ސްރީލަންކާއަށް ދިމާވެފައިވާ ދަތި އުނދަގޫ ދަނޑިވަޅުގައި ދިވެހި ސަރުކާރުން ވެދިން އެހީތެރިކަމަށް ސްރީލަންކާގެ ސަރުކާރުން ޝުކުރު އަދާކުރައްވައިފިއެވެ.
ދިވެހި ސަރުކާރުން ވަނީ ސްރީލަންކާއަށް ކުރަމުންދާ ވިއްސާރައާ ގުޅިގެން، އެޤައުމަށް ފައިސާގެ އެހީގެ ގޮތުގައި 50،000 އެމެރިކާ ޑޮލަރު އަދި 25،000 މަސްދަޅު ކޭސް ހަދިޔާ ކުރަން ނިންމާފައެވެ. ސަރުކާރުގެ މި ނިންމުމަކީ، "ޑިޓްވާ" ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ނިންމި ނިންމުމެއްކަމަށް ޚާރިޖީ ވުޒާރާގެ ބަޔާނުގައި ވަނީ ވިދާޅުވެފައެވެ.
މިދަނޑިވަޅުގައި ދިވެހި ސަރުކާރުން ވެދިން އެހީތެރިކަން ފާހަގަކޮށް ސްރީލަންކާގެ ސަރުކާރުން އެކްސްގައި ކުރެއްވި ޕޯސްޓުގައި ވިދާޅުވީ، ސައިކްލޯން "ޑިޓްވާ" ގެ ސަބަބުން ސްރީލަންކާއަށް ކުރިމަތިވި ގެއްލުންތަކުން އަރައިގަތުމަށް ދިވެހި ސަރުކާރުން ދޭން ނިންމި އެހީއަށް ޝުކުރު އަދާކުރާކަމަށެވެ.
Thank You Maldives 🇲🇻 🙏
The Government of Maldives has announced USD 50,000 in financial aid along with 25,000 cases of tuna cans to support Sri Lanka’s relief efforts following the devastation caused by Cyclone Ditwah.
🇲🇻🇱🇰
A gesture of solidarity from a close neighbour,…pic.twitter.com/h3Z9Bl2m9U— Sri Lanka Tweet 🇱🇰 (@SriLankaTweet)November 29, 2025
މިއީ ގާތް އަވަށްޓެރިއެއްގެ ފަރާތުން ފާޅުކުރި އެއްބައިވަންތަކަމުގެ ހިތްވަރުގަދަ މިސާލެއްގެ ގޮތުގައި ސްރީލަންކާގެ ސަރުކާރުން ވަނީ ވިދާޅުވެފައެވެ. އަދި މިކަމުން ދެ ޤައުމުގެ ވަރުގަދަ ގުޅުމާއި ރަޙުމަތްތެރިކަން ދައްކުވައިދޭކަމަށް ސްރީލަންކާގެ ސަރުކާރުން ވަނީ ވިދާޅުވެފައެވެ.
ތޫފާން ޑިޓްވާގެ ސަބަބުން ސްރީ ލަންކާއަށް ކުރަމުންދާ ބޯ ވިއްސާރައިގައި އެތައް ބަޔަކު ވަނީ މަރުވެފައެވެ. އަދި މިއީ ސުނާމީއަށްފަހު އެ ޤައުމަށް ކުރިމަތިވި މިފަދަ އެންމެ ނުރައްކާތެރި ކާރިސާކަމަށް އެ ޤައުމުގެ ރިޕޯޓްތައް ބުނެއެވެ.