04 އޮކްޓޯބަރ 2021 - 23:33
ސްރީ ލަންކާގެ މައްޗަށް 3-2 ގެ ނަތީޖާއަކުން މިރޭ ކާމިޔާބު ހޯދައި ސާފް ޗެމްޕިއަންޝިޕުގެ ތާވަލުގެ އެއްވަނައިގައި ނޭޕާލް ފުރުސަތު ބޮޑުކޮށްފި އެވެ.
ލަންކާ ބަލިވުމުން ފައިނަލަށް ދިއުމުގެ ދަތުރު، އެ ޓީމަށް ވަނީ އިތުރަށް އުނދަގޫވެފަ އެވެ. ދެ މެޗު ކުޅެގެން އެ ޓީމަށް އެންމެ ޕޮއިންޓެއް ވެސް ނުލިބެ އެވެ. ނޭޕާލްގެ ދެ ވަނަ މެޗު ވެސް ކާމިޔާބުކޮށް އެ ޓީމު އެއްވަނައިގައި އޮތީ ދެ ޕޮއިންޓްގެ ލީޑަކާ އެކު އެވެ. ނޭޕާލުން ވަނީ ހަ ޕޮއިންޓް ހޯދައިފަ އެވެ. އިންޑިއާއާ މިއަދު އެއްވަރު ކުރި ބަންގްލަދޭޝް އަށް ލިބިފައި ވަނީ ހަތަރު ޕޮއިންޓެވެ.
މެޗުގެ 33 ވަަނަ މިނިޓްގައި ނޭޕާލުގެ ސުމަން ލާމާ ލަނޑު ޖެހީ، ލަންކާގެ ޑިފެންސަށް ހެދުނު ބޮޑު މިސްޓޭކަކުންނެވެ. ލާމާ އޭރިއާ ތެރެއަށް ބޯޅަ ހިފައިގެން ވަދެގެން ދިޔައިރު އޭނާ ހުއްޓުވުމަށް ލަންކާގެ ޑިފެންސަށް ކުރެވުނު މާބޮޑު ކަމެއް ނެތެވެ. އޭރިއާ ތެރެއަށް ވަދެ އޭނާ ފޮނުވާލި ބޯޅަ، ލަންކާގެ ކީޕަރު ސުޖަން ޕެރާރާ އަތުގައި ޖެހިފައި ގޮސް ޖެހުނީ ގޯލް ތެރޭގަ އެވެ. އެކަމަކު ގޯލްގެ ތެރެއަށް ބޯޅަ ނުވަންނަ ކަމަށް ބަލައި ސުޖަން ވަނީ ބޯޅަ ދިފާއު ކުރަން މަސައްކަތް ކޮށްފަ އެވެ. ދެން ވެސް އެނބުރި ނުކުތް ބޯޅަ އަށް ވެސް އަރައި ލާމާ ވަނީ ގޯލްގެ ތެރެއަށް ވައްދާލައިފަ އެވެ.
ނޭޕާލް ލަނޑު ޖެހުމުގެ ކުރިން، ލަންކާއިން ވަނީ ނާޕާލްގެ ގޯލަށް ނުރައްކާކޮށްފަ އެވެ. އެ ޓީމުގެ ޑިލޯން ޑި ސިލްވާ އަށް ލިބުނު ދެ ފުރުސަތެއްގައި ނުރައްކާ ކުރަން ފުރުސަތު ލިބުނެވެ. އޭރިއާގެ އަރިމަތިން އަރައި އޭނާ މަސައްކަތްކުރީ ނޭޕާލްގެ ކީޕަރު ކިރަން ބޯމަތިން ގޯލްގެ ތެރެއަށް ބޯޅަ އޮއްސާލުމަށެވެ. ނަމަވެސް އެ ބޯޅަ ދިޔައީ ގޯލް ހުރަސްކޮށް ބޭރަށެވެ.
ދެ ވަނަ ހާފުގައި ބަދަލުތަކާއެކު ވެސް ލަންކާ އަށް މެޗުގެ ތެރެއަށް ވަންނަން އުނދަގޫވި އެވެ. މެޗުގެ 52 ވަނަ މިނެޓްގައި އަންޖަން ބިސްޓާ ވަނީ ނޭޕާލްގެ ދެ ވަނަ ލަނޑު ކާމިޔާބު ކޮށްފަ އެެވެ. ލަންކާގެ އޭރިއާގެ ތެރެއިން ލާމާ ނަގައިދިން ބޯޅަ ކީޕަރު ސުޖަން ދީފާއު ކުރުމުން ރީބައުންސަށް ނުކުތެވެ. އެ ބޯޅަ އަންޖަން ބިސްޓާ ވަނީ ގޯލްގެ ތެރެއަށް ވައްދާލައިފަ އެވެ.
