ސްރީލަންކާގެ ވެރިރަށް ކޮލަމްބޯގެ މާލަބޭގައި ފެންބޮޑުވުމުގެ ސަބަބުން ގޭގައި ތާށިވެފައިތިބި ދިވެހި 3 އާއިލާއަކަށް އެހީތެރިކަން ދިވެހި ހައި ކޮމިޝަނުން ފޯރުކޮށްދީފައެވެ.
ސްރީލަންކާއަށް މިހާރު ކުރިމަތިވެފައިވާ ކާރިސާގައި އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ހައިކޮމިޝަނުން އަންނަނީ ހުއްޓުމެއް ނެތި ކުރަމުންނެއެވެ.
ޕީއެސްއެމްނިއުސްއަށް މަޢުލޫމާތު ދެއްވަމުން ހައިކޮމިޝަނަށް ވިދާޅުވީ ސްރީލަންކާގެ ކޮލަމްބޯގެ މާލަބޭގައި ފެންބޮޑުވުމުގެ ސަބަބުން ގޭގައި ތާށިވެފައިތިބި ދިވެހި 3 އާއިލާއަކަށް އެހީތެރިކަން ފޯރުކޮށްދީފައިވާކަމަށެވެ. އެ އާއިލާތަކުގައި ކުޑަކުދިން ހިމެނޭހެން 12 މީހުން ތިބިކަމަށެވެ. ހައިކޮމިޝަނުން ވިދާޅުވީ އެހީތެރިކަން ފޯރުކޮށްދިން އާޢިލާތައް އެމީހުންގެ އާއިލާގެ މީހުންނާއި ރައްޓެހިންގެ ގެތަކަށް ބަދަލުކޮށްފައިވާކަމަށެވެ. އަދި އެއް އާޢިލާއެއް އެމީހުން އަމިއްލައަށް ހޮޓަލަކަށް ބަދަލުވެފައިވާކަމަށް ހައިކޮމިޝަނުން ވިދާޅުވިއެވެ.
ގޭގައި ތާށިވެފައިތިބި ދިވެހި 3 އާއިލާއަކަށް އެހީތެރިކަން ފޯރުކޮށްދީފި. ފޮޓޯ: ހައިކޮމިޝަން
ގޭގައި ތާށިވެފައިތިބި އާޢިލާތައް އެހެން ސަރަޙައްދުތަކަށް ބަދަލުކޮށްފައިވަނީ އެ ސަރަޙައްދުތަކުގައި ހަރަކާތްތެރިވަމުންދިޔަ ފުލުހުންގެ އެހީތެރިކަމާއެކުގައެވެ. އެ ސަރަޙައްދުތަކުގައި 3 ފޫޓާއި 7 ފޫޓާ ދެމެދަށް ފެންބޮޑުވެފައިވެއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ދިވެހި ހައިކޮމިޝަންގެ މިނިސްޓަރ ކައުންސިލަރ ޙަލީމާތު ޝިޒްނާ ވިދާޅުވީ އެހީތެރިކަން ފޯރުކޮށްދިން މީހުން ރައްކާތެރި ހިސާބުތަކަށް ގެންދިޔުމަށްޓަކައި އެ ސަރަހައްދުގައި ހަރަކާތްތެރިވި ލަންކާގެ ރައްޔިތުންގެ އެހީތެރިކަން ލިބުނު ކަމަށެވެ. ޝިޒްނާ ވިދާޅުވީ ގެތަކަށް ފެން ވަނުމުގެ ސަބަބުން އެ ގެތަކުގެ ތިރީ ފަންގިފާލާގައި ހުރި ސާމާނަށް ގެއްލުން ލިބިފައި ހުންނާނެކަމަށް ލަފާކުރެވޭކަމަށާއި މުހިއްމު ތަކެއްތި ގޭގެ ރައްކާތެރި ހިސާބުތަކަށް ގެންގޮސްފައި ހުރިކަމަށެވެ. އަދި ސީދާ ލިބިފައި ހުރި ގެއްލުން ދެނެގަނެވޭނީ ފެންގަނޑު އެ ސަރަޙައްދުން ހިނދި އާންމު ހާލަތަކަށް އައުމުން ކަމަށް އޭނާ ވިދާޅުވިއެވެ.
