ރާއްޖޭގެ އިޖުތިމާޢީ ފޭރާން ވަރުގަދަކޮށް ދުޅަހެޔޮ މުޖުތަމަޢެއް ބިނާކުރުމަށް ދިވެހިރާއްޖޭގެ އަޑަކީ މުހިއްމު ބައިވެރިއެއް ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސެއިން މުޙައްމަދު ލަތީފް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ، ދިވެހިރާއްޖޭގެ އަޑުގެ ބާއްޖަވެރި ހެނދުނެއް ޕްރޮގްރާމްގައި ވާހަކަފުޅު ދައްކަވަމުންނެވެ.
ދިވެހިރާއްޖޭގެ އަޑުގެ 63 ވަނަ އަހަރީ ދުވަހާއި ގުޅިގެން ކުރިއަށް ގެންދިޔަ ޚާއްސަ "ބާއްޖަވެރި ހެނދުނެއް" ޕްރޮގްރާމްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސެއިން މުޙައްމަދު ލަތީފް ވިދާޅުވީ، ވޭތުވެދިޔަ 63 އަހަރު ދިވެހިރާއްޖޭގެ އަޑުން ފޯރުކޮށްދެއްވާފައިވަނީ ޤައުމީ ޚިދުމަތެއް ކަމަށެވެ. އަދި ޤައުމުގެ އިޖުތިމާޢީ ފޭރާން ހަރުދަނާކޮށް، ރައްޔިތުންގެ ދުޅަހެޔޮކަން ކަށަވަރު ކުރުމަށް ވޭތުވެދިޔަ 63 އަހަރުގެ ތެރޭގައި ދިވެހިރާއްޖޭގެ އަޑުން މުހިއްމު މަސައްކަތްތަކެއް ކުރައްވާފައިވާ ކަމަށް ވިދާޅުވިއެވެ. އެގޮތުން ދިވެހިރާއްޖޭގެ އަޑުން ވޭތުވެދިޔަ ދިގު މާޒީގައި ތެދު ޚަބަރާއި، މަޢުލޫމާތު ގެނެސްދިނުމަށް މަސައްކަތް ކުރެއްވި ހުރިހާ ވެރިންނަށާއި މުވައްޒަފުންނަށް ވަނީ ޝުކުރު އަދާކުރައްވާފައެވެ.
ދިވެހިރާއްޖޭގެ އަޑުގެ ބާއްޖަވެރި ހެނދުނެއް ޕްރޮގްރާމްގެ ތެރެއިން. / ފޮޓޯ:ޕީއެސްއެމް ނިއުސް
"ޤައުމީ ޚިދުމަތެއްގެ ގޮތުގައި ދިވެހިރާއްޖޭގެ އަޑު މެދުވެރިކޮށް މެދުކެނޑުމެއްނެތި ޚަބަރާއި މަޢުލޫމާތު ފޯރުކޮށްދެއްވުމަށް ކުރެއްވި މަސައްކަތަށާއި، ރާއްޖޭގެ އިޖުތިމާޢީ އަދި ދުޅަހެޔޮ މުޖުތަމަޢެއް ބިނާކުރުމަށް ވަރަށް މުހިއްމު މަސައްކަތްތަކެއް ކުރެއްވި، އެކަމުގައި އުޅުއްވި ކުރީގެ ވެރިންނާއި، މިހާރުގެ ވެރިން އަދި މުވައްޒަފުންނަށް ވަރަށް ބޮޑަށް ޝުކުރު ދަންނަވަން." ނައިބު ރައީސް ވިދާޅުވިއެވެ.
ރޭޑިއޯއާއެކު އޮތް އެންމެ ހިތްގައިމު ހަނދާނެއްގެ ގޮތުގައި ނައިބު ރައީސް ފާހަގަކުރެއްވީ، ރޭޑިއޯ މެދުވެރިކޮށް ގެނެސްދެމުން ދިޔަ ފުޓުބޯޅަ ކޮމެންޓްރީގެ ތެރެއިން ފުޓުބޯޅައަށް ޖެހުނު ލޯތްބެވެ. ސިޔާސީ މައިދާނަށް 2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ހިނގާދިޔަ ހަމަނުޖެހުމުގެ ތެރޭގައި އެކަންކަން އެންމެ ގާތުން ބެލުމުގައި ހަރަކާތްތެރިވީ ހިއުމަން ރައިޓްސް ކޮމިޝަނުގެ މުވައްޒަފެއްގެ ގޮތުގައި ކުރެއްވި މަސައްކަތް ކަމަށް ނައިބު ރައީސް ވިދާޅުވިއެވެ.