29 ސެޕްޓެމްބަރ 2021 - 12:28
ހުޅުމާލޭގެ ފޭސް ދޭއްގައި ހިޔާ ފްލެޓްތައް ހުރި ސަރަހައްދަަށް ބަހުގެ ހިދުމަތް އަދިވެސް ފަށާފައިނުވާތީ އަންހެނަކު ކުޑަ ކުއްޖަކު ކޮނޑުގައި ސްކޫލަށް އުފުލާ ވީޑިއޯއެއް އާންމުވެއްޖެ އެވެ. އާންމުންގެ ބަހުސް ބޮޑުވެ، ވަރަށް ގިނަ ބަޔަކު މި މައްސަލާގައި ކަމާ ބެހޭ ފަރާތްތަކަށް ފާޑު ވެސް ކިޔައިފަ އެވެ.
އިއްޔެ ހަވީރެއް ހާއިރު ސޯޝަލް މީޑިއާގައި އާންމުވި އެ ވީޑިއޯގައި ފެންނަނީ އަންހެނަކު ހިޔާ ފްލެޓާ ދިމާލަށް ކުޑަ ކުއްޖަކު ކޮނޑަށް އަރުވައިގެން ހިނގާފައި ދާ މަންޒަރެވެ. ވީޑިއޯއިން ފެންނަ ގޮތުގައި ވަކި ހިސާބަކަށް ދިއުމަށް ފަހު އަންހެން މީހާ ވަނީ ކުއްޖާ ކޮނޑުން ބާލައިފަ އެވެ.
ބެލެވޭ ގޮތުގައި އެ ކުއްޖާއަކީ ގަލޮޅު ސްކޫލުގައި ކިޔަވަމުން އަންނަ ކުއްޖެކެވެ. އެ މީހުން ހިޔާ ފްލެޓަށް ދިޔައީ ބަހުގައި ހުޅުމާލޭ ފޭސް އެކެއްގެ ބަސް ސްޓޮޕަކަށް ހުއްޓުމަށް ފަހު ކަމަށް ބެލެވެ އެވެ.
ފޭސް ދެއަކަށް މިހާތަނަށް ބަހުގެ ހިދުމަތް ފަށާފައިނުވި ނަމަވެސް އެތަނަށް ގާތްގަނޑަކަށް 60 އެއްހާ އާއިލާ މި މަހުގެ ތެރޭގައި ބަދަލުވެ، ދިރިއުޅެމުން އެބަދެ އެވެ.
އެ ދެމައިން ފްލެޓާ ދިމާލަށްދާ ވީޑިއޯ އާންމުކޮށް އެ ދެމައިން ހޯދުމަށް ހިޔާ ޔޫނިއަނުން އެހީއަށް އެދުނެވެ. އެ މީހުން ހޯދަމުން އަންނަނީ އެ މީހުންނަށް ޔޫނިއަންގެ ފަރާތުން ވެވެން އޮތް އެހީތެރިކަމެއް ވުމުގެ ގޮތުން ކަމަށް އެ ޔޫނިއަނުން ބުންޏެވެ.
އެ ވީޑިއޯ އާންމުވުމާ އެކު ހިޔާ ޔޫނިއަނުން ވަނީ އެ ސަރަހައްދުގައި މީހުން ދިރިއުޅެން ފެށިއިރު ވެސް ބަހުގެ ހިދުމަތް އަދިވެސް ފަށާފައިނުވާތީ އެކަމުގެ ކަންބޮޑުވުން ފާޅުކޮށްފަ އެވެ.
ފްްލެޓުތަކުގެ އެތެރޭގެ މަސައްކަތް ނުނިންމާ އެތަން ހަވާލުކުރުމުގެ އިތުރުން ފްލެޓްތައް ހިމެނޭ ސަރަހައްދުގައި އަސާސީ އެއްވެސް ހިދުމަތެއް ލިބެން ނެތުމަކީ ފްލެޓް ލިބުނު ރައްޔިތުންނާ މެދު ސަރުކާރުން އިހުމާލުވުން ކަމަށް އެ ޔޫނިއުން ބުންޏެވެ.