފައިވަނީ "އިންސާނާގެ ދަތުރު ދުނިޔޭގެ އިމްތިޚާނުން އާހިރަތުގެ ބާއްޖަވެރިކަމަށް" މި މައުޟޫއަށެވެ.
އަލްއުސްތާޛާ ސާމިޔާ ޒަކަރިއްޔާ ވިދާޅުވީ، މި ދަތުރަކީ އާހިރަތުގެ ބާއްޖަވެރިކަމަށް ކުރާ ދަތުރެއްކަމަށެވެ. މި ދަތުރުގެ ސަލާމަތީ ކަންކަން އެހެން ދަރުރުތަކާއި ތަފާތުވެދާނެކަމަށެވެ. މި ދަތުރުގެ ކަމަރަކީ ތަގުވާވެރިކަމާއި އީމާންތެރިކަންކަމަށް ވިދާޅުވިއެވެ. މިއީ ހީކުރާހާ އަމާން އޮމާން ދަތުރެއް ނޫންކަމަށާއި، މި ވަނީ ވަރަށް ބޮޑު އިމްތިޚާނެއްގެ ތެރޭގައިކަމަށް އެކަމަނާ ފާހަގަކުރެއްވިއެވެ.
"ހަޔާތުގެ ދަތުރު ފެށިގެން އަންނަނީ ދުނިޔެއަށް އަންނަ ހިސާބުން. ދަތުރު ނިމެނީ އަޖަލު ނިމޭ ހިސާބުން. މީގެ މުހިންމު ކަމަކީ ދަތުރުގައި 2 ދުނިޔެ ބާއްޖަވެރިވާކަމެއް ކުރެވުމުން. ކުރަން ހުރި ހުރިހައި ކަމެއް ބަހައްޓާފައި މަންޒިލާއި އަރާ ހަމަވުމުން ހުރިހައި ތަކެއްޗެއް ބަހައްޓާފައި ފައިބަން ޖެހޭނީ. އަތުގައި އޮންނާނީ އަމަލުގެ ކާޑު. ދުނިޔެމަތީގައި ކުރި އަމަލު . ދެން ދާން އޮތް މަންޒިލްގައި ފައިދާ ކުރާނީ ދަތުރު ކާޑުން. ބައެއް މީހުންނަށް އަރަނި ކާޑެއް ލިބިދާނެ. އަނެއްބައި މީހުންނަށް ދަރަނި ކާޑެއް ލިބިދާނެ." އަލްއުސްތާޛާ ސާމިޔާ ޒަކަރިއްޔާ ވިދާޅުވިއެވެ.
އަލްއުސްތާޛާ ސާމިޔާ ޒަކަރިއްޔާ ވިދާޅުވީ، ފުރިހަމަ މުސްލިމަކަށް ވެގެންނޫނީ އާހިރަތް ބައްޖަވެރި ނުވާނެކަމަށާއި އިމާންތެރިކަން ވަރުގަދަކުރަން މަސައްކަތް ކުރަންޖެހޭކަމަށެވެ. އަޅާނުލާ ދޫކޮށްލައިފިނަމަ އީމާންތެރިކަން ބަލިކަށިވާނެކަމަށާއި ހިތްތައް ސާބިތުކުރައްވާތޯ ދުއާވެސް ކުރަންޖެހޭކަން ފާހަގަކުރެއްވިއެވެ.
ރިވެތި އަހުލާގަކީ ސުވަރުގެ ގެންދާކަމެއްކަމަށާއި އާހިރަތް ބާއްޖަވެރިވާނީ ދުނިޔޭގައި އުޅޭއިރު އެހެންމީހުންނަށް ވިސްނުމުންކަމަށް އަލްއުސްތާޛާ ސާމިޔާ ޒަކަރިއްޔާ ވަނީ ވިދާޅުވެފައެވެ.