29 ސެޕްޓެމްބަރ 2021 - 10:38
ބައެއް ރަށްރަށުގެ ކައުންސިލް އިދާރާގެ ސެކްރެޓަރީ ޖެނެރަލް (އެސްޖީ) ގެ މަގާމަށް މީހުން ނުލިބިގެން އަނެއްކާ ވެސް އިއުލާނުކޮށްފި އެވެ.
ސިވިލް ސާވިސް ކޮމިޝަން (ސީއެސްސީ) އިން އިއްޔެ ކުރި އިއުލާނެއްގައި ވަނީ 74 ރަށެއްގެ ކައުންސިލްގެ އިދާރީ ހިންގުމުގެ އެންމެ އިސްވެރިޔާގެ މަގާމަށް ކުރިމަތިލާން އަންނަ މަހުގެ 11 ވަނަ ދުވަހާ ހަމައަށް މުއްދަތު އިތުރު ކޮށްފައިވާ ކަމަށެވެ.
އެސްޖީގެ މަގާމަށް މީހުން ހޯދަން ކުރިން ހުޅުވައިލުމުން 511 ފޯމު ހުށަހެޅުމުން އޭގެ ތެރެއިން 272 މީހަކު ވަނީ ޝޯޓުލިސްޓުކޮށްފަ އެވެ. އެ ރަށްރަށުގެ ކައުންސިލްގެ އެސްޖީ އަށް މީހުން އައްޔަންކުރަން ސީއެސްސީން މިހާރު ދަނީ އެ ކައުންސިލްތަކަށް ފޮނުވަމުންނެވެ.
ރަށު ކައުންސިލްގެ ސެކްރެޓަރީ ޖެނެރަލަކަށް މުސާރައިގެ ގޮތުގައި މަހަކު 9،300ރ. އަދި އެގްޒެކެޓިވް އެލަވަންސްގެ ގޮތުގައި 6،800ރ. ލިބޭނެ އެވެ. އަތޮޅު ކައުންސިލްގެ ސެކްރެޓަރީ ޖެނެރަލްގެ މުސާރައަކީ 12،130ރ. އެވެ. އެ މަގާމަށް އެގްޒެކެޓިވް އެލަވަންސްގެ ގޮތުގައި 8،870ރ. ލިބޭނެ އެވެ.
ސިޓީ ކައުންސިލްގެ ސެކްރެޓަރީ ޖެނެރަލަކަށް މަހަކު 20،500ރ. އަދި އެގްޒެކެޓިވް އެލަވަންސްގެ ގޮތުގައި 15،000ރ. ލިބޭނެ އެވެ.
ކައުންސިލްތަކަށް ސެކްރެޓަރީ ޖެނެރަލުން އައްޔަން ކުރަނީ އެ ކައުންސިލެއްގެ ލަފަޔާއެކު ސީއެސްސީންނެވެ. އެގޮތުން، އެސްޖީގެ މަގާމަށް ކުރިމަތިލާ މީހުންނާ އިންޓަވިއު ކުރުމަށް ފަހު 60 ޕަސެންޓަށް ވުރެ މަތިން ޕޮއިންޓް ލިބޭ މީހުންގެ ތެރެއިން މެރިޓް އުސޫލުން އެންމެ ގާބިލް މީހެއް ކަނޑައަޅައި އެ މީހަކާ ގުޅޭގޮތުން ކައުންސިލްގެ ލަފާ ހޯދަ އެވެ. އެ މަގާމަށް އައްޔަން ކުރަނީ އޭގެ ފަހުންނެވެ.
ކައުންސިލްތަކަށް އެސްޖީން އައްޔަން ކުރަނީ ފަސް އަހަރަށެވެ.