15 އޮކްޓޯބަރ 2021 - 06:45
އދ. ދަނގެތީގައި އަނިޔާވެރި ގޮތަކަށް މަރައިލާފައި އޮތް ވިޔަފާރިވެރިޔާ މަހުމޫދު އަބޫބަކުރުގެ ހަށިގަނޑުގެ ޓެސްޓުތަކެއް ހެދުމަށް މާލެ ފުރުވައިލައިފި އެވެ.
މަހުމޫދަށް ވީނުވީއެއް ނޭނގިގެން ރަށުގެ ރައްޔިތުން ނުކުމެ އިއްޔެ ހެނދުނު އޭނާ ހޯދަނިކޮށް މެންދުރު 2:30 ހާއިރު އޭނާގެ ހަށިގަނޑު ފެނުނީ ފަޅު ގޯއްޗެއްގެ ވަޅުގަނޑަކަށް ބޯކޮޅު ވަތަށް ވައްޓާލާފައި އޮއްވަ އެވެ. އޭނާގެ ބޯކޮޅުގައި އަދި ފައިގައި ވެސް އޮތީ ގޯނި އައްސައިފަ އެވެ.
ހަށިގަނޑުގައި ހުރި ޒަހަމްތައް ބެލުމަށް ޓެސްޓު ހެދުމަށް ފުލުހުން މަހުމޫދުގެ ހަށިގަނޑު މާލެ އަށް ގެންދިއުމަށް އާއިލާ އިން އެންމެ ފުރަތަމަ ދެކޮޅު ހެދި އެވެ.
އެ މީހުން ބޭނުންވީ ހަށިގަނޑު ކުނިވާތީ ވީހާ ވެސް އަވަހަކަށް ވަޅުލާށެވެ. ނަމަވެސް ފުލުހުންގެ މަސައްކަތުގެ ލަސް ކަމުން ހަށިގަނޑު ގިނަ އިރުތަކެއް ވަންދެން ބާއްވަން ޖެހުމުން އާއިލާއިން ނުރުހުން ފާޅު ކުރި އެވެ.
އެކަމަކު، ފަހުން ފުލުހުން އެދުނު ގޮތަށް އާއިލާ އިން އެއްބަސްވުމުން ހަށިގަނޑު މާލެ ގެންދަން ނިންމި އެވެ. އެނގިފައިވާ ގޮތުގައި މަހުމޫދުގެ ހަށިގަނޑު މާލެ ގެންގޮސް ޓެސްޓު ހެދުމަށް ފަހު ވަޅުލަން މިއަދު އަނބުރާ ފޮނުވާލާނެ ކަމަށް ފުލުހުން ވަނީ އޭނާގެ އާއިލާ އަށް އަންގައިފަ އެވެ.
ފުލުހުންގެ ލޯންޗެއްގައި މަހުމޫދުގެ ހަށިގަނޑު މާލެ އަށް ފުރުވައިލީ މިއަދު ހެނދުނު 5:40 ހާއިރު އެވެ.
ދަނގެތީގައި އެމްބިއުލާންސެއް ނެތުމުން މަހުމޫދުގެ ހަށިގަނޑު ބަނދަރާ ހަމައަށް ގެންދިޔައީ ރަށު ޕިކަޕެއްގަ އެވެ.
މަހުމޫދު މަރައިލި ކަމުގެ ތުހުމަތު ރަށުގެ އާންމުން ކުރަނީ އއ. ތޮއްޑޫން ދަނގެއްޗަށް ބަދަލުވި ބަޔަކަށެވެ. އޭގެ ތެރެއިން ދެ މީހަކަށް ރައްޔިތުން ހަމަލާ ދިނުމުން ފުލުހުން ވަނީ އެ މީހުން ފުލުހުންގެ ބެލުމުގެ ދަށަށް ގެންގޮސްފަ އެވެ.
ފުލުހުންގެ ބެލުމުގެ ދަށުގައި ތިބީ ތިން މީހެކެވެ. އޭގެ ތެރޭގައި ތޮއްޑު އަށް ނިސްބަތްވާ އުމުރުން 21 އަހަރުގެ އަންހެނަކު ވެސް ހިމެނެ އެވެ.
މަހުމޫދުގެ ހަށިގަނޑު ދުށް ފަރާތްތަކުން ބުނާ ގޮތުގައި އޭނާގެ ކަރަށް އަދި ބޮލަށް ވެސް ތޫނު އެއްޗަކުން ހަމަލާ ދީފައިވެ އެވެ. އަދި އޭނާގެ އަތަކަށް ވެސް ޒަހަމްވެފައިވާ ކަމަށް ބުނެފައިވެ އެވެ.
މަހުމޫދަށް ވީނުވީއެއް ނޭނގި ގެއްލުނީ ދަނގެތީގެ ބައެއް މީހުން ބުނާގޮތުގައި ސާފްޗެމްޕިއަންޝިޕް މުބާރާރުގައި ރާއްޖެ އާއި އިންޑިއާ ކުޅުނު މެޗަށް ފަހު ގެއިން ބޭރަށް ނުކުތް ފަހުންނެވެ. އެއަށްފަހު ދެން ފެނުނީ އޭނާ މަރާލާފައި އޮއްވަ އެވެ.