29 ސެޕްޓެމްބަރ 2021 - 12:20
މާލޭ ސިޓީ ކައުންސިލްގެ ޕީޕީއެމްގެ މެމްބަރު ނަހުލާ އަލީ އަމިއްލަ ކުންފުންޏަކުން ނެންގެވި ކަމަށް ބުނާ 1.7 މިލިއަން ރުފިޔާ އަނބުރާ ދައްކަން އެ ކުންފުނިން މުހުލަތެއް ދީފި އެވެ.
އަމިއްލަ މީހެއްގެ އެ ކުންފުނިން ނަހުލާ އަށް އިއްޔެ ފޮނުވި އެންގުމެއްގައި ބުނީ އަނބުރާ ދައްކާ ގޮތަށް އޭނާ އަށް 1،670،000 (އެއް މިލިއަން ހަ ލައްކަ ހަތްދިހަ ހާސް ރުފިޔާ) ދީފައިވާ ކަމަށެވެ.
އެކަމަކު، މިހާތަނަށް ވެސް އެ ފައިސާ އަނބުރާ ލިބިފައި ނުވާތީ، އިއްޔެ އިން ފެށިގެން ހަތް ދުވަހުގެ ތެރޭގައި ފައިސާ ދައްކައި ނިންމަން އެންގުމުގައި ވެ އެވެ.
އެންގުމުގައިވާ ގޮތުން، އެ މުއާމަލާތާ ބެހޭ ކަންތައްތައް އެ ކުންފުނީގެ ފަރާތުން ހަވާލުކޮށްފައި ވަނީ ސިވިލް ކޯޓްގެ ކުރީގެ ގާޒީ މުހައްމަދު ހަލީމްއާ އެވެ.
ނަހުލާ އަށް ދޫކުރި ކަމަށް ބުނާ ފައިސާ ހަފުތާއެއްގެ ތެރޭގައި ނުދައްކައިފި ނަމަ އަމަލު ކުރާނެ ގޮތެއް އެ އެންގުމަކު ނެތެވެ.
މި އެންގުމާ ގުޅިގެން ނަހުލާ އަށް "މިހާރު" އިން ތަކުރާރުކޮށް ގުޅައި މެސެޖުކުރި ނަމަވެސް ޖަވާބު ނުދެއްވާތީ އޭނާގެ ބަހެއް ނުލިބުނެވެ.
ކުންފުންޏަކުން ނަހުލާ ނެންގެވި ކަމަށް ބުނާ ފައިސާ ނުދައްކައިގެން މައްސަލަ ހޫނުވިއިރު، ސިޔާސީ ގޮތުން ވެސް އޭނާ އަށް މިހާރުު ވަނީ ކަންތައްތަކެއް ކުރިމަތިވެފަ އެވެ. އިދިކޮޅު ޕީޕީއެމުން ވަނީ އެތެރޭގެ އިންތިހާބުތަކުގައި އޭނާ އަށް ބައިވެެރިވެވަޑައިނުގެންނެވޭ ގޮތަށް ސަސްޕެންޑްކޮށްފައި ކަމަށް އެ ޕާޓީން ބުނެ އެވެ. ނަމަވެސް ނަހުލާ އެކަން ދޮގުކުރައްވަ އެވެ.