07 ޑިސެމްބަރ 2016 - 14:18
ނ. އިރުފުށި ރިސޯޓް ހިންގުން ހިލްޓަން އިންޓަނޭޝަނަލް އަތުން އަތުލި މައްސަލާގައި ހިލްޓަން އަށް ބޮޑު ބަދަލެއް ދިނުމަށް ސަން ޓްރެވަލްސްގެ އެންޑް ޓުއާސްގެ މައްޗަށް އާބިޓްރޭޝަނުން އަންގާފައި ވަނިކޮށް، ހިލްޓަން އަތުން 16 މިލިއަން ޑޮލަރު ހޯދަން ސަން ޓްރެވަލްސް އިން ސިވިލް ކޯޓުގައި ދައުވާކޮށްފި އެވެ.
ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަދި އެމްޑީއޭގެ ލީޑަރު އަހުމަދު ސިޔާމް މުހައްމަދުގެ އިރުފުށި ރިސޯޓް ހިންގަން ހިލްޓަނާ އެކު ސޮއި ކުރި އެއްބަސްވުން އުވާލައި، އެ ރިސޯޓް އަތުލި މައްސަލާގައި ހިލްޓަން އަށް 24 މިލިއަން ޑޮލަރު (370 މިލިއަން ރުފިޔާ) ދޭން ސިންގަޕޫރު އާބިޓްރޭޝަނުން ސަން ޓްރެވަލްސް އަށް އަންގާފައި ވަނިކޮށް، ހިލްޓަންއާ ދެކޮޅަށް ސަން ޓްރެވަލްސް އިން ދައުވާކުރީ މަކަރާއި ހީލަތުން އެއްބަސްވުމުގައި ސޮއި ކުރުވި ކަމަށް ބުނެ އެވެ.
ސަން ޓްރެވަލްސް އިން ކޯޓުގައި ދައުވާކުރީ މަކަރާއި ހީލަތުން އެ އެއްބަސްވުމުގައި ސޮއި ކުރުވާފައިވާތީ އާއި އެ އެއްބަސްވުމާ ޚިލާފްވެފައި ވާތީ، އެއްބަސްވުން ބާތިލްކޮށް، އަދި ލިބުނު ގެއްލުމުގެ ބަދަލު ހޯދުމަށެވެ. ބަދަލުގެ ގޮތުގައި ސަން ޓްރެވަލްސް އިން އެދެނީ 16.6 މިލިއަން ޑޮލަރު (255 މިލިއަން ރުފިޔާ) ނަގައި ދިނުމަށެވެ.
އެ މައްސަލަ މިހާރު އޮތީ ސިވިލް ކޯޓުގައި ފައިސާ އާއި މުދަލާ ބެހޭ ބޮޑެތި މައްސަލަތައް ބަލާ ޑިވިޝަންގައި ކަމަށް އެނގިފައިވެ އެވެ.
އިރުފުށި ހިންގުން ހިލްޓަން އިންޓަނޭޝަނަލްއާ 2009 ގައި ހަވާލު ކުރުމަށް ފަހު 2013 ގައި ސަން ޓްރެވަލްސް އިން ވަނީ އެތަން އަތުލައިފަ އެވެ.
ހިލްޓަން އަށް 24 މިލިއަން ޑޮލަރު ދޭން އާބިޓްރޭޝަނުން އެންގި އެންގުން ތަންފީޒު ކުރަން ހިލްޓަނުން ވެސް ސަން ޓްރެވަލްސްއާ ދެކޮޅަށް ދައުވާކުރި އެވެ. އެކަމަކު ސިވިލް ކޯޓުން މިމަހު ނިންމީ އާބިޓްރޭޝަންގެ ގާނޫނުގެ އޮތްގޮތުން، އާބިޓްރޭޝަންގެ އެ ނިންމުން ތަންފީޒުކޮށް ދެވޭނީ ހައި ކޯޓަށް ކަމަށެވެ.
އާބިޓްރޭޝަންގެ ނިންމުން ތަންފީޒުކޮށް ދެވޭނީ ހައި ކޯޓަށް ކަމަށް ސިވިލް ކޯޓުން ނިންމިޔަސް އާބިޓްރޭޝަންގެ މައްސަލަތައް ބެލުމާ ބެހޭގޮތުން ހައި ކޯޓުން ހަދާފައިވާ ގަވާއިދު ބުނާގޮތުން އާބިޓްރޭޝަން ޓްރައިބިއުނަލްގެ ނިންމުން ތަންފީޒު ކުރާނީ ކޯޓުތަކުގެ ހުކުމްތައް ތަންފީޒު ކުރަން އޮންނަ އުސޫލުގެ މަތިންނެވެ.