ޓުވެންޓީ20 ކްރިކެޓް މުބާރާތުގެ ސެމީ ފައިނަލުގައި އިންޑިޔާ އާއި އިންގްލޭންޑް އަދި ދެކުނު އެފްރިކާ އާއި ނިއުޒީލޭންޑް ވާދަކުރަން ޖެހިއްޖެ އެވެ.

މުބާރާތުގެ ސެމީ ފައިނަލުގެ ފަހު ޖާގަ އިންޑިޔާ ހޯދީ ރޭ ކުޅުނު މެޗުގައި ވެސްޓް އިންޑީޒްގެ މައްޗަށް ފަސް ވިކެޓުން ކުރި ހޯދައިގެންނެވެ. މި މެޗުގައި ވެސްޓް އިންޑީޒް ފުރަތަމަ ކުޅެން ނުކުމެ 20 އޯވަރުގެ ތެރޭގައި ހެދީ 195 ލަނޑެވެ. އިންޑިޔާ މެޗު ކާމިޔާބު ކުރީ ބާކީ ހަތަރު ބޯޅަ އޮއްވައި 199 ލަނޑު ހަދައިގެންނެވެ. މި މެޗުގައި އިންޑިޔާގެ ސެމްސޮން ވަނީ 97 ލަނޑު ހަދައިފަ އެވެ.

މުބާރާތުގެ ސެމީ ފައިނަލުގެ ފުރަތަމަ މެޗު ކުޅޭނީ ބުދަ ދުވަހުގެ ރޭގައި ދެކުނު އެފްރިކާ އާއި ނިއުޒީލޭންޑެވެ. އިންޑިޔާ އާއި އިންގްލޭންޑްގެ މެޗު ކުޅޭނީ ބުރާސްފަތި ދުވަހުގެ ރޭގަ އެވެ. މޮޅުވާ ދެ ޓީމު މުބާރާތުގެ ފައިނަލް މެޗުގައި ބައްދަލު ކުރާނީ މާޗު އަށް ވަނަ ދުވަހު އެވެ.

އިންޑިޔާ އާއި ސްރީލަންކާގައި ކުޅޭ މުބާރާތުގެ އެންމެ ފަހުގެ ޗެމްޕިއަން ޓީމަކީ އިންޑިޔާ އެވެ.