މެޗުގެ 57 ވަނަ މިނެޓްގައި މާވިން ހަމިލްޓަން ވަނީ ލަންކާގެ ފުރަތަމަ ލަނޑު ޖަހައިފަ އެވެ. އޭރިއާގެ ބޭރުން ހާފުގެ މެދެއްހާ ހިސާބުން އޭނާ އެއްފަހަރުން ފޮނުވާލި ބޯޅަ ވައްދާލީ ގޯލްގެ މަތީ ކަނަށެވެ. އޭގެ ކުރިން ލަންކާގެ ކަވިންދު އިޝާން އަށް ވެސް ރަނގަޅު ފުރުސަތެއް ލިބުނެވެ. އޭނާ ފޮނުވާލި ބޯޅަ ނޭޕާލް ޑިފެންޑަަރު ދިފާއު ކުރީ ގޯލް ލައިން މަތިންނެވެ.
ލަންކާއިން ދެ ވަނަ ހާފުގައި އެޓޭކު ކުރަން މަސައްކަތް ކުރުމުން ނޭޕާލުން މަސައްކަތް ކުރީ ކައުންޓަ އެޓޭކްގައި ފުރުސަތުތައް ތަނަވަސް ކުރުމަށެވެ. ރާއްޖެއާ ދެކޮޅަށް ނޭޕާލް ކުޅުނު މެޗުގައި ލަނޑު ޖެހި މަނީޝް ޑަންގީ އަށް ވެސް ވަނީ ކައުންޓަ އެޓޭކުގައި ރަނގަޅު ފުރުސަތެއް ލިބިފަ އެވެ. އެހެންނަނަވެސް އޭނާ އަށް ކާމިޔާބު ނުވީ ލަންކާގެ ކީޕަރު ސުޖަން ކުރިއަށް ނުކުމެ ބޯޅަ އަށް ހުރަސް އެޅުމުންނެވެ.
ނޭޕާލުން ތިން ވަނަ ލަނޑު ޖެހީ 85 ވަނަ މިނެޓްގައި އަޔުޝް ގަލާން އެވެ. އޭނާ ލަނޑު ޖެހީ ޓެޖް ޓަމަން ނަގައިދިން ބޯޅަ ގޯލްގެ ތެރެއަށް ވައްދާލައިގެންނެވެ. އޭގެ ކުރިން ވެސް އަޔުޝް އަށް ވަނީ ލަނޑު ޖަހާނެ ރަނގަޅު އެހެން ފުރުސަތެއް ލިބިފަ އެވެ. އަންޖަން ބިސްޓާ ކައުންޓަ އެޓޭކްގައި ނަގައިދިން ބޯޅަ ހުސްކޮށް އަރައި އަޔުޝް ބޮލުން ފޮނުވާލުމުން ދިޔައީ ދަނޑި ކައިރިން ބޭރަށެވެ.
މެޗުގެ އިތުރު ވަގުތުގެ ތިން ވަނަ މިނިޓްގައި ލަންކާ އަށް ލިބުނު ޕެނަލްޓީއަކުން ޑިލޯން ވަނީ ލަންކާގެ ދެ ވަނަ ލަނޑު ޖަހައިފަ އެވެ. އެ ޕެނަލްޓީ އަކީ ނޭޕާލްގެ އޭރިއާގެ ތެރެއިން އެ ޓީމުގެ ޑިފެންޑަރު ގައުތަމް އަތުގައި ޖެހުމުން ދިން ޕެނަލްޓީއެކެވެ. މެޗުގެ ބާކީ ދެ މިނިޓްގައި ވެސް ލަންކާއިން ވަނީ ނަތީޖާ ހަމަހަމަ ކުރެވޭތޯ މަސައްކަތްކޮށްފަ އެވެ. ނުރައްކާތެރި ދެ ހަމަލާއެއް އެ ޓީމުން ފޮނުވާ ވެސް ލިއެވެ.