އަވަށްޓެރި ސްރީލަންކާއަށް ކުރިމަތިވި ކާރިސާއިން އެޤައުމަށް އެހީތެރިކަން ފޯރުކޮށްދިނުމަށް މަހަލްދީބް ފައުންޑޭޝަނުން އެއްކުރި ތަކެތި މޯލްޑިވިއަންގެ ފްލައިޓްގައި ސްރީލަންކާއަށް ފޮނުވައިފިއެވެ.
މޯލްޑިވިއަންއިން ކުރި ޕޯސްޓެއްގައި ވިދާޅުވެފައިވަނީ މަހަލްދީބް ފައުންޑޭޝަންގެ ފަރާތުން ސްރީލަންކާގެ ރައްޔިތުންނަށް ފޮނުވުމަށް އެއްކޮށްފައިވާ 3.8 ޓަނުގެ މުދާ އެ އެއަރލައިނުން އެ ޤައުމަށް ގެންގޮސްދީފައިވާކަމަށެވެ. މީގެތެރޭގައި އަސާސީ ތަކެތި ހިމެނެއެވެ.
Standing with Sri Lanka, together. 🇲🇻 🇱🇰
The Mahaldeeb Foundation, Meegaath and Maldivian have joined together to transport essential goods in support of ongoing relief efforts in Sri Lanka.#Maldivianaeropic.twitter.com/VBevZRIJU9— MaldivianAero (@MaldivianAero)December 7, 2025
ތޫފާން ދިތުވާގެ ސަބަބުން ސްރީލަންކާއަށް ލިބުނު ގެއްލުމުން އަރައިގަނެ އެހީތެރިކަން ފޯރުކޮށްދިނުމަށް އެންމެ ފުރަތަމަ އިސްނެގި ޤައުމަކީ ރާއްޖެއެވެ. "ސިލޯނާއެކު ދިވެހީން" ގެ ނަމުގައި ޕަބްލިކް ސަރވިސް މީޑިއާއިން އިސްނަގައިގެން ވަނީ ޚާއްސަ ޓެލެތޯނެއްވެސް ކުރިއަށްގެންގޮސްފައެވެ.
މި ޓެލެތޯނަށް ސަރުކާރުގެ ގިނަ ވުޒާރާތަކާއި، އިދާރާތަކާއި، ކުންފުނިތަކާއި އަމިއްލަ ފަރާތްތަކުންވެސް ވަނީ އެހީތެރިކަން ފޯރުކޮށްދީފައެވެ. އެގޮތުން ޓެލެތޯން މެދުވެރިކޮށް ޖުމުލަ 834,843.98 ޑޮލަރު ލިބިފައިވެއެވެ. މި ފައިސާ މިހާރު ވަނީ ސްރީލަންކާގެ ސަރުކާރަށް ހަވާލުކޮށްފައެވެ.
ދިވެހިން ލަންކާއަށްވި އެހީތެރިކަން ފާހަގަކޮށް އެކަމަށް ޝުކުރުއަދާކުރުމުގެ ގޮތުން ރާއްޖޭގައި އުޅޭ ލަންކާގެ ރައްޔިތުން ބޭއްވި އެއްވުމުގެ ތެރެއިން / ފޮޓޯ: ޕީއެސްއެމް ނިއުސް
ރާއްޖެއިން އިސްނަގައިގެން ސްރީލަންކާއަށް އެހީތެރިވުމަށް ކުރިއަށްގެންދިޔަ ހަރަކާތައް ސްރީލަންކާގެ ވަރަށް ގިނަ އަދަދެއްގެ ރައްޔިތުން ވަނީ ޝުކުރު އަދާކޮށްފައެވެ. ސޯޝަލް މީޑިއާގެ އިތުރުން ރާއްޖޭގައި ދިރިއުޅޭ ސްރީލަންކާގެ ރައްޔިތުން ވަނީ ޝުކުރު އަދާކުރުމަށް އެއްވުމެއްވެސް ބާއްވާފައެވެ.