"އަޅުގަނޑުމެންނަށް އަދި އެމީހުންނަކަށްވެސް މުދަލުގެ އެއްވެސް ރައްކާތެރިކަމެއް މިވަގުތަށް ކަށަވަރެއް ނުވާނެ. މުދަލަށް ލިބުނު ގެއްލުންވެސް ލިބޭނީ މާދަން ނުވަތަ އެހެން ވަގުތެއްގައި ނޫނީ އާންމު ހާލަތަށް އެޅުމުން އެ ހިސާބަށް ދެވިގެން." ހައިކޮމިޝަންގެ މިނިސްޓަރ ކައުންސިލަރ ޙަލީމާތު ޝިޒްނާ ވިދާޅުވިއެވެ.
ލަންކާގައި ތިބި އެހީތެރިކަން ބޭނުންވާ ދިވެހިންނަަށް އެހީވުމުގެ މަސައްކަތުގެ ތެރެއިން. ފޮޓޯ: ހައިކޮމިޝަން
ޝިޒްނާ ވިދާޅުވީ އެ ޤައުމުގައި ދިރިއުޅޭ ދިވެހިންގެ ތެރެއިން ނަންބަރު ލިބިފައިވާ އެންމެނަށް ގުޅާ ހާލު ބަލާފައިވަކަމަށެވެ. އެގޮތުން 1273 ފަރާތަކަށް ގުޅާ ހާލު ބަލާފައިވާކަމަށެވެ. އދި އެމީހުންގެ ހާލަތަު ރަނގަޅުކަމަށް މަޢުލޫމާތު ލިބިފައިވާކަމަށާއި އެހީތެރިކަން ބޭނުންވާނަމަ އެންގުމަށް އިލްތިމާސްކޮށްފައިވާކަމަށެވެ.
ހައިކޮމިޝަނުން ވަނީ މި ދަނޑިވަޅުގައި އެ ޤައުމުގައި ދިރިއުޅޭ މީހުން އެއްވެސް އެހީތެރިކަމެއް ބޭނުންވާނަމަ ލަސްނުކޮށް ހައިކޮމިޝަނަށް އެންގުމަށް އިލްތިމާސްކޮށްފައެވެ. އަދި ސްރީލަންކާއަށް ދަތުރުކުރާ ފަރާތްތަކުން ދަތުރުފެށުމުގެ ކުރިން އެ ޤައުމުގެ ހާލަތާއި ކަމާ ގުޅުން ހުރި ފަރާތްތަކާ ގުޅައިގެން ކަންކަން ކަށަވަރު ކުރުމަށްފަހު ދަތުރުކުރުމަށް އިލްތިމާސްކޮށްފައެވެ.
ސްރީލަންކާގައި ތިބި ދިވެހިންނަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނައިރު މިހާތަނަށް 45 އަށްވުރެ ގިނަ މީހުންނަށް އެހީތެރިކަން ވަނީ ފޯރުކޮށްދީފައެވެ. ހައިކޮމިޝަނުން ވިދާޅުވީ މިހާރުވެސް އެހީތެރިކަން ބޭނުންވާ ފަރާތްތަކަށް އެހީވުމުގެ މަސައްކަތްތައް ހުއްޓުމެއް ނެތި ކުރިއަށްދާނެކަމަށެވެ.
ހައިކޮމިޝަނުން އަންނަނީ ލަންކާގައި ތިބި އެހީ ބޭނުންވާ ދިވެހިންނަށް އަސާސީ އެހީތެރިކަން ފޯރުކޮށްދެމުންނެވެ. މިގޮތުން ކާއެއްޗެއްސާއި ފެން ދަނީ ފޯރުކޮށްދެމުންދެއެވެ.