ދެކުނު އިރުމަތީ އޭޝިޔާއަށް އެރި ތޫފާނެއްގެ ސަބަބުން ތިން ޤައުމަކަށް ކުރަމުންދާ މޫސުމީ ވިއްސާރައިގައި މަރުވި މީހުންގެ ޢަދަދު 600 އަށް އަރާފައިވާ ކަމަށް ރަސްމީ އިދާރާތަކުން ބުނެފިއެވެ.

މަލާކާ ސްޓްރެއިޓްގައި އުފެދިފައިވާ ބާރުގަދަ ތޫފާނެއްގެ ސަބަބުން އިންޑޮނޭޝިޔާއާއި މެލޭޝިޔާއާއި ތައިލެންޑަށް ވަނީ ބޮޑެތި ގެއްލުންތައް ލިބިފައެވެ. އެ ތޫފާނުގެ ސަބަބުން ފާއިތުވި ހަފްތާގެ ތެރޭގައި ތިން ޤައުމަށް ވެސް ވަނީ ބޯކޮށް ވާރޭ ވެހި އާދަޔާ ޚިލާފަށް ވައި ގަދަވެފައެވެ. ތޫފާނާ ގުޅިގެން ހިނގި ހާދިޘާތަކުގައި އިންޑޮނޭޝިޔާގައި 435 މީހުން، ތައިލެންޑުގައި 170 މީހުން އަދި މެލޭޝިޔާގައި ތިން މީހުން ވަނީ މަރުވެފައެވެ.

ތޫފާނުގެ އަސަރު ދެކުނު ތައިލެންޑުގެ ތިން މިލިޔަނެއްހާ މީހުންނަށް ކޮށްފައިވާއިރު ހުޅަނގު އިންޑޮނޭޝިޔާގެ 1.1 މިލިޔަން މީހުންނަށް ވެސް ގެއްލުންތައް ލިބިފައެވެ. މެލޭޝިޔާ ހިމެނޭ ގޮތަށް ތިން ޤައުމުން ވެސް އެތައް ސަތޭކަ ހާސް ބަޔަކު ވަނީ ރައްކާތެރި ސަރަޙައްދުތަކަށް ގެންގޮސްފައެވެ. މެލޭޝިޔާގައި ވެސް އަދިވެސް 18،700 މީހުން ވަގުތީ ހިޔާތަކުގައި އެބަ ތިއްބެވެ.

ޤައުމުތަކުގައި ހެދިފައިވާ ފެންގަނޑުތައް ހިނދެމުންދާ ނަމަވެސް ތިން ޤައުމުގައި ވެސް މީހުން ސަލާމަތް ކުރުމުގެ މަސައްކަތް ކުރަމުންދާ އިދާރާތަކުން އަދިވެސް ދަނީ އެ މަސައްކަތުގައި ބޮޑެތި ދަތިތަކާ ކުރިމަތިލަމުންނެވެ.

މި ތިން ޤައުމުގެ އިތުރުން ސްރީ ލަންކާ ކައިރީގައި އުފެދުނު ތޫފާން ދިތުވާގެ ސަބަބުން އެ ޤައުމުގެ ޙާލަތު ވެސް ވަނީ ވަރަށް ބޮޑަށް ގޯސްވެފައެވެ. ތޫފާނުގެ ސަބަބުން އެ ޤައުމުގައި މިހާތަނަށް 334 މީހުން މަރުވެފައިވާއިރު، 370 މީހުން ވަނީ ވީނުވީއެއް ނޭނގި ގެއްލިފައެވެ.